تعاملات أساتذة الجامعة : ازدواجية معايير أم اعتلال تفكير؟

مرحبا يا جماعة :)
أول شي باركولي .. سجلت آخر فصل إلي بالجامعة :)
يعني كم شهر وبتخرج :)

يمكن هالسبب خلاني أتجرأ لأكتب هالمقال عن ازدواجية المعايير عند بعض الدكاترة بجامعاتنا الأردنية :

المعايير المزدوجة أو الكيل بمكيالين هو مفهوم سياسي صيغ في عام 1912 بحسب الويكيبيديا, وهو يشير إلى أي مجموعة من المبادئ التي تتضمن أحكاما مختلفة لمجموعة من الناس بالمقارنة مع مجموعة أخرى.

لكن باعتقادي أن الويكيبيديا لم تصب تماما ً هذه المرة , فازدواجية المعايير موجودة -وإن اختلفت تسميتها- منذ الأزل وتطبق على مناحٍ أشمل من السياسة بعينها , وأمثلتها كثيرة في مجتمعنا اليوم ولا تكاد تحصر, الأمر الذي أحدث اعوجاجاً كبيرا ً في التعاملات بين البشر.

ومع أن هذا المنطق مرفوض جملة وتفصيلا ً لدى مختلف المؤسسات والمجتمعات, إلا أنه صار للأسف منطقا ً معتمدا ً لدى بعض أساتذة الجامعات أكثر المؤسسات المتصفة بالحياد والإنصاف , وبات ينتهك الأخلاق والعدالة أهم ما يميز هذا المجتمع النظيف.

تختلف أنواع ازدواجية المعايير من أستاذ لآخر, فبعضهم من يميز حسب إن كانوا طلاباً أم طالبات , فتجده يستقبل الطالب حين يطرق باب مكتبه لآمر ما بتكشيرة رهيبة وبصوت صارم يستدعي الطالب للخروج مسرعا ً ما أمكن , وبعد لحظات تدخل طالبة عند ذات الأستاذ فتستحيل الكشرة بسمة , ولا تدري كيف يصبح كلامه رقيقا ً ومهذبا ً معها.

وهذا النوع من الأساتذة يبرر ازدواجيته للمعايير بأن الطالبة هنا جاءت لتدرس وتجتهد فعلا ً , ويتهم الطلاب الذكور بأنهم فقط يتسببون بالازعاج وهم موجودون لاختلاق المشاكل.

بالنسبة لنوع ٍ آخر من الأساتذة أصحاب المنطق المزدوج, هم لا يميزون إلا بعض الخاصة, الذين تربطهم بأهاليهم معارف أو مصالح شخصية, فإن أراد هذا الأستاذ أن يبقى على اطلاع لما يحصل بداخل شركة معينة ابن موظف فيها طالب لديه , فحتما ً يستحق هذا الطالب الدخول للمحاضرة متى شاء , وحتى الغياب عنها.

وحين يطلب بعض الطلبة المتأخرين عن المحاضرة أقل من عشرة دقائق الدخول لها, يعاقبهم بالحرمان من الحضور ولا يخلو الأمر من بعض العبارات التي قد تسيء للطالب وتمس كرامته.

وترى بعض هذا النوع من الأساتذة يطبقون ازدواجيتهم بشكل يعتقدون أنه أقل وضوحا ً, فقد يقوم بطرد طالبتين كن يتحدثن أثناء الشرح, وحين يتكرر نفس الفعل من قبل إحدى معارفه فإنه قد يصرخ فعلا ً لكن ليس بوجهها إنما للقاعة جمعاء ويتهم الجميع بالازعاج , وإن كان فعلها تكرر قد يطلب منها أن تنتبه للشرح .

أكثر أنواع ازدواجية المعايير غرابة لدى أساتذة الجامعات هي حين يميّزون بينهم وبين الطلبة في تطبيق أنظمة الجامعة, فالتدخين بالممرات وعلى أبواب القاعات مسموح لهم فقط , وإدخال فنجان القهوة معه لقاعة الامتحان مسموح له أيضا ً.
وقد ترى أن طالبة قد نسيت هاتفها بحقيبتها دون إغلاق, ومن سوء حظها يرن هذا الهاتف , فيقيم الأستاذ عليها الدنيا ولا يقعدها وبعدها بلحظات يرن هاتفه هو الآخر فيقول ببساطة "تلفون مهم , عن إذنكو شباب".

من ناحية علم النفس الاجتماعي, فكون أن هذه الأفعال لا تعدو عن كونها سلوكا ً فإن السبب الرئيس في ازدواجية المعايير هو خلل في القيم والأخلاق التي توجه السلوك.

ولكن يبقى أن نقول أن هناك نماذج مشرقة ومشرفة دوما ً من أساتذة الجامعات, هم من يحملون المسؤولية بصدق وأمانة ويقدّرون مهنتم ومكانتهم كموجهي أجيال ومربي مجتمعات.

خبر عاجل

محروق نيوز-عمّان,الأردن

تفاجئ عالم المدونات صبيحة هذا اليوم بوجود صديقة جديدة انضمت إلى عالمنا,وقد تبين لي عند قرائتي لتدوينتها الأولى من أنها ستحمل الفرح والتفاؤل معها (هيك هي كاتبة انه مدونتها ح تكون مكان للمتفائلين)

الخلاصة .. رحبوا لو سمحتم بأختنا الجديدة .. سامية أبوكويك

ملاحظة : سامية هي واحدة من ضحايا البوليتكنك, وزميلتي بمشروع التخرج

hello world

صباح/مسا الخير للكل
وكل عام وانتم بألف خير .. وأضحى مبارك ان شالله

يمكن غبت كتير عنكم هالمرة .. وما بعرف اذا شتقتولي متل ما شتقتلكم أو لآ :)

أشياء كتيرة صارت معي بهالفترة .. أهمها إني صرت اشتغل بمجلة "مجلتنا" التابعة لمجموعة الفريدة = (ليالينا وشلتها)
صرلي بحدود 7 أشهر معهم حتى الآن :) .. بس ما بشتغل ك مصمم او ديزاينر او كزا .. لآ أتقل بشوي .. هههه
مممم .. انا عضو كاتب فيها ومراسل صحافي.
والحمدلله مبسوط كتير اني عم بنجز اشي اضافة لدراستي

و ع سيرة الدراسة والجامعة .. يللا جهزولي حالكم على حفلة تخرجي هالصيفية ان شالله .. ان شالله بشهر 6 بكون ودعت الجامعة وخلصت .. والتخرج بكون بشهر 7 ان شالله
بتعرفوا شغلة .. مع انه قديش كنت احكي عن جامعتي .. بس بحبها .. وهال4 سنين اللي مضيتهم فيها .. اكيد ما بيتعوضوا .. وما اظن اني كنت رح انبسط لو كنت بغير جامعة
أكتر شي انا مبسوط منه .. هو اني طلعت بأغلى ثروة بالدنيا .. وهي صحابي اللي صرنا اقوى شلة .. واكتر من اخوة .. احنا توائم بعض !!


أشياء كتيرة كمان صارت معي .. في منها بينحكى ومنها لآ P:
hehehehehehehe

حابب أوجه تحية كبيرة لويسبر .. لآنها اكتر حدا كان يستفقدني .. مع انها ما عادت تبين بالفترة الأخيرة
(شوفوا مين بيحكي)

واكيد ما بنسى صاحبي الشيشاني .. وبقية شلة المدونين اللي انا جد مشتقلهم

كل عام وانتم بألف خير ان شالله .. وتقبل الله طاعتكم .. وأضحى مبارك :)

وما أدراك ما البوليتكنك 5 .. قنبلة الموسم

مقسوم لا تاكل .. وصحيح لا تقسم .. وكل واشبع!!

هذه هي الاستراتيجية الجديدة التي عاملتنا بها جامعة البلقاء التطبيقية لنتم بها تسجيلنا لهذا الفصل , فقد قامت ببعض التعديلات البسيطة على نظام التسجيل .. بعض القوانين الجديدة التي تساعد الطلاب في أزمة شح المواد الدراسية .

اولى هذه القوانين هو ان طرح المواد يتم اعتماداً على الخطة الاسترشادية , أي أن مواد الفصل الاول تطرح فقط بالفصل الاول ومواد الفصل الثاني تطرح بالفصل الثاني .

أما ثاني هذه القوانين , هو ان التسجيل أصبح بالتدرج من المستويات الادنى فالاعلى مع عدم السماح للطلبة بتسجيل مواد مستويات عليا حتى ولو انهم قد اتموا المتطلبات للمساق , فمثلا انا اعتبر طالب مستوى ثالثة , لكن المواد التي احتاجها للفصل القادم تكون من مستوى رابعة وخامسة , ومن مستوى ثالثة فصل ثاني لم اجد سوى تحليل انشائي 2 , ومع هذا لم أتمكن من تسجيل المواد التي احتاجها.
وللعلم , فقد كان التسجيل سابقاً يتم بالعكس , من المستويات الأعلى وحتى الادنى , ولذلك لم نتمكن من تسجيل بعض المواد التي هي من مستوياتنا لآن المستويات الاعلى منا كانت تسجلها حينها , والآن .. اصبحت المستويات الادنى هي التي تسبقنا في عملية التسجيل .. وكنا نحن -دفعة 2008 - الضحية لهذه القرارات.


الأمر المضحك بالموضوع هو أنّا لازلنا نعتمد نظام الساعات , الذي يمنح الطلبة الحرية في اختيار المواد , وكثافتها بالفصل الواحد .. وانها تتيح للطلبة اختصار الوقت , بأن يزيدوا العبء الدراسي لديهم.
والان .. نحن مقيدون بالمواد التي تطرح , وبالخطة الاسترشادية .. ومقيدون بأن نبقى على الاقل 5 سنوات كاملة هنا , مع انه كان بالامكان التخرج ب4 سنوات!!

اما قنبلة الموسم , والتي تنكرها الجامعة هي انه الجامعة تبنت نهجاً "اتيكيتياً" , وذلك بأن سمحت للفتيات بالتسجيل اولاً ومن ثم سمحت لكلا الجنسين من التسجيل.
حيث انه وفي "الساعة والنصف" الاولى من التسجيل من يوم السبت وحتى الآن .. واجه جميع الطلاب الذكور مشاكل في الدخول للنظام , في حين ان الطالبات كن قد سجلن في هذه الفترة .. وفي يوم التسجيل الاول كانت تظهر هذه الرسائل للطلاب!!

الحرب على "أمنية" .. ولعنة الفستق!!

أ.محروق نيوز - عمّان (:

شهدت شركة الاتصالات (أمنية) في الآونة الاخيرة حرباً" فستقية" من عدة اطراف ؛ تجار وشركات منافسة .
لفتت انتباهي البارحة عدة لافتات تقول (لانبيع خطوط امنية) معلقة على واجهات محلات بيع الموبايلات , كنت وقتها في احدى مجمعات الباصات للعودة من الجامعة , استغربت ذلك .. لكن لاحظت اللون (الفستقي) -لون امنية- مخططاً حول اللافتات , فقلت ربما يكون نوعاً من الدعاية لأمنية :)
لكني تفاجأت اليوم بازدياد عدد المحلات التي تعلق هذه اللافتة .. دخلت على احد المحلات وسألته عن سبب تعليق اللافتة , فقال لي: "لا نبيع خطوط امنية .. وبس" .. وكانت الكشرة واضحة جداً

دخلت على محل آخر .. وسألت الشاب الموجود بالمحل عن سبب تعليق هذه اللافتات , فأخبرني أن "شركة أمنية عاملة touch مع اصحاب المحلات" .. فطلبت منه المزيد من التفاصيل .. الا انه أبى ذلك , وقال ان اصحاب المحلات لا يريدون ان يعلنوا السبب الحقيقي!!
وقبل ان يكشر .. طلبت منه تصوير اللافتة المعلقة على واجهة المحل , وها هي الصورة:




على صعيد آخر , قامت احدى شركات الاتصال المنافسة بنشر اعلان على مواقع الانترنت , الاعلان عن تطبيقات Apple , وقد صورت شركة امنية على شكل فستق سوداني.. الشكل القريب من شعار شركة امنية.

______________________________________

ملاحظة:

وأخيراً .. نزلت الصورة :)

وما ادراك مالبوليتكنتك .. الجزء الرابع (واشياء اخرى)

اكي انتو من زمان متوقعين اكتب اشي عن الجامعة مع بداية الدوام .. انه شو اكتر نهفة عملتها فينا .. بس تأخرت شوي لآعمل سسبنس (لول)

بصراحة .. ماعملت الجامعة فينا اي شغلة هالمرة ... غير انها شوي غلبتنا.. بـ 20 ايلول (يوم الاثنين الماضي) ... كان يوم السحب والاضافة عندي .. وعلى حظنا , سيرفر الجامعة ما بعرف شو ماله .. مش راضي يفتح .. اللي بقول خربان .. واللي بقول سخنان .. واللي بقول فقع !!
ضلينا طول اليوم واحنا ع النت ... منسبسب انا والشباب ع الجامعة والتسجيل

بالاخر .. و عال12 بالليل .. زبط الموقع .. وزبطت جدولي .. 18 ساعة ( 3 مواد ح ث خ) .. و (3 ن ر)
:)

هلق هاد التعطيل يعتبر عادي .. كل فصل على حظي بيخرب الموقع :)

اما النهفة .. صارت مبارح الاحد
دخلت ع قاعة 1712 .. على اساس علي فيها هندسة نقل , بعد شوي بلاقي صحابي من التخصص القديم (الكهرباء) موجودين .. طيب شو بتعملوا هون .. واحد عنده اجهزة كهربائية .. ووالتاني الكترونيات القدرة .. بقلهم اكيد انتو مخربطين .. كل واحد طلع جدوله (اللي ممنوع تطبع غيره ولمرة واحدة) .. كلنا بنفس القاعة .. طلعوا حاطين 3 مواد بقاعة وحدة

هاي ما كانت المرة الوحيدة .. اليوم كان علي (نيوميركال) دخلت ع القاعة .. طلع فيها طلاب عليهم (فلويد ) .. وطلاب عليهم (تصميم رصفة) .. يعني كمان 3 مواد بقاعة وحدة
زكروني بأيام الكتاب .. لما كان ابن 6 سنين وال10 سنين يدرسوا بصف واحد :)

قولوا مش مشكلة .. رحنا ع التسجيل .. وطلعوا مغيرين القاعات بدون ما يخبروا حدا .. حتى الدكاترة مش عارفين وين صاروا قاعاتهم:)

___________________


بتتذكروا السنة الماضية لما خبرتكم عن مبنى 17؟؟
هاد يعتبر متل (المعلم الحضاري الوحيد عنا) .. بنوه بدعم من اليابان :)
المهم .. وانا بنهاية بسنة اولى فصل تاني .. بلشوا يبنوه عليه طابقين جداد .. قال عددنا زاد وبدهم قاعات ... مر الصيفي سنة اولى .. ومر الصيفي سنة تانية .. وبلشنا بالاول سنة تالتة ... ومازال المشروع تحت الانشاء ,, عم يعمروا فوق روسنا .. ويحفروا ويضربوا ومش عارف شو صرلهم سنتين عم يبنوا بهالطابقين ... قبالنا مصنع الببسي , بالفصل الاول سنة تانية (يعني بعد مشروع الطابقين) بلشوا يبنوا مبنى جديد , مدري كم طابق فيه .. خلصوه .. ودهنوه ازرق واحمر .. وصار بالخدمة عادي :)

دكتور عنا بيتخوت بقول .. العمال تبعون 17 .. بتداموا بداوموا معكم .. بتعطلوا , بعطلوا ... بتسجلوا مواد .. بسجلوا .. وحتى بالسحب .. بيسحبوا معكم :)

___________________

اهم اشي انا مبسوط منه .. اني بكون هلق قاطع 100 ساعة بالضبط :)
وضايلي سنتين وبخلص من هالقرف .. :)

بتمنى ما اكون قرفتكم معي :)

تحياتي

وما أدراك ما البوليتكنك؟؟ ... الجزء الثالث

مفاجآت كلية الهندسة التكنولوجية / البوليتكنك .. ما رح تنتهي أبداً
ورح تضلها .. تصدمنا وتصدمنا لنتخرج
وما بيخلى التخرج من صدمة عنيفة شوي منها ... القصة هالمرة لواحد تعرفت عليه جديد .. وهو صاحب صاحبي
الشب خريج كان ع الصيفي .. ما كان عليه غير يختم ب6 ساعات التدريب المقررة .. وبيتخرج .. هالشب حب انه يتميز عن الباقي . وما كذب خبر ... وطلع على احدى دول الخليج لياخد تدريب غير شكل .. وعمل تقرير عن الشغل اللي تدربه .. تقرير خيلة صراحة .. وبحق يعني يعطيه العافية على الشغل اللي اشتغله

والتدريب متل ما كتار بيعرفوا انه ما اله علامة .. بس ناجح راسب .. متل العلوم العسكرية .. وهيك مواد الكل بينجح فيها ..

بظنكم عرفتوا بقية الحكاية ... الجامعة رسبت هالطالب بالتدريب !!
مش بس لحاله .. أكتر من شي 12 طالب رسبوا بالتدريب والحجة قال انهم ناقلين تقارير التدريب من النت !!

هلق هم ما سكتوا .. وتدخل العميد بالقصة وقرر هو بذاته يشوف التقارير .. والنتيجة النهائية للاسبوع الجاي .. وان شالله تمشي الامور :)

الواحد ما بصدق يخلص من هالجامعة وهي عم تمسك فيه باسنانها قبل ايديها ..


الله يسترني من صدمة التخرج ع دوري :)

بتمنى ما اكون تقلت دم عليكم ... تقبلوا تحياتي

RamaDan KAriM

من بعد غياب طويل ... يا ريت تكونوا اشتقتولي :)
الفصل تقريباً خلص .. وضايل 7 ايام وبعطل :)
مع انه هالفصل كان تقيل دم علي .. وخصوصي مع الدكاترة .. بس كمان في ذكريات حلوة !!

واكيد ما بنسى قرصة النحلة لهلق .. وصار عندي فوبيا منها .. منكون قاعدين بالمحاضرة ما بلاقي والا نحلة بتحوم حولي .. والشباب صحابي بيضحكوا .. ود.نافذ بيسألنا شوفي ؟؟

المهم ... حبيت أعايد عليكم بكم صورة من تصميمي :)

___________________

هاي الصورة .. مادخلها برمضان .. بس صورتها وانا مروح من الجامعة .. كنت ناوي اكتب عنها موضوع .. بس ماعرفت !!

شو تعليقكم ع الموضوع ؟؟؟

تحياتي

وما أدراك ما البوليتكنك ؟؟!! الجزء 2

يا جماعة اشتقنالكم .. مو شوي .. كتير والله .. بس فترة امتحانات هلق :)

قبل كم يوم قررت انا وصاحبي "شهاب" انه ندرس لامتحان التحليل الانشائي .. للاسف وقت البريك تبعنا بيجي بحدود 2 ونص .. ومع انه لازم المكتبة (المكان الوحيد المكيف واللي مسموحلنا نقعد فيه) تسكر بوابها ع ال3 ... ما بدخلونا لآنه الموظفين المحترمين بيهربوا .. فقررنا نقعد بسكوير بالجامعة .. واحنا مركزين وعم نحل.. في حشرة عم تجنني .. كشيتها وانا مركز
ورجعت احل ... بعد شوي حسيت كأنه انا المحقق "توغوموري" ... وكونان ضربني بهديك الابرة .. قلت لشهاب وانا بصرخ : انقرصت !!

قمت وقفت .. قللي لآ ما في اشي .. انا نفسيا اعتقد اني ما انقرصت مع اني عم اتوجع .. بعد شوي راح قللي ما تتحرك .. وانا وقع قلبي وصار بين رجلي .. طلعت النحلة عم تعمل جولة ع رقبتي ... وما بعرف كيف شالها شهاب وضربها :)

المهم .. ورحنا ركض ع الوحدة الطبية العتيدة اللي عنا .. وانا بقله مافي امل الساعة 3 ... سكروا .. قللي لآ الاسعاف لازم يضله شغال (مفكر حاله بعده بالامارات) ... وصلنا لقينا بالباب مسكر .. رح دقه وفتح .. انا رجعلي الامل .. دخلنا لجوا العيادة بس طلعوا مسكرين الباب الداخلي .. المهم شافنا موظف وشاف رقبتي قللي الشغلة مو مستاهلة .. حط توم عليها وبمشي الحال!! كنت بدي اقلله "بالله عليك" بس استحيت وضليت مكمل يومي للساعة 6 المسا .. ولما روحت ع البيت مرقت ع الصيدلية ووصفلي مرهم .. وقللي النحلة هاي دلوعة .. مش قارصتك منيح !!


السؤال من هالقصة .. شو الهدف من انه يضل دوام الطلاب لل6 .. وكل الموظفين بروحوا ع ال3 ؟؟؟
يعني لا مكتبة ولا تسجيل ولا عيادة .. ولا شؤون ولا حدا بكون مداوم غير احنا والدكاترة اللي عليهم محاضرات؟؟
طيب بركي حدا صار معه حادث عاجل بالجامعة شو يعمل؟؟
انا طلعت قصتي سليمة ومش هالقصة الكبيرة بس غيري لآ .. بتذكر صاحبي يللي مات بالهاشمية السنة الماضية والسبب لآنه الاسعاف تأخر عليه .. طيب شو يعملوا عنا اذا مافي اسعاف اصلا؟؟

ودمتم سالمين :(

وهاي صورة النحلة بعد ما قتلها شهاب

وما أدراك ما البوليتكنك ؟؟

مع كل يوم يمر على .. يزداد اعجابي بكلية الهندسة التكنولوجية - البوليتكنك
في كل مرة تدهشك هذه الكلية بما لا تتوقع

لن أطيل كثيراً .. لكن , هل توقع احدكم ان يذهب ذات صباح ليداوم بالجامعة .. طبيعي
وبعد المحاضرة يتفاجئ بأن المادة قد ألغيت؟؟؟

هذا ما حصل معي البارحة .. فبعد انتهاء لاب المشاغل الهندسية2 .. وبعد مرور أكتر من 14 يوم على الدوام .. ألغيت الشعبة التي أدرس بها لعدم وجود العدد الكافي من الطلاب .. واحنا ننضرب على قلبنا للفصل الجاي


ملاحظة:
البوليتكنك .. بكل عيوبها ... بحبها :)



صورة تجمع أبرز معالم البوليتكنك .. مبنى 17 مع التراكتور الاسطورة وسور باب الدايو


____________________________________
اضافة جديدة

اليوم طلعت جريدة المواد للفصل الاول الجاي
نفس الغلطة الشنيعة كل فصل
عشر مواد بنفس الساعة بحطوها .. وقال التكرار بعلم (....) ... صرلي بسجل 7 فصول معهم ولا مرة تعلموا من خطأهم

من وحي البوليتكنك

بعد التحية,
انا هالمرة عم بدوّن من جامعتي البلقاء ... مش عارف كيف زابط النت اصلاً

المهم ..انا حابب اكتب عن عدم التنسيق اللي صاير عنا بالجامعة ...

امتحانات الفيرست كان المفروض تبدا ب 14/3 ... ولسبب ما ما بعرفه .. تأخرت الامتحانات وبلشت بـ 28/3 ...مما ادى بدوره الى تقليص الفترة بين الفيرست والسكند ...فأنا من يومين بس خلصت فيرست ... واليوم كان عندي اول امتحان سكند ..

بس مش هاي القصة ... القصة انه بامتحانات الفيرست كان في تعارض مش طبيعي بالامتحانات ... واكبرهم تعارض الديناميكا والفلويد والنقل ... هالتعارض كان عند اكتر طلاب السنة التانية والتالتة .. وتقدم الطلاب بشكاوي عديدة على هاد الاشي ...

المفاجأة ... لما نزل جدول السكند ... ناقلين الجدول حرفياً عن الفيرست ... وكل التعارضات ضلت متل ما هي ... يعني ما اعتبروا من الشكاوي الماضية ... طيب في حدا بنزل مادتين تخصص لنفس القسم بنفس اليوم ؟؟؟

بس كمان هالشغلة بلعناها ... الوقت الحالي هو فترة تسجيل الصيفي
الحمدلله ... المرة الموقع معي اشتغل تمام وما كان عليه مشاكل ... المشكلة بالجدول تبع الصيفي ,,, انا لازمني مادتين بشدة شديدة ... ومش لحالي بدي ياهم ... اغلب الطلاب بدهم ياهم .. واللي منزل الجدول الله ... الله يسامحه ... تارك كل اليوم فاضي ومنزل كل المواد بساعة وحدة ... ذكرني المسرحية ... "سايبين الشقة كلها وقاعدين فـأوضة وحدة؟؟" .. اغلب المواد نازلة 3:35-4:35
من بينهم المادتين اللي بدي ياهم ... فأضريت انزل وحدة منهم ... ومادة تانية مش كتير مهمة و3 لابات .. ودوامي من ال8 الصبح لل 6 المسا ... بالله عليكم مش جدولي بجلط ,, خصوصي بالصيف ... رح انهلك ...

هاي بعض مآسينا بالبوليتكنك !!!

________________________________________________________
شغلة ما دخلها بالموضوع:
مبارح رحت مع صاحبي ع كشك بابجامعة لنشتري بطاقة موبايل .. وكانوا معلقين ارقام مميزة بشكل مش طبيعي
قلت لحالي بشتريلي واحد جديد مشان مشروعي الجديد تبع التصميم... سألت عن سعر هاد الرقم 079X0000XY ... ولا طلع هو ب 300 دينار ... وقال هو رخيص لآنه مستعمل كمان
صاحبي بقول للبيايع .. ليه انا شاري قطعة ارض؟؟؟
_______________________________________________________

ودمتم سالمين

a-groupJORDAN

بوستر الافتتاح اللي رح اعمله بـ: 22,ابريل|نيسان 2010

▲►◄▼▲►▼◄▲►◄▼▲►▼◄▲►◄▼▲►▼◄

ان كنت تبحث عن حلول تصميم ابداعية ... ان كنت تبحث عن روح الابتكار
و تريد التميز والانفراد ...a-groupJORDAN تقدم لكم اكثر من ذلك !!!
web design - logo design - card design
motion design - Ads design - stationery design

▲►◄▼▲►▼◄▲►◄▼▲►▼◄▲►◄▼▲►▼◄

فريقنا:
احمد المحروق & اسلام سعادة

اتبعنا على الفيس بوك

ابتسم ... انت في البوليتكنك (:

"كلية الهندسة التكتنولوجية - جامعة البلقاء التطبيقية" .... لافتة عريضة قبل دخول "البوليتكنك"!

فتدخل وانت مستعد لدخول كلية هندسة ... ولكنك تصعق بمشاهدة اعمال الحفريات والبناء..
تريد ان تعبر الطريق للذهاب من جهة الى اخرى ... فتضطر للقفز من فوق خندق - حُفِر لآعمال صيانة الصرف الصحي - ...

تجلس في احدى القاعات الصفية , لحضور المحاضرة ... فلا تستطيع تمييز صوت الدكتور , لآن الحفريات أبت إلا وان تكون هي صاحبة الصوت الاعلى في الجامعة !!

وان اتيت هذا الاسبوع الى هذه الكلية ... انصحك بأن تلبس اكياس "نايلون" فوق حذاءك ... وان تجلب معك عصا او مشابه , لمساعدتك من الغوص بالطين المجمع عند درج -باب الدايو المؤدي الى مبنى 17 -.

مبنى 17 ...
ان كانت لديك محاضرة في مبنى 17 فاستعد للتالي:
1-اخذ حمام مجاني من السقف الذي يرشح الماء منذ اشهر - وقبل المطر-
2- ترطيب الملابس ... فالمقاعد مبللة , وقد تجد احدى سلات القمامة جالسة على احد المقاعد ... فهي تقوم مقام "السطل" لتجميع الماء بدلاً من ان يضيع هدراً.
3- التزلج على الارضية ... هذا امر ممتع حقاً , والتجريب مجاني !!!
4- ان كانت المحاضرة مسائية , استعد لنقل المحاضرة الى قاعة اخرى فالكهرباء مقطوعة هنا, فيضيع الوقت وانت تمشي وراء الدكتور والطلاب بالبحث عن هذه القاعة ذات الانارة الجيدة , وما ان تصلوا اليها , يأتي دكتور آخر ويقول : لقيتها قبلكم , روحوا دوروا ع قاعة ثانية.

في البوليتكنك ... تكون بطل قصة " طالب في بلاد العجائب" ... فيلم 3D ... وبدون ما تدفع 8 دنانير!!!

وما خفي أعظم!!!


* مرة صاحبي قلي : " كليتنا ... زي المرة اللي ما الها زلمة يشكمها ... بتعمل شو ما بدها بدون ما تشاور"

قصة مثل ... يا فرحة ما تمت

سلام ٌ عليكم,
ما بعرف اذا اشتقتولي أو لا...

المهم , انا عندي كمشة بوستات كنت محضرهم ببالي لآكتبهم... بس ما فضيت

قصة" يافرحة ماتمت" ... قصة طول انتظاري لقرار الجامعة بتحويل تخصصي ... وانه واخيراً وافقولي ع الانتقال وصرت هندسة مدنية"طرق وجسور"

لكن حولوني بعد ما طلعت روحي ونشفولي ريقي...

المفروض انه يطلع القرار "بالموافقة او الرفض" لكل الطلاب اللي قدموا قبل السحب والاضافة
ع اساس انه نعمل اجراءات النقل , وناخد رقم جديد وهوية جديدة ويعادلولنا المواد ... حتى انه بالسحب والاضافة نسجل ع راحتنا مثل باقي البشر.

لكن الجامعة حبت تعمل تكسر الروتين هالمرة ... وضلت تاخدنا وتجيبنا لفترة السحب والاضافة
واخيرا ... بتاني يوم من السحب والاضافة طلعت النتائج ...

واسمي كان مكتوب مع الاسماء المقبولة بتحويل التخصص
" احمد محمد حسين المحروق ... التخصص القديم: هـ. الطاقة الكهربائية .... التخصص الجديد:هـ. الطرق والجسور"

وعن جد ... فرحت فرح مش طبيعي ... لأنه كنت حاسس الدنيا مسكرة بوجهي ,,, اني رح اضل بتخصص ما بحبه طول عمري.

ورحت اراجع مسجلتي "الست سمر" ... (سيدة قمة في الاخلاق والتعامل ... يعني هي الشغلة الوحيدة اللي بندم اني حولت مشانها لآنها جدا ساعدتني)
وقالتلي انه اراجعها الاسبوع اللي بعد السحب والاضافة لآنه هيك الاوامر
(لانه الجامعة ما بتقدر تشغل برنامجين بنفس الوقت للتسجيل وللسحب والاضافة)... بس مع هيك ضليت صامد ... وكل يوم اداوم من الصبح عندها ... كنت خايف الجامعة تغير رأيها بأي لحظة ويروح علي التحويل.

المهم ... اجا اليوم الموعود ... الاحد (21-2-2010)
كنت من الساعة 8 واقف ع الشبابيك تبعون التسجيل ... كنت تاني واحد
ع ال 8 وشوي (بعد وتلت) فتحوا هالشبابيك
وقلتلهم انه طلعلي تحويل ... الخ ... قالولي جيب وصل لنطلعلك كشف علامات ... قلتهم مطلعه (كنت مطلع بالعطلة استعداد يعني)
قالولي صوره وخلي نسخة عندك ... (كنت كمان مصوره)
راحوا اخدوه مني ... واعطوني ورقة بدي اوقعها من كم مسؤول بالجامعة ... ويا الله قديش طلع عنا مسائييل بهالجامعة
جمعت فوق ال 30 توقيع ... اروح من واحد لواحد ... ومن مبنى لمبنى (اول مرة بحس الكلية كبيرة) .. واللي طالع .. واللي لسة ما داومش ... واللي اترك الورقة وارجع بعد نص ساعة
المهم بعد ما جمعتهم ... صارت الساعة قريب ال ال 12 الضهر...
رجعت لعند الست سمر (مسجلة الكهربا) ... وقعتلي آخر توقيع ... وبعتت ملفي لمسجلتي الجديدة لحتى تعطيني رقم جديد واصير مدني.

انا كنت مفكر انه خلص ... انا هيك انتهت القصة.
رحت لعند مسجلتي الجديدة ... انا واقف ع الطابور وقدامي بنات ... ونازلة تصرخ وتعيط ... وتأفف ... "وهلق وقتك انتي؟؟" ... "شو بدك؟" ... " روح وما ترجعليش مرة تانية" ... انا قلت اكلنا هوا
هاي معصبة ومش شايفة حدا قدامها ... والله وصل دوري ... استقبلتني طبيعي وتعاملت معي عادي ... سمعت البنات بقولوا "لآنه شب يعني؟!" ... المهم اعطتني رقم جديد وقالتلي جيب من عند شباك 7 استمارة...
بقلها "استمارة شو؟؟؟" ... هي ولا عبرتني وقالت"اللي بعده"
انا رحت عند شباك 7 ... والناس متل النمل ع السكر
المهم ... وصل دوري ... قلتله للسكرتير بدي استمارة ... قاللي : استمارة شو؟
رحت شرحتله وضعي ... لعل وعسى عرف استمارة شو ... لآني انا مش عارف شو بدي اجيب.
والله واعطاني ورقة ... وبلشت اعبيها ورجعت لمسجلتي الجديدة...
هي اخدتها من هون .. ومزعتها ... وقالتلي " انتو ليش بتفهموش من اول مرة؟؟؟"
قلله بدي ورقة معادلة مواد!!!
-طيب هي لو انها قالتلي من البداية بدها معادلة مواد ... مش كان ريحتني من الاول؟؟" ...المهم انا طلعت الغلطان.
ورجعت لشباك 7 ... وجبت ورقة معادلة مواد ... وعبيتها واخدتها مني وكتبت عند "شروحات مسجل القسم" ... انا مافهمت شو كتبت لآنه خطها حلو ... بس انا ما بعرف اقرأ
المهم ... هلق بدي اروح اوقعه من شباك 7 ... وارجعلها ... وبعدين اروح ع قسم المدني ليعادلولي المواد..
واذ ... الساعة 1 ... استراحة القسم ... سكروا الشبابيك وانا قعدت استا.
مكتوب الاستراحة من ال (1 الى 2) ... صارت 2 ... 2:05 ... 2:10...2:15 فتحوا الشبابيك

والله وقعتها من شباك 7 ... ورجعت لمسجلتي الجديدة ... وبعدين طلعت ع قسم المدني
رحت ع سكرتيرة الرئيس ... اخدت طب المعادلة مني وقالتلي ارجع بعد ساعة .. واكتب ع ورقة بيضا المواد اللي بدك تسجلها..

انا قلت لحالي ... واخيراً ... انا خلصت وصرت مدني ... ورح اسجل براحتي
طلعت ع شغلة حاسبينها علينا مختبر انترنت .... لصحلي جهاز ... فتحت ع جريدة المواد لاشوف شوبدي اسجل
كل المواد اللي بدي ياها مسكرة ... يعني رح اسجل 0 ساعة.
بس قلت لحالي .. انا حالة طارئة , اكيد رح يسجلولي شو ما بدي لآني طالب منتقل وما لحقت السحب والاضافة.
سجلت المواد ورجعت بعد ساعة
كانت الساعة 3 ونص ... بس السكرتيرة , واللي دوامها مفروض يخلص عال 5 ... روحت ع بيتها.
اضطريت ادخل عند رئيس قسمي الجديد بدون ما تحكيله السكرتيرة
دقيت ودخلت ... كام بالبداية منيح معي
بس لما شاف الورقة بالمواد اللي بدي اسجلها ... قاللي وهو معصب : ليش تحول؟ مش عارف انه ما عناش وسع؟؟؟
والمدني مش ناقص طلاب ... ويعني كان ترحيب حلو بأني انتقلت لعنده.
المهم كتبلي ... بأنه يرجى تسجيل المواد المطلوبة حسب الشواغر.
وشواغر مافي ...
رجعت لعند مسجلتي عشان تسجللي ... وقدمتلها الورقة ... قالتلي حسب الشواغر ... يعني ما بقدر افتحلك شعب
مع انه قدامي في طلاب معهم فيتامين "واو" ... وانفتحتلهم شعب وسجلوا بدون ما يلفوا لفلتي هاي.

المهم الاخت حبت تساعدني ... وبحبشت ولاقت كم شعبة مفتوحة
وطلع معها الجدول كالتالي... مادة "ن ر" 8-9:30 ... ومادة "ح ث خ" 6-7 بالليل ... ومادة ح ث خ "4-5" المسا ... ومادة "ن ر" 2:30
قالتلي : اثبتلك ؟؟؟
كنت بدي احكليلها ... "طيب قولي بيبسي" ... بس خفت تضربني
قلتلها شكراً ... ما تسجليلي!!
وضليت رايح جاي من المسجل العام ,,, لعندها للقسم لحد ما صارت الساعة 4 وسكروا شبابيكهم ...
وانا صرت مدني ب 0 ساعة ... والدوام مبلش
والسحب والاضافة خلصت :(

تاني يوم من الصبح... كنت انا ومجموعة طلاب متأهبين عند قسم التسجيل ... فتحت مسجلتي الجديدة شباكها وقالت " يا فتاح يا عليم ... شو بدكم من الصبح ... ارجعوا ع ال9"


_______________________________________________________________

بريك ... بعرف انكم زهقتوا من هالتفاصيل ... بس هيك هي قصصي ... معتة
_______________________________________________________________

والله راحوا ... بس انا ضليت واقف ... حتى ما يروح دوري ...
وصارت 9 الا شوي ورجعت فتحت شباكها ... وسجلتلي مواد ... مش كتير بدي ياها لكن احسن من الجدول اللي كانت بدها تسجللي ياه قبل

17 ساعة ... كلهم "ن ر" ... ماعدا مادة "ح ث خ" من ال 6-7 بالليل
وافقناعلى هالجدول وسجلت كل اشي

ولما رحت ادفع ... عملت تحديد رسوم ... ولا لازم ادفع امتحانات المستوى من جديد ... رحت اراجع مسجلتي تبعت المدني ... قال بعينك الله ... ادفعهم هلق , لاني ما بقدر اساعدك .. لانه معادلة المواد ماخلصت

"معادلة المواد ما خلصت ... طيب كيف سجلتيلي؟؟؟ " هاد ببالي حكيته
شافتني مسجلت القديمة الست سمر ... ووقعتلي اني ماخد امتحانات المستوى ومش لازم ادفعهم
والفعل ... ما دفعتهم

_______________________________________________

القصصة مملة ... اسف ع الاطالة.
_______________________________________________

واخيرا طلعت معادلة المواد ... وعادلولي 61 ساعة من اصل 64 ... عادلولي مادة "هندسة كهربائية" بدل مواد الكهربة اللي اخدتها

المفاجأة ,,, انه سجلولي مادة "هندسة كهربائية" ... يعني سجلولي مادة وعادلوها؟؟
ان شالله الاحد بدي اراجعهم ,, لعل وعسى حطولي مادة جديدة بدالها... مع اني ما اظن يخدموني !!!




ودمتم بخير
____________________________

اسف ع الاطلة

في انتظار نتائج التوجيهي

من المعروف ان العديد من طلاب الثانوية العامة - التوجيهي - قد استكملوا متطلبات النجاح والالتحاق بالجامعات في هذه الدورة الشتوية , وهم ينتظرون صدور النتائج والاوراق الثبوتية لتقديم طلبات الالتحاق - التنافس والموازي - ... وصدرو نتائج القبول تحتاج على الاقل اسبوعين من تاريخ اعلان نتائج الثانوية العامة ... ومن بعد القبول هناك فترة امتحانات المستوى
وحتى الآن لم تصدر هذه النتائج في حين ان بعض الجامعات الاردنية قد بدأت بالتدرس من 31/1/2010 ...
فهل سيدخل هؤلاء الطلاب الى جامعة في فترة امتحانات الفيرست؟؟؟

اقلام اعجبتني ... انا والبوليتكنك

الى كل من لا يعرف البوليتكنك بداية ...
" كلية الهندسة التكنولوجية" احدى كليات جامعة البلقاء التطبيقية , تدرس التخصصات الهندسية الخاصة والتطبيقية ...
ولتعرفوا اكثر عن معاناة طلبتها ... اليكم الابيات التالية

بقلم : عبدالله مقدادي
- خريج سابق-

_______________________________

إلى معذبتي التي عانيت فيها خمسة أعوام من هذا العمر القصير
إلى كلية الهندسة التكنولوجية .. " البوليتكنك" .. مع الألم والحسرة
وإلى كل الطلبة الذين نهلوا منها .. من تخرج منهم .. ومن ينتظر
أهدي هذه الكلمات
:)


أفــنـيــتُ فـيـهـا عـمـراً بــالــدراســاتِ .. فـاخـتـلَّ عـقـلي وانـهارتْ عـلامـاتي

ولا تـــزالُ تــلاحــقــنـي مــصـائــبُــهــا .. كـــأنـَّـهـا لـــعــنــةٌ أو فـــوجُ لــعــنــاتِ

يـا للــتـعـاسـةِ كـم ضـاقـتْ بـنـا ذرعـاً .. دربُ الـدراسـةِ فـي أشـبـاهِ قــاعــاتِ

مـحـاضــراتٌ قــد اقــتـصـرتْ وظـائِـفُهـا .. أخـذَ الـغـيـاب ِ وتـأديــةَ امــتــحـانــاتِ

لـلــه دَر ُّ عـــلامـــات ٍ يــحـــاصِـــرُهـــا .. صـوتُ الـعـشـائـر ِ أو سحرُ الـبُـنَـيَّـاتِ

إذا هـمـمـتَ لـتـسـجـيـل ٍ فـلا عـجـبـاً .. إذا رجــعـتَ لـعـصـر ِ الـدَّيـْــنَــصــوراتِ

فـيـه الـمـعـانـاةُ شيءٌ من قـداسـتـها .. لا بُــدَّ لا بُــدَّ مِــنْ طُـهْـر ِ الــمُـعـانــاةِ

حـتـى الـصـبـابـةُ أدتْ هـجـرةً مـنـهـــا .. كــلُّ الـفـئـاتِ تُـعـانــي بـالــعــلاقــاتِ

يـسـتـقـبـلـونَ غـرامـاً مـن بـراءتــهــم .. فــيـخــرجـــونَ ثِــقــالاً بــالــجـراحـاتِ

هـيـهاتَ هـيـهاتَ أن يستبشروا خيـراً .. حتى يـعـود عـلـيـهـم كـَـوْمُ خَـيـبـاتِ

يـسـتـأذنــونَ عـمـيـداً عَـلَّ يـنـصـفُهم .. فَـــيُــصْـدمـون بـــأشـــلاءِ الـــقــراراتِ

حتى الـزهـورُ تـعـاني في حــدائـقهـا .. حتى الشجيـراتُ والأعشابُ بـالـذاتِ

يـا طـالـبَ الـعـزِّ في قـاعـاتِ خـيـبـتنا .. إنــــي أراكَ جــديــراً بــــالـحـمــاقــاتِ

هلا أفـقتَ من الأحـلام ِ؟ ، قد عـفنـا .. حلمَ التـفـاؤلِ ، يـسـبـقُ كـلَّ مـأساةِ

كـفـاكَ حمـقاً ، ففي التاريخ ِ تـأكيـدٌ .. على التشاؤمِ ، فـالماضي كما الآتي

أفــنـيـتُ فـيـهـا عـمـراً ضـاعَ أجـمـلُـهُ .. بـيـن الــوعـودِ وتـحـطـيـم ِ الـمـهـاراتِ

والـيـومَ أعــلـنُ أن دراسـتـي فــيـهــا .. كـانـتْ لَـعَـمْـرُكَ بـعـضاً مِـنْ تَـياساتي


عبد الله مقدادي

مشاكل الشباب ... جذورها اهلهم , مدرستهم , المجتمع

د. رغدة ميشيل عرنكي
دكتوراة / علم النفس التربوي

مَن منا لم ُيعانِ مشكلة أو أكثر في حياته،وهذا أمُرُعادي في مجتمع زادت أعباؤه ومتطلباته. لكن المشكلة الحقيقية، والتي تحتاج منا إلى البحث والدراسة؛ هي أن ندرك ما هي مشكلتنا لنتمكن من تحديدها بالضبط، وبالتالي التعامل معها
تبدأ هذه المشكلة عادة عندما يكمل الطالب أو الطالبة مرحلة الدراسة الثانوية ليقف بعدها عند مفترق طرق، غير واضح المعالم؛ فتارة يريد هذا التخصص وتارة يريد ذاك، هذه الجامعة أو تلك، ثم يعود لوالديه ليحددا له الأنسب لدراسته بغض النظر عن رغبته
لوعدنا بهؤلاء الطلبة إلى مرحلة الطفولة المبكرة سنجد الفرصة لم تسنح لأغلبهم في تحمل مسؤولية إدارة شؤونهم الخاصة بحجة حرص الأهل على إدارة ورعاية شؤون أطفالهم على افتراض أنهم لازالوا صغاراً، وهذ1 يتطلب منهم أعباء لا يستطيعون تحملها الآن، فلا زالوا غير قادرين على اختيار الألوان التي يفضلونها لملابسهم، أو الألعاب التي تناسب اهتماماتهم وميولهم. وإذا تحدثوا فلا وزن لكلامهم أو قيمة، فيتم منعهم في أغلب الأحيان من التعبير عن أنفسهم، بحجة ضيق وقت الأهل، أو الإزعاج الذي يمكن ان يسببه حديث الأطفال، مما يولّد لدى الأطفال الإحساس بالعجز وبالتالي الكفّ عن أداء أية مهمة لاحقاً مهما كانت بسيطة
وعندما نتحدث عن المسؤوليات التي يجب أن يتحملها الأطفال في سن مبكرة، لا نعني تلك المسؤوليات المطلوب من الكبار القيام بها، إنما يجب القيام بالمهمات التي تتناسب وإمكاناتهم العمرية والعقلية كأن نستمع لهم، ونقدّر إنجازاتهم مهما كانت صغيرة، ونشجعهم على تجديد المحاولة لو فشلوا في المرة الأولى، والتباحث معهم لتحديد أسباب الفشل، ووضع بدائل متنوعة لحل المشكلة، وعدم التقيد بحل واحد أو بديل واحد للحل
تمتاز مرحلة الطفولة بسعة الخيال لدى الأطفال، يقومون فيها بالتفكير والتأمل، ويعبرون فيها عن أفكارهم بطريقتهم الخاصة؛ فيتحدثون إلى أنفسهم بحوارات مطوّلة يجدون فيها المتعة والتسلية، لكن للأسف نجد الأهل يسخِرون من طريقة تفكيرهم، والتي هي في الواقع تعمل على تطوير تفكيرهم الإبداعي، ونموهم العقلي- لو تُركِ فيها المجال لخيالهم أن ينطلق بحرية دون قيود، هذه القيود التي تجعل من الأطفال صوراً جامدة لآبائهم أو أمهاتهم، ليس لهم هوية أو شخصية يعبرون فيها عن أنفسهم
وإذا نظرنا إلى مدارسنا من ناحية أخرى سنجد أنها تستخدم الأساليب التعليمية المتخمة التي ترتكز على الحفظ والتلقين، وتبتعد عن الأساليب التي تشجع على البحث والتفكير، وإذا حاول الطالب مناقشة الأستاذ في بعض القضايا سنجد هذا الأستاذ يقوم بقمع عمليات التفكير لدى الطالب ليتمكن من إنهاء المقرر في الموعد المحدد، وبنفس الوقت يحافظ على الهدوء داخل غرفة الصف، وتكون النتيجة إنتاج جيل من الخريجين ذوي القدرة العالية على الحفظ لا التفكير.
إن ما يحدث في الواقع مع استخدام مثل هذه الأساليب التعليمية هو أننا لم نضع الطلبة أمام مشكلات يمكنهم حلها؛ فلم يمروا بخبرة حل المشكلات، وبالتالي لن يتمكنوا من حل المشكلات المشابهة فيما بعد.
وتقوم الطرق الحديثة في التعليم على تطوير التفكير من خلال وضع مشكلات دراسية أمام الطلبة، وتدريبهم للتعامل معها، ويدعى هذا النوع من التفكير "التعلم المستند إلى المشكلة
" Problem Based Learning (PBL)
ويمتاز هذا النوع من التعلم بعدد من المميزات، هي

يعتمد المشكلات في تحديد المنهاج، حيث يتطرق المنهاج لعدد من المشكلات، ليتمكن الطلبة من التعامل معها وحلها، وفي هذا المنهاج لا يتم اختبار مهارات إنما تطوير مهارات

تُبنى المشكلات بشكل ضعيف لتتاح الفرصة أمام الطلبة للبحث عن بدائل وليس بديل واحد للحل، وعندها الحل يتغير بحسب المعطيات المتوافرة


الطلبة يجمعون المعلومات من مصادر المعرفة المتنوعة، ويحلون المشكلة، أما المعلمون فموجهون فقط

وقد بدأ استخدام هذا الأسلوب في التعلم في المدارس الطبية، حيث يتعرض الطلبة لمشكلات في الميدان الحقيقي الذي يتعاملون معه، والمطلوب منهم التعامل مع هذه القضايا ، وإيجاد الحلول الناجعة لها، ومن ثم استخدامها في المناهج المختلفة لإكساب الطلبة المهارة والمعرفة الضرورية في حل المشكلات المتعلقة بالمنهاج، وتوظيف هذه المعلومات في التعامل مع مشكلاتهم الخاصة. وفي هذه الطريقة يتم تقسيم الصف إلى مجموعات؛ تتكون كل مجموعة من (5-7) طلاب يناقشون المشكلة فيما بينهم قبل الوصول إلى الحل المطلوب
ويقوم التعلم المستند إلى حلَِ المشكلة على عدة مراحل، هي

تحديد المشكلة وتعريفها، وتكون المشكلة موجودة في المنهاج حيث يتم مناقشتها مع الطلبة، وكأنهم أمام مشكلة حقيقية بحاجة للحل؛ فيسأل الطلبة أنفسهم مجموعة من الأسئلة المتعلقة بالمادة، مثل
ما الذي نعرفه حول هذه المشكلة (المادة التعليمية
ما الذي نحتاج لمعرفته للوصول لحل هذه المشكلة
ما المصادر التي سنستخدمها للوصول إلى حل مقترح أو فرضية للحل
من أين سنحصل على مصادر المعلومات
هل هذه المعلومات ستكون مفيدة في الحل
ويمكن لكل طالب في المجموعة أن يسأل نفسه حول ما يمكن تقديمه لمجموعته، وكيف ستستفيد المجموعة من المعلومات المقدمة لحل هذه المشكلة

الوصول إلى مصادر المعرفة، وتقييمها واستخدامها، وقد تكون هذه المصادر الكترونية أو مطبوعة أو مصادر بشرية، وبعد الوصول لتلك المصادر يتم تقييمها لتحديد مدى موثوقيتها، وعند استخدام المعلومات يجب تحديد قيمة هذه المصادر

تحليل المعلومات، قد تحتاج بعض المعلومات إلى إعادة صياغة، وقد يتم وضع عدة حلول إفتراضية

تنفيذ الحل، وفي كل مرحلة يتم إعادة النظر في المعلومات المتوافرة، وبناءً عليه يتم تنظيمها وتعديلها

التأمل، بعد حل المشكلة يقوم الطلبة بالتأمل بما تم إنجازه من خلال عدد من الأسئلة، مثل
هل سأُنجز ما قمت به بشكل مختلف في المرة القادمة
هل يمكن أن تظهر حلول جديدة
هل توجد طرق أخرى يمكن استخدامها تجعل الحل أسهل في المرة القادمة
هل يمكن توظيف ما تم الوصول إلية في حل مشكلات أخرى مشابهة

مما سبق يتبين أهمية دور كل من الأسرة والمدرسة في تطوير قدرات وإمكانات الطلبة لإنتاج أشخاص مفكرين قادرين على القيام بواجباتهم، وتحمل مسؤولياتهم لتطوير مجتمع قادر على مواكبة كل جديد في عالم المعرفة، لأن الأساليب التقليدية التي تعتمد على مصدر وحيد للمعرفة يقدمه المعلم، والطالب متلقياً لهذه المعرفة دون مشاركة في العملية التعليمية لا تستطيع أن تواكب التطورات المتسارعة في عالم المعرفة الحديث

محتار كتير

موضوعي اليوم قديم جديد ... وهو التخصص !!!

مش عارف ليش انا هالموضوع قاهرني كتير ...
من بعد ما ارجعت واقتنعت بالكهربة ... رجعت حنيت للتحويل ، وقررت اقدم طلب تجويل بنفس الجامعة ... هندسة مدنية|طرق وجسور ...

انا متشجع لهالموضوع لآنه اله عدة مزايا ...
اهمها حلو وقريب من العمارة ... ممتاز كتير لو كملت معه ماستر "ماركتنج او مانجمنت"... ورح يرفع معدلي بالجامعة ... وكمان 6 صحاب مقربين الي - واللي رح نعمل مشروعنا سوا -تخصصهم مدني !!!
وشجعوني ع هالاختيار ... لآنه اكيد ممكن نكبر شغلنا سوا ... ونعمل شركة النا ... واحلام كتيرة تانية

لكن السيئة الوحيدة اله .. انه رح يروح علي 13 ساعة ... يعني من 68 ساعة رح ارجع 55 ... وهالاشي كمان قاهرني ... مش هاين علي اضيعهم :"(

صاحبي اسلام قللي ... تضيع فصل , وتنجح بإشي بتحبه ... احسن من تضييع 4 سنين بإشي بتكرهه !!!

شو قولكم؟
انا ان شالله رح اقدم الطلب ... ومنشوف شو رح يصير , لآنه هاد آخر فصل ممكن افكر فيه ... بعدها حرام احول , لآني بصير سنة تالتة !!!

محاولة

متل ما عودتكم ,, انا متعدد المواهب , ومفاجآتي كتيرة !!!

مش كتيرة كتير يعني ..!!

المهم , في كم بيت شعر من تأليفي , بتمنى لو تعطوني رأيكم فيه :

___________________________________________

سرّ الهوى في سرّ عينيها ... ونار الجوى وقودها مقلتيها

تردي وردتي اشواق النوى ... فتحييها نسمة ٌ من لديها

وتحييني وتحيي الحبّ فيّ ... من بعد موتي من على وجنتيها

تقيّدني بماء نور سرى ... من بين عتمة كحلتيها

تخلصني بطيف طرفٍ جرى ... بقلب قلب ٍ ارتدّ اليها

صوت السما من عُلا عالٍ دعا ... بارك وزد عشقه له عليها

___________________________________________
____________________________
وبهديكم هالاغنية ... لهاني متواسي

عندك فكرة ؟؟ ادخل هون

مرحبا ..

متل ما بتعرفوا ... انا بحاول اشتغل بوقت الفراغ اللي عندي

بس للآسف , مش عم بلاقي شغلة منيحة , ترضي غروري , او ما بيقبلوا لآحد الاسباب ...

المهم , طقت براسي شغلة , انه ليه ما اعمل مع صحابي مشروعنا الخاص , ما حدا بيتحكم فينا , منداوم ع كيفنا , وفيه مردود منيح النا وما حدا يشاركنا فيه ...

بالفعل, اتصلت باصحابي وطلعوا هما كمان عم بفكروا بهالقصة , وكانوا بدهم يخبروني بس انا سبقتهم - القلوب عند بعض -

المهم , فكرنا بأفكار كتيرة ... ومنيحة ... ما بدها وقت كتير , واحنا كتار منتقاسم الشغل , وكل واحد عنده مواهبه اللي رح تساعدنا كتير !!!

بس لسة الافكار قيد المناقشة ...

انا مش رح احكيلكم شو الافكار هلق ... خليها بوقتها ...

لكن بدي منكم انكم تساعدونا ,,, اذا عندكم افكار لمشاريع صغيرة مناسبة النا ... ما بدها راس مال كبير ,, ومردودها لا بأس فيه!!

ياريت تكتبولي ياها هون

او ... تبعتوها بأيميل خاص ع

aalmahrouq@gmail.com

ولكم جزيل الشكر