06‏/12‏/2010

وما أدراك ما البوليتكنك 5 .. قنبلة الموسم



مقسوم لا تاكل .. وصحيح لا تقسم .. وكل واشبع!!

هذه هي الاستراتيجية الجديدة التي عاملتنا بها جامعة البلقاء التطبيقية لنتم بها تسجيلنا لهذا الفصل , فقد قامت ببعض التعديلات البسيطة على نظام التسجيل .. بعض القوانين الجديدة التي تساعد الطلاب في أزمة شح المواد الدراسية .

اولى هذه القوانين هو ان طرح المواد يتم اعتماداً على الخطة الاسترشادية , أي أن مواد الفصل الاول تطرح فقط بالفصل الاول ومواد الفصل الثاني تطرح بالفصل الثاني .

أما ثاني هذه القوانين , هو ان التسجيل أصبح بالتدرج من المستويات الادنى فالاعلى مع عدم السماح للطلبة بتسجيل مواد مستويات عليا حتى ولو انهم قد اتموا المتطلبات للمساق , فمثلا انا اعتبر طالب مستوى ثالثة , لكن المواد التي احتاجها للفصل القادم تكون من مستوى رابعة وخامسة
, ومن مستوى ثالثة فصل ثاني لم اجد سوى تحليل انشائي 2 , ومع هذا لم أتمكن من تسجيل المواد التي احتاجها.
وللعلم , فقد كان التسجيل سابقاً يتم بالعكس , من المستويات الأعلى وحتى الادنى , ولذلك لم نتمكن من تسجيل بعض المواد التي هي من مستوياتنا لآن المستويات الاعلى منا كانت تسجلها حينها , والآن .. اصبحت المستويات الادنى هي التي تسبقنا في عملية التسجيل .. وكنا نحن -دفعة 2008 - الضحية لهذه القرارات.


الأمر المضحك بالموضوع هو أنّا لازلنا نعتمد نظام الساعات , الذي يمنح الطلبة الحرية في اختيار المواد , وكثافتها بالفصل الواحد .. وانها تتيح للطلبة اختصار الوقت , بأن يزيدوا العبء الدراسي لديهم.
والان .. نحن مقيدون بالمواد التي تطرح , وبالخطة الاسترشادية .. ومقيدون بأن نبقى على الاقل 5 سنوات كاملة هنا , مع انه كان بالامكان التخرج ب4 سنوات!!

اما قنبلة الموسم , والتي تنكرها الجامعة هي انه الجامعة تبنت نهجاً "اتيكيتياً" , وذلك بأن سمحت للفتيات بالتسجيل اولاً ومن ثم سمحت لكلا الجنسين من التسجيل.
حيث انه وفي "الساعة والنصف" الاولى من التسجيل من يوم السبت وحتى الآن .. واجه جميع الطلاب الذكور مشاكل في الدخول للنظام , في حين ان الطالبات كن قد سجلن في ه
ذه الفترة .. وفي يوم التسجيل الاول كانت تظهر هذه الرسائل للطلاب!!



28‏/10‏/2010

نصب وسرقة ... بوضح النهار !!


مرحبا يا جماعة , الحقيقة من شوي كنت قاعد مع بيت خالي - جايين من الشام - , ومن سيرة لسيرة .. حكوا كم قصة نصب وسرقة .. قصتين صاروا بحارتهم .. بعز الظهر .. وعلى عيون العالم !!


الاولى .. (دمشق)
خالي كان ماشي وراجع ع بيتهم , لقى قدام بيت جيرانهم شاحنة عم تحمل عفش .. سأل الشغيلة , قالوله والله جارك عم يرحل !
استغرب خالي .. انه جيران .. لكن خلص . صدق ومشي ... لكن طلعوا هدول حرمية عم يسرقوا البيت بنص النهار قدام العالم !!!


الثانية .. (دمشق)

بحارة بيت خالي فاتح لحام .. ادن الضهر كأنه وراح صاحب المحل يصلي وترك ابنه الصغير بالمحل .. الاب راح من هون , اجت شاحنة من هون ودخلوا عند الولد وقالوله .. هاد المحل مخالف .. ولازم نصادر تلاجة اللحمة .. حملّوا اللحمات واعطوا الولد ورقة وكذا وحكوله خلي ابوك يراجع التموين .. وطلعوا لا تموين ولا بطيخ ... حرامية !!!


الثالثة ... ( الرياض)

صاحب زوج خالتي كان راجع من الصلاة .. ولقى واحد حامل صندوق مصاري المحاسب بالشارع .. ومر من جنبه .. بس ما عطاه اهتمام .. رجع ع محله .. لقاه هاد صندوقه مخلوع ومسروق ... بعز النهار !!!


الرابعة ... (ما انتبهت وين)


قال واحد كان بالقطار .. كان معه مبلغ من المصاري , حكى لواحد جنبه .. شو رأيك تشتريهم بنصهم ؟
قلله ليه ؟
قاله لآنهم هدلون مصاري مزورة !!
التاني هداك .. اخدهم وفحصهم .. وكذا .. لقاهم مو مبينين انهم مزورين بالمرة .. بالاخير وافق واشتراهم بنص المبلغ !!

نزل الاول من القطار وبلغ الشرطة .. قلهم ضاعت شنتايتي (شنطتي) بالقطار اللي رايح ع كذا.. نوعها كذا .. ولونها كذا ..فيها مبلغ كذا

وبالفعل .. الشرطة وقفت القطار ولقت الشنتاية .. سألوا الزلمة اللي اشتراها .. هي الك ؟!
صار يحلفلهم .. لا والله مو الي .. لآنه خاف يروح فيها بما انه المصاري مزورين .. وبالفعل .. الشرطة رجعت الشنطة لصاحبها .. وهيك اخد المصاري ونصهم كمان !!!

بتمنى ما اكون تقلت دم عليكم .. تحياتي :)

27‏/09‏/2010

الحرب على "أمنية" .. ولعنة الفستق!!

أ.محروق نيوز - عمّان (:

شهدت شركة الاتصالات (أمنية) في الآونة الاخيرة حرباً" فستقية" من عدة اطراف ؛ تجار وشركات منافسة .
لفتت انتباهي البارحة عدة لافتات تقول (لانبيع خطوط امنية) معلقة على واجهات محلات بيع الموبايلات , كنت وقتها في احدى مجمعات الباصات للعودة من الجامعة , استغربت ذلك .. لكن لاحظت اللون (الفستقي) -لون امنية- مخططاً حول اللافتات , فقلت ربما يكون نوعاً من الدعاية لأمنية :)
لكني تفاجأت اليوم بازدياد عدد المحلات التي تعلق هذه اللافتة .. دخلت على احد المحلات وسألته عن سبب تعليق اللافتة , فقال لي: "لا نبيع خطوط امنية .. وبس" .. وكانت الكشرة واضحة جداً

دخلت على محل آخر .. وسألت الشاب الموجود بالمحل عن سبب تعليق هذه اللافتات , فأخبرني أن "شركة أمنية عاملة touch مع اصحاب المحلات" .. فطلبت منه المزيد من التفاصيل .. الا انه أبى ذلك , وقال ان اصحاب المحلات لا يريدون ان يعلنوا السبب الحقيقي!!
وقبل ان يكشر .. طلبت منه تصوير اللافتة المعلقة على واجهة المحل , وها هي الصورة:




على صعيد آخر , قامت احدى شركات الاتصال المنافسة بنشر اعلان على مواقع الانترنت , الاعلان عن تطبيقات Apple , وقد صورت شركة امنية على شكل فستق سوداني.. الشكل القريب من شعار شركة امنية.

______________________________________

ملاحظة:

وأخيراً .. نزلت الصورة :)

وما ادراك مالبوليتكنتك .. الجزء الرابع (واشياء اخرى)

اكي انتو من زمان متوقعين اكتب اشي عن الجامعة مع بداية الدوام .. انه شو اكتر نهفة عملتها فينا .. بس تأخرت شوي لآعمل سسبنس (لول)

بصراحة .. ماعملت الجامعة فينا اي شغلة هالمرة ... غير انها شوي غلبتنا.. بـ 20 ايلول (يوم الاثنين الماضي) ... كان يوم السحب والاضافة عندي .. وعلى حظنا , سيرفر الجامعة ما بعرف شو ماله .. مش راضي يفتح .. اللي بقول خربان .. واللي بقول سخنان .. واللي بقول فقع !!
ضلينا طول اليوم واحنا ع النت ... منسبسب انا والشباب ع الجامعة والتسجيل

بالاخر .. و عال12 بالليل .. زبط الموقع .. وزبطت جدولي .. 18 ساعة ( 3 مواد ح ث خ) .. و (3 ن ر)
:)

هلق هاد التعطيل يعتبر عادي .. كل فصل على حظي بيخرب الموقع :)

اما النهفة .. صارت مبارح الاحد
دخلت ع قاعة 1712 .. على اساس علي فيها هندسة نقل , بعد شوي بلاقي صحابي من التخصص القديم (الكهرباء) موجودين .. طيب شو بتعملوا هون .. واحد عنده اجهزة كهربائية .. ووالتاني الكترونيات القدرة .. بقلهم اكيد انتو مخربطين .. كل واحد طلع جدوله (اللي ممنوع تطبع غيره ولمرة واحدة) .. كلنا بنفس القاعة .. طلعوا حاطين 3 مواد بقاعة وحدة

هاي ما كانت المرة الوحيدة .. اليوم كان علي (نيوميركال) دخلت ع القاعة .. طلع فيها طلاب عليهم (فلويد ) .. وطلاب عليهم (تصميم رصفة) .. يعني كمان 3 مواد بقاعة وحدة
زكروني بأيام الكتاب .. لما كان ابن 6 سنين وال10 سنين يدرسوا بصف واحد :)

قولوا مش مشكلة .. رحنا ع التسجيل .. وطلعوا مغيرين القاعات بدون ما يخبروا حدا .. حتى الدكاترة مش عارفين وين صاروا قاعاتهم:)

___________________


بتتذكروا السنة الماضية لما خبرتكم عن مبنى 17؟؟
هاد يعتبر متل (المعلم الحضاري الوحيد عنا) .. بنوه بدعم من اليابان :)
المهم .. وانا بنهاية بسنة اولى فصل تاني .. بلشوا يبنوه عليه طابقين جداد .. قال عددنا زاد وبدهم قاعات ... مر الصيفي سنة اولى .. ومر الصيفي سنة تانية .. وبلشنا بالاول سنة تالتة ... ومازال المشروع تحت الانشاء ,, عم يعمروا فوق روسنا .. ويحفروا ويضربوا ومش عارف شو صرلهم سنتين عم يبنوا بهالطابقين ... قبالنا مصنع الببسي , بالفصل الاول سنة تانية (يعني بعد مشروع الطابقين) بلشوا يبنوا مبنى جديد , مدري كم طابق فيه .. خلصوه .. ودهنوه ازرق واحمر .. وصار بالخدمة عادي :)

دكتور عنا بيتخوت بقول .. العمال تبعون 17 .. بتداموا بداوموا معكم .. بتعطلوا , بعطلوا ... بتسجلوا مواد .. بسجلوا .. وحتى بالسحب .. بيسحبوا معكم :)

___________________

اهم اشي انا مبسوط منه .. اني بكون هلق قاطع 100 ساعة بالضبط :)
وضايلي سنتين وبخلص من هالقرف .. :)

بتمنى ما اكون قرفتكم معي :)

تحياتي

23‏/09‏/2010

ال tag الثقافي .. بلشنا نردنة


مع بداية الدوام والفصل الجديد .. ويادوبنا عم نقول بسم الله , كلفتني الصديقة المبدعة فرح عصام بهالواجب ... انه احكي شوي عن الكتب اللي بقرأها

لهيك .. شكرا فرح لآنك تذكرتيني بهالواجب :)

اول اشي بدي اخبركم شغلة ... انا قارئ سيء .. لهيك نوعاً ما لا اجيد الكتابة .. لآنه الواحد لازم يقرأ كتير ليكبر مخزونه ويقدر يعبر صح عن الاشياء يللي بباله :)

نبلش ..

اكتر مرحلة كنت اقرأ فيها هي بالطفولة .. وبحكم اني الاصغر .. فالقصص كانت جاهزة .. اخدها من اخوي او اختي
هلق قرأت قصص كتير .. بس الاسماء اللي عالقة ببالي
عقلة الاصبع .. المائدة السحرية .. الآميرة والبجع .. أليس في بلاد العجائب ( ماحبيتها وقتها لآنها كانت بالانجليزي وانا صغير) .. وقصص كتير تانية رايحة عن بالي هلق
بس في مجلات كتيرة كنت اقرأها .. ماجد و ميكي (كانت من اخوي ايام الكويت) .. وكنت اقرأ مجلة لونا .. ومجلة احمد ومجلة الرسام.

بالمدرسة .. كنا ع طول نستعار كتب بكل اسبوع كان لازم نستعير قصة أو كتاب ونلخصه.


الكتاب المشهورين اللي قرأت شوي من كتاباتهم .. وغصب عني - لآنه كان واجب بالمدرسة - ... هو طه حسين .. كتاب الايام الجزء الأول .. والصراحة اني ما حبيته كتير

أيام المدرسة كمان قرأت (قصص الانبياء) لابن كثير .. وقرأت (رجل لا يموت) .. كتاب عن الخضر عليه السلام

بعد التوجيهي .. اشتريت 3 روايات لآغاتا كرستي .. ولقيت الروايات حلوة
اكتر وحدة حبيتها كانت القاتل الخفي .. وكنت لوقتها مفكر اغاتا هي الافضل .. لكن اللي غيرلي هالفكرة هي "ربى حجازي" .. لآنها عارتني كتاب "شيفرة دافنشي" ..لدان براون
هي الرواية ممتعة جداً .. وع طول بتدهشني .. ولهيك قررت اكمل بقية سلسلة الروايات .. بس لما الاقي وقت :)

هي عملت الواجب اللي انطلب مني .. وان شالله اكون قدمت منيح !!

هلق دور اطلب من 3 انهم يعملوا الواجب ..

الأولى .. ربى حجازي

الثانية .. أم عمر

الثالثة.. وايت فريدم

07‏/09‏/2010

out of reach


مرحبا يا جماعة , عن جد كيف كنت عايش من دون انترنت زمان .. مابعرف!!

صرلي اسبوع تقريبا والنت مقطوع عندي بسبب الصيانة .. وكنت رح اطق .. وحاسس حالي رح انفجر
مش لاني كتير مقطوع عن العالم .. بس لآني كنت واعد عالم كتيرة بأني ابعتلها شغلات وما قدرت وتأخرت عليهم .. وكل ما انوي اروح ع شي كافيه يصير معي اشي وما اقدر

لهيك انا اعتذر من الكل اللي خذلتهم بهاي الفترة :)
تحياتي

28‏/08‏/2010

وما أدراك ما البوليتكنك؟؟ ... الجزء الثالث



مفاجآت كلية الهندسة التكنولوجية / البوليتكنك .. ما رح تنتهي أبداً
ورح تضلها .. تصدمنا وتصدمنا لنتخرج
وما بيخلى التخرج من صدمة عنيفة شوي منها ... القصة هالمرة لواحد تعرفت عليه جديد .. وهو صاحب صاحبي
الشب خريج كان ع الصيفي .. ما كان عليه غير يختم ب6 ساعات التدريب المقررة .. وبيتخرج .. هالشب حب انه يتميز عن الباقي . وما كذب خبر ... وطلع على احدى دول الخليج لياخد تدريب غير شكل .. وعمل تقرير عن الشغل اللي تدربه .. تقرير خيلة صراحة .. وبحق يعني يعطيه العافية على الشغل اللي اشتغله

والتدريب متل ما كتار بيعرفوا انه ما اله علامة .. بس ناجح راسب .. متل العلوم العسكرية .. وهيك مواد الكل بينجح فيها ..

بظنكم عرفتوا بقية الحكاية ... الجامعة رسبت هالطالب بالتدريب !!
مش بس لحاله .. أكتر من شي 12 طالب رسبوا بالتدريب والحجة قال انهم ناقلين تقارير التدريب من النت !!

هلق هم ما سكتوا .. وتدخل العميد بالقصة وقرر هو بذاته يشوف التقارير .. والنتيجة النهائية للاسبوع الجاي .. وان شالله تمشي الامور :)

الواحد ما بصدق يخلص من هالجامعة وهي عم تمسك فيه باسنانها قبل ايديها ..


الله يسترني من صدمة التخرج ع دوري :)

بتمنى ما اكون تقلت دم عليكم ... تقبلوا تحياتي


22‏/08‏/2010

TEST

مرحبا يا جماعة .. الحقيقة هاليومين ما عندي شي ينحكى
بس اجاني شغل بالتصميم .. يارب يزبط معي هالمرة :)

انا نزلت هالبوست بس لآتأكد انه البلوغر شغال او لآ .. لآنه الكل عم يقول انه عطلان هالكم يوم ... تحياتي

11‏/08‏/2010

عالم التدوين .. برمضان ... غير شكل


هالمرة ... وهالرمضان بعالم المدونات بالتحديد غير شكل !!!

بسبق صحفي لالي .. رح اطلعكم على سر ... :)

يوميات عائلة ابو مفلح .. فكرة تدوينية رمضانية جديدة مميزة!!
عبارة عن حلقات (يوميات نصية) .. تحاكي واقع للعائلة الاردنية البسيطة بشكل رائع .. انصحكم بمتابعتها قبيل وجبة السحور !! فهي وجبة لذيذة جداً

لينك يوميات ابو مفلح على الفيس بوك ... اضغط هنا
مدونة يوميات عائلة ابو مفلح ... اضغط هنا

الحلقة الاولى ستكون بإذن الله موجودة نهار الاربعاء .. الاول من رمضان .. 11-8-2010

لن أخبركم المزيد ... تابعوهم من بكرا

________________________________

تحديث
العائلة الكريمة - عائلة ابو مفلح - بدأت بالظهور .. لكي تتعرف على الشخصيات .. ادخل على صفحتهم على الفيس بوك .. أولى الحلقات ستكون اليوم .. بعد صلاة التراويح بإذن الله

10‏/08‏/2010

RamaDan KAriM





من بعد غياب طويل ... يا ريت تكونوا اشتقتولي :)
الفصل تقريباً خلص .. وضايل 7 ايام وبعطل :)
مع انه هالفصل كان تقيل دم علي .. وخصوصي مع الدكاترة .. بس كمان في ذكريات حلوة !!

واكيد ما بنسى قرصة النحلة لهلق .. وصار عندي فوبيا منها .. منكون قاعدين بالمحاضرة ما بلاقي والا نحلة بتحوم حولي .. والشباب صحابي بيضحكوا .. ود.نافذ بيسألنا شوفي ؟؟

المهم ... حبيت أعايد عليكم بكم صورة من تصميمي :)

___________________

هاي الصورة .. مادخلها برمضان .. بس صورتها وانا مروح من الجامعة .. كنت ناوي اكتب عنها موضوع .. بس ماعرفت !!

شو تعليقكم ع الموضوع ؟؟؟

تحياتي

23‏/07‏/2010

حدث في مثل هذا اليوم

احداث كثيرة حدثت في مثل هذا اليوم .. حروب وصراعات .. انقلابات عسكرية .. اكتشافات .. لن أطيل عليكم , الفيلم القصير سيفي بالغرض (من صنعي)!!







ملاحظة .. يمكن الصوت مش ملائم للفيديو .. بس هاد اللي زبط معي ... يارب يعجبكم :)

18‏/07‏/2010

وما أدراك ما البوليتكنك ؟؟!! الجزء 2

يا جماعة اشتقنالكم .. مو شوي .. كتير والله .. بس فترة امتحانات هلق :)

قبل كم يوم قررت انا وصاحبي "شهاب" انه ندرس لامتحان التحليل الانشائي .. للاسف وقت البريك تبعنا بيجي بحدود 2 ونص .. ومع انه لازم المكتبة (المكان الوحيد المكيف واللي مسموحلنا نقعد فيه) تسكر بوابها ع ال3 ... ما بدخلونا لآنه الموظفين المحترمين بيهربوا .. فقررنا نقعد بسكوير بالجامعة .. واحنا مركزين وعم نحل.. في حشرة عم تجنني .. كشيتها وانا مركز
ورجعت احل ... بعد شوي حسيت كأنه انا المحقق "توغوموري" ... وكونان ضربني بهديك الابرة .. قلت لشهاب وانا بصرخ : انقرصت !!

قمت وقفت .. قللي لآ ما في اشي .. انا نفسيا اعتقد اني ما انقرصت مع اني عم اتوجع .. بعد شوي راح قللي ما تتحرك .. وانا وقع قلبي وصار بين رجلي .. طلعت النحلة عم تعمل جولة ع رقبتي ... وما بعرف كيف شالها شهاب وضربها :)

المهم .. ورحنا ركض ع الوحدة الطبية العتيدة اللي عنا .. وانا بقله مافي امل الساعة 3 ... سكروا .. قللي لآ الاسعاف لازم يضله شغال (مفكر حاله بعده بالامارات) ... وصلنا لقينا بالباب مسكر .. رح دقه وفتح .. انا رجعلي الامل .. دخلنا لجوا العيادة بس طلعوا مسكرين الباب الداخلي .. المهم شافنا موظف وشاف رقبتي قللي الشغلة مو مستاهلة .. حط توم عليها وبمشي الحال!! كنت بدي اقلله "بالله عليك" بس استحيت وضليت مكمل يومي للساعة 6 المسا .. ولما روحت ع البيت مرقت ع الصيدلية ووصفلي مرهم .. وقللي النحلة هاي دلوعة .. مش قارصتك منيح !!


السؤال من هالقصة .. شو الهدف من انه يضل دوام الطلاب لل6 .. وكل الموظفين بروحوا ع ال3 ؟؟؟
يعني لا مكتبة ولا تسجيل ولا عيادة .. ولا شؤون ولا حدا بكون مداوم غير احنا والدكاترة اللي عليهم محاضرات؟؟
طيب بركي حدا صار معه حادث عاجل بالجامعة شو يعمل؟؟
انا طلعت قصتي سليمة ومش هالقصة الكبيرة بس غيري لآ .. بتذكر صاحبي يللي مات بالهاشمية السنة الماضية والسبب لآنه الاسعاف تأخر عليه .. طيب شو يعملوا عنا اذا مافي اسعاف اصلا؟؟

ودمتم سالمين :(

وهاي صورة النحلة بعد ما قتلها شهاب

10‏/07‏/2010

نتائج وتوقعات !!


حمى التوقعات بدأت تتفشى كثيرا هذه الايام خصوصاً في هذا المونديال
وأضحت الرهانات -بمبالغ خيالية- تبني احلاماً كبيرة على اختيار هذا الاخطبوط او ذاك التمساح ..

اتساءل ان كان طلاب التوجيهي ستطالهم هذه الحمى ايضاً؟!!



بريشتي





06‏/07‏/2010

وما أدراك ما البوليتكنك ؟؟

مع كل يوم يمر على .. يزداد اعجابي بكلية الهندسة التكنولوجية - البوليتكنك
في كل مرة تدهشك هذه الكلية بما لا تتوقع

لن أطيل كثيراً .. لكن , هل توقع احدكم ان يذهب ذات صباح ليداوم بالجامعة .. طبيعي
وبعد المحاضرة يتفاجئ بأن المادة قد ألغيت؟؟؟

هذا ما حصل معي البارحة .. فبعد انتهاء لاب المشاغل الهندسية2 .. وبعد مرور أكتر من 14 يوم على الدوام .. ألغيت الشعبة التي أدرس بها لعدم وجود العدد الكافي من الطلاب .. واحنا ننضرب على قلبنا للفصل الجاي


ملاحظة:
البوليتكنك .. بكل عيوبها ... بحبها :)



صورة تجمع أبرز معالم البوليتكنك .. مبنى 17 مع التراكتور الاسطورة وسور باب الدايو


____________________________________
اضافة جديدة

اليوم طلعت جريدة المواد للفصل الاول الجاي
نفس الغلطة الشنيعة كل فصل
عشر مواد بنفس الساعة بحطوها .. وقال التكرار بعلم (....) ... صرلي بسجل 7 فصول معهم ولا مرة تعلموا من خطأهم

29‏/06‏/2010

Home sweet home

متل ما كتار بيعرفوا .. اني كنت مسافر ع بيروت .. وقضينا يوم بالشام .. وكانت رحلة اكتر من رائعة !!
بس لو كان في وقت اكبر .. الشام ما رح احكي عنها لآني حكيت عنها كتير .
رح احكي شوي عن رحلة لبنان :)

بداية اكتر اشي عجبني الشعب نفسه .. عكسنا تماماً
ما عندهم حب الحشرية والتدخل .. احنا هون الكل بيجي يسألك .. ويعمل معك تحقيق .. وشعبنا بحب يتدخل بكل صغيرة وكبيرة
هناك كل واحد بحاله .. وهالاشي ريحني كتير

لبنان كانت عن جد قطعة من السما .. كان في اجتماع رائع للجبل مع البحر والصخور مع غابات الصنوبر يللي عندهم عاداتهم الخاصة بالعناية فيها فبتاخد شكل شمسية (انهم بقلموا الاغصان السفلية من الشجرة وبخلوا الجزء العلوي لهيك بتبين كأنها نوع شجر جديد من بعيد)

اول ما وصلنا لبنان وقطعنا المصنع (حدود سوريا ولبنان) رحنا ع شتورة .. هي حلوة بس ما حسيتها كتير بتختلف عن بلودان بسوريا .. هناك وقفنا وأكلنا .. وكملنا بعدها ع دير القمر ومرينا بقصر موسى المعماري (عمره هلق حوالي 80 سنة )
كان تحفة فنية رائعة ... بناه هو بنفسه وجمع القطع اللي فيه .. كان عامله متل متحف
كان عامل تماثيل بالحجم البشري للناس وحياتهم القديمة .. بتشوف ام كيف عم تعجن وبتلعب ابنها .. وواحد ومرته عم يلعبوا شدة ويأرجلوا .. بتشوف المدرسة وزمان والطلاب قاعدين ع مقاعد خشبية والاستاذ عم يضرب طالب .. وعجبني كيف مبين تعابير الوجوه بدقة
كان عامل كمان لوحة العشاء الاخير لدافنشي ع شكل تماثيل كمان .. كان ع الطاولة يسوع والحواريين ال12 من بيناتهم مريم المجدلية بجانب يسوع .. هون انا وقفت كتير وصرت انا اشرح للناس عنها .. والفضل اكيد لربى حجازي لآنها عارتني كتاب شيفرة دافنشي :)


اكتر الاماكن السياحية اللي حبيتها وبالفعل تستحق انها تكون عجيبة من عجائب الدنيا السبعة .. مغارة جعيتا
على ما قد الرطوبة والحرارة كانوا بقسمها العلوي .. على ما قد البرد بالقسم السفلي
بالقسم العلوي لما تدخله بتحس حالك داخل العظم البشري - سبحان الله - كانت الصواعد والهوابط بتعمل اشكال فنية بديعة .. وكانوا شارحين تاريخ لبنان ع مقطع حقيقي من هاي الصواعد .. انه بهاي الفترة صار زلزال .. وبهاي الفترة اجو الفينيقيين .. وبهاي الفترة نشأت أول مدينة بلبنان .. الخ
القسم السفلي من المغارة .. كان مغمور نوعا ما بالمي .. لهيك بيتجولوا فيه بالقوارب .. وكانت رحلة مائية رائعة تحت الارض بس للأسف انه التصوير ممنوع وبياخدوا الكاميرات والموبايلات قبل ما تدخل للمغارة :(

الجولة البحرية بخليج جونية كمان كانت حلوة .. بس حسيت القائد للقارب ماصدق متى ويرجعنا ويخلص منا .. عن جد طلعنا اصحاب كشرة الاردنيين
كل الجروب قاعد ومبوزم
عقدناه للزلمة .. حطلنا مليون اغنية .. ولا زقفنا ولا عملنا اشي ..
راح فينا القارب يمنة ويسرة .. ولا رفتلنا عين ... (اكيد كنا رح نفوز بمسابقة مين برمش قبل )

الاشي اللي ما عجبني هناك هو التيلي فريك ... كان صغير , مع انه قال مخصص ل 4 بس يادوب يوسع .. غير انه بضل يخبط .. تنذكر وما تنعاد


موقف هناك استحقرت حالي منه بس مش بقصدي .. وانه وانا واقف اتصور شفت طفل (بيبي) عم يركض لعندي
فحكيت لاختي وهي بتصورني طلعي البيبي معي بالصورة .. بس طلع هالشخص قزم وما كان قصدي اتخوت عليه :(
ومع هيك اخدها بكل روح رياضية وتصور معي :)

بس اكتر اشي قهرني بهالرحلة هو دكتور سنان كان طالع معنا هو ومرته بالجروب
انه الاخ دكتور .. هالاشي مفكره معطيه صلاحيات وماحدا قده
اقل اشي بتفلسف عليك وبقلك انه سنانك بدهم تزبيط ..
بداية انا ماصدقت انه دكتور ولهلق مش مصدق
بدخن بشراهة.. وسنانه صفر للغاية
المهم اخينا بالله عمل للباص مشكلتين

الاولى .. انه لما وصلنا دمشق (بالرجعة) كان المفروض نوقف مدة معينة للي بده يتسوق .. مرافق الباص حكى انه بعد هالمدة (ساعتين) رايح ع بوابة دمشق واعطى الكل رقمه .. واعتذر اكتر من مرة انه مابقدر يتأخر عن الموعد اللي اعطانا ياه لآنه الباص بيتخالف
وطلب من الكل انه يلتزم بالموعد ..
بالفعل .. كلنا رجعنا قبل الموعد .. عدا هالدكتور ... وبما انه الباص اعطى تنبيه واعتذر مقدما ... مشي
بالبوابة .. وقدام كل الخلق ... اجا الدكتور وعمل فضيحة الها اول ما الها اخر وانه كيف الباص بيمشي من دونه .. ومابعرف كيف انحلت القصة.

المشكلة التانية .. انه واحنا ع الحدود الاردنية وبالتفتيش .. زوجة الدكتور بعدت عنا - الجروب- وصارت تحكي بالتيلفون
الشرطة نادتها .. ويبدو انها شكت فيها
راحت فتشتها هي الوحيدة ولقتها مخبية بالشنتاية (شنطة ) جهاز طبي تهريب .. طلع جوزها الدكتور مخبي معها وفكره يمرقوا
يعني فوق اخلاقه الضيقة وشوفة الحال طلع بهرب ..
المثال اللي كل الاولاد الصغار بدهم يكونوا متله .. دكتور

المهم
الشرطة وقفت الباص باللي فيه ساعتين بالضبط مشان حضرته ... واللي طلع بالاخير بفيتامين wow


والآن اترككم مع بعض الصور من الرحلة :)
هلق صوري شنعين بس هيك طلعوا :$


شجر الصنوبر المقلم بالطريقة اللبنانية الغريبة

هون انا ماكنت عارف شواللي بصير .. وماكنت عارف انه الصورة رح تطلع هيك :(

بقصر موسى المعماري

بالروشة .. التى تعني بالفرنسية الصخرة (عرفتها بعد جهد جهيد .. واهلي حكولي ليه هلق لاعرفت؟؟؟)
ROCK ... ROCHE بس الاي E عليها شحطة بالفرنسي

20‏/06‏/2010

احصاءاتنا الدقيقة

من بعد اللي صار معي .. تأكدت بأنه الاحصائيات اللي بعملوها بالاردن ما الها اي صلة بالدقة والصحة!!!

اللي صار انه اتصلت فيي وحدة من شركة (XXXXXX ) للاحصاءات .. بتقلي انها بدها تاخد من وقتي ربع ساعة بس وتسألني كم سؤال
انا طبعاً انبسطت .. وقلتلها تفضلي
بلشت تسألني انت بتابع تلفزيون من الساعة 6 الصبح للساعة 9 الصبح .. قلتلها لآ
بعدين قالتلي .. بتابعه من 9 الصبح لل 12 الضهر .. قلتلها بدي اريحك .. مابحب اتابع تلفزيون .. وقلتلها انه هي انا قاعد بالبيت وطافيه للتلفزيون !!!

قالتلي مو مشكلة ..
طيب شو القنوات اللي بتابعها .. رجعت قلتلها ما بتابع تلفزيون
بعدين صارت تعددلي قنوات .. واقلها آه ولآ ... نص القنوات ما بتابعها بس حتى تخلصني صرت اقلها اه بتابعها ..
بعدين صارت تعددلي برامج .. قلتلها والله مابتابع تلفزيون .. قالتلي مارح اخد من وقتك بس قللي ع البرنامج اه او لآ
بالاول .. ضليت اقلها لآ لآ لآ .. بعدين حكت برنامج قلتلها آه بتابعه ... راحت قالتلي أي ساعة بتابعه؟؟؟
انا انحرجت لآني مابعرف متى بيجي .. رحت قلتلها .. ليه هو متى بينعرض؟
قالتلي ع ال7 المسا وع ال 11 بالليل كأنه .. قلتلها لآ بفضل 7 المسا

وضلينا على هالحالة ربع ساعة .. وحسيتهم مليون سنة

ونص المعلومات اللي اعطيتها ياها غلط .. لآنها من البداية ما ردت علي وانا بقلها ما بتابع تلفزيون !!!

شكلها بدها تعبي استبيان وتخلص .. صح أو غلط .. المهم بدها تخلص

6 أسرار لا يكشفها من يقابلك أول مرة

ما بعرف اذا العنوان صح .. بس لطشته من الكيل بمكيالين اللي عمات TAG لفرح بطارنة .. واللي بدورها كمان عملتلي تاغ لآكتب عن حالي

هلق انا صرت كاتب عن حالي كتير .. بس هالمرة مش رح أكتر .. بس 5 شغلات :)

1- هلق انا اجتماعي نص نص .. يعني مع العيلة والقرايب مابعرف احكي واطاحش واروح واجي ... بس مع اصحابي بالجامعة او مع الناس الجداد اللي بتعرف عليهم بسرعة باخد ع الوضع واحيانا بكون انا اللي ببلش بالتعارف.

2- بكره كرة القدم .. وما بتابعها ولا بلعبها .. وبكره الناس تقعد تفتح هيك قصص قدامي وتلعيلي قلبي !!!

3- مابعرف احكي نكت بالمرة .. لهيك بفضل السكوت ... لآنه وانا بحكي فيها بمطمطها (من كلمة مطاطة) وبخربها فبتفقد مفعولها النكتة !!

4- حب الظهور عندي بالدرجة الآولى ..بظن هاي سمة عند كل مواليد الآسد .. الابداع والنجومية (شوفة حال )... فرح انا ما بقلدك بس هاي الحقيقة :)

5- مابعرف ليه الكل ماخد عني فكرة بأني فهمان زيادة عن اللزوم .. مع اني لما تسكر معي بتسكر !! ما بعرف ال o من ال Ÿ

وهلق دور أعمل تاغ ل6 مدونين

1-احمد حمدان
2- ربى حجازي
3- د.محمد
4- وايت فريدم
5- جرات عسل
6- اي واحد حابب يشارك


19‏/06‏/2010

التخاطر .. والتقاطعات الشخصية

من فترة قصيرة تعرفت على شخصية للوهلة الأولى هي بعيدة جدا ً عني ..
لكن , بسرعة اكتشفنا انه بيناتنا تقاطعات خطيرة بتفاصيل نوعا ما دقيقة !!


مع اني درست موضوع التخاطر بمادة علم النفس / اختيارية .. الا انها وقتها ضلت متلها متل اي مادة نظرية
احفظ وامشي
وما تصورت ابدا انها تتطبق معي فعلياً

تصوروا انه التقاطعات تقريبا بنفس الماضي .. احداث بتسلسل غريب .. صارت عنا تنيناتنا مع انه ما كنا منعرف بعض
نفس احلام الماضي .. نفس الامور اللي ادت الى اعاقتها .. نفس المصادفات .. واللي صار عنا قناعة بأنها مش مصادفة

عنا نوعاً ما نفس الاهتمامات .. منحب نفس المدن .. عنا تقريباً نفس الهويات ..

الآمر تعدى الى اكثر من ذلك
بأنه .. صرنا نفكر بنفس الاشياء .. اما انه نحكي مع بعض عن نفس الشغلة .. او نفكر بنفس الطريقة ..

احيانا انظر للموضوع على انه مصادفة او تلاعب بالاقدار لا اكثر .. الا انني حين امعن النظر في الاحداث ادخل في دوامة لا تنتهي من الافكار والتساؤلات...

الموضوع مكركب شوي ومش عارف ارتبه .. بس هاد اللي طلع معي
تقلبلوا تحياتي :)

13‏/06‏/2010

مدونة صيف 2010

بعد التحية ,
السنة الماضية ومتل هيك وقت كنا مبلشين انا و ويسبر مسابقة "مدونة صيف 2009" ... الحمدلله , كان في مشاركة لا بأس بها 36 مدونة ... نجحت وقتها مدونة "جوردانيا" لصاحبتها "eNAS" بالمرتبة الآولى .. تليها مدونة "قصص طرمة سابقاً .. همساتي حالياً" لصاحبتها "ويسبر"


اليوم انا حابب نكرر التجربة .. نبدا مدونة صيف 2010
لكني ما بعرف اذا انتو حابين نعملها مرة تانية !!!

لمحة بسيطة عن المسابقة... هدفها مش الفوز .. هدفها هو انه نتعرف ع مجتمع المدونات بشكل اكبر .. انا ما بنكر اني عرفت مدونات كتيرة خلال هالمسابقة
الشروط كانت مش معقدة ... يجب ان تكون المدونة عربية (بس مش شرط تكتب بالعربي) , لا تخل بالآدب العام ..

في مربع للتصويت على جنب بالمدونة ... فاللي حابب نكررها ياريت يصوت لهاد الاشي!!

آسف اذا طولت عليكم .. وشكراً لقراءة الموضوع :)

12‏/06‏/2010

دمشق .. معشوقتي الأولى و الأخيرة

مقدمة فارس بني مروان , مختارات من شعر نزار قباني:
- أتمنى من الجميع سماعها , الملف الصوتي بالآسفل-

يا ابنـةَ العمّ ِ... والهَوَى أمَوِيٌ

كَيفَ أخفِي الهَوَى وَكَيفَ أبينُ

آهِ يا شامُ .. كَيفَ أشرَحُ ما بي

وأنا فِيـكِ دَائِمَـاً مَسكُونُ

سَامِحِينِي إنْ لَم أكَاشِفكِ بالعشقِ

فأحلى ما فِي الهَوَى التَضمِيـنُ

يا ابنـةَ العَمّ ِ... والهَوَى أمَوِيٌ

يا دِمَشقُ البِسِي دمُوعِي سِواراً

وَتمَنِّي .. فَكُلُّ صَعبٍ يهون

مَزِقِي يا دِمَشقُ خَارِطَةَ الذُلِ

وقُولِي للـدَهرِ كُن فيـَكُونُ

بكِ عَزَتْ قُرَيشُ بَعدَ هَوَانٍ

وَتَلاقَتْ قَبَائلٌ وَبُطُونُ

هُزِم الرُومُ بَعدَ سَبعٍ عِجَافٍ

وتعَافَى وِجدَانُنا المَـطعُـونُ

صَدَقَ السَيفُ حاكِماً وحَكِيماً

وَحدَه السَيفُ يا دِمَشقُ اليَـقِينُ

سَبَقتْ ظِلَّها خُيُولُ هِشَامٍ

وَأفاقت مِن نَومِها السِكِّينُ

عَلِمِينا فِقهَ العُرُوبـَةَ يا شَامُ
فأنتِ البَيَـانُ وَالتَبيـيـنُ

شامُ ... يا شامْ . شامُ ... يا شامْ .شامُ ... يا شامْ

غَيِّري قــَدَرَ الشـَمس ِ

شامُ ... يا شامْ. شامُ ... يا شامْ. شامُ ... يا شامْ

و قــُولِي للدَهرِ كُن ... فَيَكُونُ

يا ابنَة َ العَم ِ ... وَ الهَوَى أمَوِيُ


08‏/06‏/2010

شو بيعرفوا عنا؟؟؟

اليوم كنت ببحبش ع تصاميم مواقع .. دخلت ع موقع" انسايت" - الهام- ... وانا عم بتنقل بين التصاميم عجبني واحد .. اسمه حول العالم ب 12 شهر .. في بحدود 7 تصاميم .. متشابه بالوضعية .. انه شخص بسيارة .. السيارة مزينة بشغلات من جو المكان اللي هو بسوق فيه وحسب البلد .. مرة بفرنسا .. ومرة بالمكسيك .. ومرة عند اكلة لحوم البشر بإفريقيا .. ومرة عند العرب والمسلمين..

ولما شفت الصورة اللي عنا .. انصدمت :
شوفوهاتحليلي للصورة .. انه احنا شعب متدين شكلياً بس .. ومن دون ما نفهم .. بإيد مسبحة وبالتانية ارجيلة .. حاطين قرآن قدامنا ع طول وبنفس الوقت همنا الوحيد النسوان .. والتعدد بالزوجات ... وأهم اشي ارهابيين .. اذا انتبهتوا للشخص الملثم اللي عم يقطع البوابة على اليمين لابس سلاح ع ظهره ..

..........................................................................

ع كل اللوم مو عليهم .. اللوم علينا اللي منجيب لحالنا الحكي .. في منهم ما بينكروا افضالنا باللي وصللوا العالم من تقدم متل هاد الفيديو





ودمتم سالمين

برأيي ... هي حقيفة مهمة




بعد التحية...

من قبل ما ابدا التدوين .. لاحظت ملاحظة .. وضلت مع الآيام عم تزداد قوتها عندي

الا وهي انه معظم اصحاب المدونات ... هم من الاناث !!

ما عندي احصائيات دقيقة عن الموضوع .. بس معظم المدونات اللي بعرفها .. كتابها بنات .. بنسبة تصل برأيي 1:3

انا ما بحكي هالاشي انه مش منيح .. بل العكس بيين قديه صار عنا بمجتمعنا بنات مثقفات وعندهم شغلات تستحق انه يتسلط عليها الضوء .. أشياء تستحق المشاركة ..

هي مجرد ملاحظة .. ما بعرف اذا الناس بتوافقني عليها او لآ..

ودمتم سالمين :)

28‏/05‏/2010

الفن الصاعد

يجدر بنا الآن تغيير تسمية الفن الهابط .. فهو لم يعد هابطاً
وهو يصعد مع الآيام بالكم الهائل من الجمهور والمتابعين والمعجبين.

موضوعي ليس بالشيء الجديد , وربما انا الشخص المليون الذي يتكلم عن هذه الظاهرة


استغرب حقاً من الاشخاص الذين اعرفهم واعرف مستواهم الثقافي والعلمي , الذين يعجبون بمثل هذه الشخصيات , وهم كثر.

البارحة عرض على احدى القنوات الضخمة فيلم "بوحة"

لا أدر ِ ان كنت انا لا أملك الذوق الرفيع في اختيار ما اشاهد... ولا أحسن تقدير الفن .. فـالفنان "محمد سعد " ... اللي بهز

"عشرطعشر ألف" هزة بالثانية ... لديه آلاف المعجبين ... فمن أنا لآنفده

البارحة كنت اتفرج على الفيلم وأضحك ... ليس للكوميديا اللي بتشرشر منه ... انما من السخافة التي يطرحها ... لا أجد في أفلامه القصة المهمة والتي تستحق عمل فيلم لآجلها ... ولا اجد روح النكتة فيه ... بل بالعكس .. هو يبرز قمة التخلف والهبل بالعالم العربي.

يعني متكلفين على هالفيلم متكلفين ... يعملوا شغلة زي العالم والناس.

ومن فترة سمعت بمطرب أصيل نزل ع الساحة ... "أبو الليف" ... يعني فشر عمرو دياب قدامه !!

ما بعرف شو لازم ينحكى كمقدمة تليق بهيك حنجرة ذهبية ...

لكن بتركم مع مطرب الجيل ... الهضبة ... "أبو الليف"







وشكرا للقراءة :)


20‏/05‏/2010

24 حقيقة وحقيقة ... عني :)

مرحبا
قرأت هالموضوع عند ويسبر ... انه الواحد يكتب 25 شغلة عنه ... يخبرنا فيها شوي عن شخصيته ... وبعدها يختار 25 مدون ليكتبوا عن حالهم ... المشكلة كل المدونين اللي بعرفهم ما بيوصلوا 25 شخص ... لهيك الكل مدعو لأنه يكتب عن حاله :)

رح ابدا:

1- بعكس كتير من الشباب ... بكره ألعب كرة قدم ... وما بحب معظم الرياضات البدنية ... كسول شوي $:

2- بزعل بسرعة ... وما بحب المزح التقيل (سريع الانفعال... لدرجة الانفجار والبكاء)

3- بحب الثقافة والفنون ... بحب القراءة ... بس للأسف ما عندي وقت كبير :(

4- بكره النكديين ... مع اني انا مرات بنكد وبعصب!!

5- عندي احلام كتيرة ... حابب اسافر وألف العالم ..

6- ومن احلامي كمان اني اكمل دكتوراه ... إما بتخصصي الحالي "مدني" ... او بالمعماري :)

7- بحكوا عني غريب .. بأنه احيانا بكون "رزين وهادئ" ... واحياناً تانية بكون .. " مجنون مع هبل شوي" .. (هيك صاحبي من مدة قللي)

8- عندي عادة سيئة اني ما بعرف اضب ايدي ... وبضل اشتري كتير شغلات مفيدة وغير مفيدة

9- بنقهر جدا اذا حدا طلع من المكان اللي انا فيه من دون مايسكر الباب ... وخصوصي غرفتي

10 - يعترف بأني غير منظم ... بكون فيه 1000 شغلة ببالي وبدي اعملهم ... ببلش بكله مع بعضه , المهم ما برضى بمشروع الي ما اكمله
ملاحظة ... مش منظم لايعني مش مرتب !!

11- صاير عن جديد اكره الدراسة !!

12- بعتبروني أهلي اني غير اجتماعي ... مع اني بحب اعمل صداقات كتيرة واتعرف ع الناس

13- ما بعرف اتصرف بكتير اوقات ... وبتلبك بسرعة وبتغير لوني ...

14- مابحب اكون رقم 2 ... بحب يا اكون بالآول او لآ

15- ما بحب اشرب قهوة ولا شاي

17 - في شغلة مرات تعتبر منيحة ومرات لأ ... انه بكون ماشي مثلا بالجامعة ومبتسم ... ما بعرف ليه ... هلق ناس بحكولي انهم بحبوا يشوفوني الصبح وانا جاي لعندهم مبتسم وبخليهم يتفائلوا ... ومرات بفكروني مجنون!!

18 - بحب المفاجآت والهدايا :)

19- بخاف من الفشل ... واذا حسيت انه رح افشل بهالطريق بغيره بسرعة

20 - بس احيانا متهور ومجنون.

21- بحب اجيب هدايا كتير ... حتى لو مالقيت حدا اجيبله او مافي مناسبة بخترع اي اشي ... المهم لازم اجيب هدايا

22- بحلم انه اعمل عيلة صغيرة ... بحلم بشريكة حياتي من هلق -اللي مش لاقيها- ... ناس عندهم مفهوم عن الحب خاطئ ... انا بدور عن حدا بيفهمني وافهمه ونكون ع توافق تام ... مش الهبل اللي بشوفه بالجامعة والطوش اللي بعملوها الحبيبة ع شغلات فاضية.

23 - بحب انه الناس تتذكرني بعيدميلادي ويعملولي مفاجأة...

24 - مع انه اعتبر عاطفي زيادة عن اللزوم ... بس بكره المواقف العاطفية ... متل توديعة قبل سفر ... انه ما بحب لا أضم حدا ولا ابوسه

الحقيقة الاخيرة ... الخامسة والعشرون

عندي كرش مع اني ما بحب آكل ... بظن لآني ما بلعب رياضة .



بعرف انه شغلات هبلة اللي كتبتها بس هاد اللي طلع معي !!

المهم ... الكل مدعو لكتابة 25 حقيقة عنه :)

وشكرا لمروركم :)

15‏/05‏/2010

اجمل ما صنع الغرب عن الاسلام ... فيلم قصير





بدون اي مقدمات ... شاهد هذا الفيلم القصير

طريق واحد "أصبح الآن عندي بندقية" لنزار قباني


الذكرى 62 للنكبة


أريدُ بندقيّه..

خاتمُ أمّي بعتهُ

من أجلِ بندقيه

محفظتي رهنتُها

من أجلِ بندقيه..

اللغةُ التي بها درسنا

الكتبُ التي بها قرأنا..

قصائدُ الشعرِ التي حفظنا

ليست تساوي درهماً..

أمامَ بندقيه..

أصبحَ عندي الآنَ بندقيه..

إلى فلسطينَ خذوني معكم

إلى ربىً حزينةٍ كوجهِ مجدليّه

إلى القبابِ الخضرِ.. والحجارةِ النبيّه

عشرونَ عاماً.. وأنا

أبحثُ عن أرضٍ وعن هويّه

أبحثُ عن بيتي الذي هناك

عن وطني المحاطِ بالأسلاك

أبحثُ عن طفولتي..

وعن رفاقِ حارتي..

عن كتبي.. عن صوري..

عن كلِّ ركنٍ دافئٍ.. وكلِّ مزهريّه..

أصبحَ عندي الآنَ بندقيّه

إلى فلسطينَ خذوني معكم

يا أيّها الرجال..

أريدُ أن أعيشَ أو أموتَ كالرجال

أريدُ.. أن أنبتَ في ترابها

زيتونةً، أو حقلَ برتقال..

أو زهرةً شذيّه

قولوا.. لمن يسألُ عن قضيّتي

بارودتي.. صارت هي القضيّه..

أصبحَ عندي الآنَ بندقيّه..

أصبحتُ في قائمةِ الثوّار

أفترشُ الأشواكَ والغبار

وألبسُ المنيّه..

مشيئةُ الأقدارِ لا تردُّني

أنا الذي أغيّرُ الأقدار

يا أيّها الثوار..

في القدسِ، في الخليلِ،

في بيسانَ، في الأغوار..

في بيتِ لحمٍ، حيثُ كنتم أيّها الأحرار

تقدموا..

تقدموا..

فقصةُ السلام مسرحيّه..

والعدلُ مسرحيّه..

إلى فلسطينَ طريقٌ واحدٌ

يمرُّ من فوهةِ بندقيّه..

some of our cr8ive solutions







22‏/04‏/2010

من وحي البوليتكنك

بعد التحية,
انا هالمرة عم بدوّن من جامعتي البلقاء ... مش عارف كيف زابط النت اصلاً

المهم ..انا حابب اكتب عن عدم التنسيق اللي صاير عنا بالجامعة ...

امتحانات الفيرست كان المفروض تبدا ب 14/3 ... ولسبب ما ما بعرفه .. تأخرت الامتحانات وبلشت بـ 28/3 ...مما ادى بدوره الى تقليص الفترة بين الفيرست والسكند ...فأنا من يومين بس خلصت فيرست ... واليوم كان عندي اول امتحان سكند ..

بس مش هاي القصة ... القصة انه بامتحانات الفيرست كان في تعارض مش طبيعي بالامتحانات ... واكبرهم تعارض الديناميكا والفلويد والنقل ... هالتعارض كان عند اكتر طلاب السنة التانية والتالتة .. وتقدم الطلاب بشكاوي عديدة على هاد الاشي ...

المفاجأة ... لما نزل جدول السكند ... ناقلين الجدول حرفياً عن الفيرست ... وكل التعارضات ضلت متل ما هي ... يعني ما اعتبروا من الشكاوي الماضية ... طيب في حدا بنزل مادتين تخصص لنفس القسم بنفس اليوم ؟؟؟

بس كمان هالشغلة بلعناها ... الوقت الحالي هو فترة تسجيل الصيفي
الحمدلله ... المرة الموقع معي اشتغل تمام وما كان عليه مشاكل ... المشكلة بالجدول تبع الصيفي ,,, انا لازمني مادتين بشدة شديدة ... ومش لحالي بدي ياهم ... اغلب الطلاب بدهم ياهم .. واللي منزل الجدول الله ... الله يسامحه ... تارك كل اليوم فاضي ومنزل كل المواد بساعة وحدة ... ذكرني المسرحية ... "سايبين الشقة كلها وقاعدين فـأوضة وحدة؟؟" .. اغلب المواد نازلة 3:35-4:35
من بينهم المادتين اللي بدي ياهم ... فأضريت انزل وحدة منهم ... ومادة تانية مش كتير مهمة و3 لابات .. ودوامي من ال8 الصبح لل 6 المسا ... بالله عليكم مش جدولي بجلط ,, خصوصي بالصيف ... رح انهلك ...

هاي بعض مآسينا بالبوليتكنك !!!

________________________________________________________
شغلة ما دخلها بالموضوع:
مبارح رحت مع صاحبي ع كشك بابجامعة لنشتري بطاقة موبايل .. وكانوا معلقين ارقام مميزة بشكل مش طبيعي
قلت لحالي بشتريلي واحد جديد مشان مشروعي الجديد تبع التصميم... سألت عن سعر هاد الرقم 079X0000XY ... ولا طلع هو ب 300 دينار ... وقال هو رخيص لآنه مستعمل كمان
صاحبي بقول للبيايع .. ليه انا شاري قطعة ارض؟؟؟
_______________________________________________________

ودمتم سالمين

09‏/04‏/2010

حقا ً ... الى اين؟

البارحة احسست بأني داخل ما روته صديقتي "فرح" بتدوينتها ... الى أين؟
مع بعض الاختلافات البسيطة

كنت البارحة مع اصدقائي في مقهى بجبل عمان ... بالصدفة كانت مجموعة من الفتيات يحتفلن بعيد ميلاد احداهن ... فأطفئت الانوار ... وبدأن بالاحتفال على طريقتهن ... بالصراخ والزغاريد ... مع بعض الهبل والحركات المبتذلة بصراحة ...

المهم ...
احد اصدقائي اشترى "موبايل" من فترة قصيرة ... كان يحدثني عن وضوح شاشته , ومواصفاته العالية وما الى ذلك !!
ونحن في هذه الحال , اتت إلينا احداهن وهي تتروقص بخجل نوعاً ما ... وطلبت منا الموبايل !!
السبب , اتهمتنا بأنا كنا نصورهن ... اعطيناهن الموبايلات كلها لتتاكد , وبعدما تبين انهن ظلمننا واتهمننا بهتانا اعدن الموبايل ولم يعتذرن لنا

يعني كانت قمة الوقاحة بحركاتهن المبتذلة , ومن ثم بالاتهام الباطل , واخيرا بعدم الاعتذار عم بدر منهن !!

ان كن يخفن على سمعتهن ... لن يرقصن بتلك الطريقة امام العامة ...

الحمدلله انه تمت تبرأتنا امام الجميع ... وظهر الحق بوقتها

04‏/04‏/2010

a-groupJORDAN


بوستر الافتتاح اللي رح اعمله بـ: 22,ابريل|نيسان 2010

▲►◄▼▲►▼◄▲►◄▼▲►▼◄▲►◄▼▲►▼◄


ان كنت تبحث عن حلول تصميم ابداعية ... ان كنت تبحث عن روح الابتكار
و تريد التميز والانفراد ...a-groupJORDAN تقدم لكم اكثر من ذلك !!!
web design - logo design - card design
motion design - Ads design - stationery design

▲►◄▼▲►▼◄▲►◄▼▲►▼◄▲►◄▼▲►▼◄
فريقنا:
احمد المحروق & اسلام سعادة

اتبعنا على الفيس بوك

12‏/03‏/2010

the dog walk 3

اليوم وصلني هالمسج:

hey all, since this dog walk 1 and 2 was a great success, we decided we do this again next time. same time,, same walk, BUT this time we need more people and more dogs ( from different breeds too) :P

please same rules again, NO aggressive dogs and all dogs on a leash, please keep your eyes on your dog so he won't pick up on a fight.

thank you all and we hope we see you next time

for more info contact:
XXXXXXXXX

طبعا انا حذفت الرقم !!

المهم ... انا للاسف ضاع نص عمري , بأني ما حضرت هالحدث العظيم العام الماضي ولا اللي قبله ....

يالله لوين وصلنا؟؟!!

نسينا انه في ناس مش لاقية ابسط احتياجاتها من مأكل او مشرب... بدل ما نعمل متل هيك كرنفالات ترفيهية لكلاب ... ليه ما نجمع مصاري هالحدث تتوزع ايتام ... ع ناس محتاجة ... ليش ما ينعمل مشروع يستفاد منه البشر؟؟؟


سؤال... اللي ما عنده كلب شو يعمل بحاله؟؟؟

B4jo ... يوم التدوين عن الاردن


لعل خبرتي قليلة تجاه الكتابة والتدوين , ومع هذا حبي العظيم للاردن ألح علي بالمشاركة بهذا اليوم.

الاردن ... بلد رائع ورائد ... صدقوني , فبالرغم من قلة موارده الطبيعية من مياه او نفط او حتى غطاء اخضر ... استطاع ان يحفر اسمه بحروف من ذهب على جدار الزمن.
فمواقفه تجاه الازمات العالمية يشار لها بالبنان ... فمن ينسى شهداء الواجب في "هاييتي"؟؟؟
من ينسى مواقفه في البلاد المنكوبة .. مواقفه الطيبة لرسم بسمة على شفاه طفل فقد ابويه؟ او رجل مريض عاجز؟

وان نسيتم ذلك... ولن تنسوا
فمن ينسى مواقف الاردن مع توأمه "فلسطين"؟؟


انا لا املك الكلمات الكافية لأصف الاردن ... لكني بالنهاية اقول : " كلنا الاردن"

_______________
أود ان اشكر قويدر على هذه الفكرة : يوم التدوين عن الاردن

04‏/03‏/2010

ابتسم ... انت في البوليتكنك (:







"كلية الهندسة التكتنولوجية - جامعة البلقاء التطبيقية" .... لافتة عريضة قبل دخول "البوليتكنك"!

فتدخل وانت مستعد لدخول كلية هندسة ... ولكنك تصعق بمشاهدة اعمال الحفريات والبناء..
تريد ان تعبر الطريق للذهاب من جهة الى اخرى ... فتضطر للقفز من فوق خندق - حُفِر لآعمال صيانة الصرف الصحي - ...

تجلس في احدى القاعات الصفية , لحضور المحاضرة ... فلا تستطيع تمييز صوت الدكتور , لآن الحفريات أبت إلا وان تكون هي صاحبة الصوت الاعلى في الجامعة !!

وان اتيت هذا الاسبوع الى هذه الكلية ... انصحك بأن تلبس اكياس "نايلون" فوق حذاءك ... وان تجلب معك عصا او مشابه , لمساعدتك من الغوص بالطين المجمع عند درج -باب الدايو المؤدي الى مبنى 17 -.

مبنى 17 ...
ان كانت لديك محاضرة في مبنى 17 فاستعد للتالي:
1-اخذ حمام مجاني من السقف الذي يرشح الماء منذ اشهر - وقبل المطر-
2- ترطيب الملابس ... فالمقاعد مبللة , وقد تجد احدى سلات القمامة جالسة على احد المقاعد ... فهي تقوم مقام "السطل" لتجميع الماء بدلاً من ان يضيع هدراً.
3- التزلج على الارضية ... هذا امر ممتع حقاً , والتجريب مجاني !!!
4- ان كانت المحاضرة مسائية , استعد لنقل المحاضرة الى قاعة اخرى فالكهرباء مقطوعة هنا, فيضيع الوقت وانت تمشي وراء الدكتور والطلاب بالبحث عن هذه القاعة ذات الانارة الجيدة , وما ان تصلوا اليها , يأتي دكتور آخر ويقول : لقيتها قبلكم , روحوا دوروا ع قاعة ثانية.

في البوليتكنك ... تكون بطل قصة " طالب في بلاد العجائب" ... فيلم 3D ... وبدون ما تدفع 8 دنانير!!!

وما خفي أعظم!!!


* مرة صاحبي قلي : " كليتنا ... زي المرة اللي ما الها زلمة يشكمها ... بتعمل شو ما بدها بدون ما تشاور"

27‏/02‏/2010

قصة مثل ... يا فرحة ما تمت

سلام ٌ عليكم,
ما بعرف اذا اشتقتولي أو لا...

المهم , انا عندي كمشة بوستات كنت محضرهم ببالي لآكتبهم... بس ما فضيت

قصة" يافرحة ماتمت" ... قصة طول انتظاري لقرار الجامعة بتحويل تخصصي ... وانه واخيراً وافقولي ع الانتقال وصرت هندسة مدنية"طرق وجسور"

لكن حولوني بعد ما طلعت روحي ونشفولي ريقي...

المفروض انه يطلع القرار "بالموافقة او الرفض" لكل الطلاب اللي قدموا قبل السحب والاضافة
ع اساس انه نعمل اجراءات النقل , وناخد رقم جديد وهوية جديدة ويعادلولنا المواد ... حتى انه بالسحب والاضافة نسجل ع راحتنا مثل باقي البشر.

لكن الجامعة حبت تعمل تكسر الروتين هالمرة ... وضلت تاخدنا وتجيبنا لفترة السحب والاضافة
واخيرا ... بتاني يوم من السحب والاضافة طلعت النتائج ...

واسمي كان مكتوب مع الاسماء المقبولة بتحويل التخصص
" احمد محمد حسين المحروق ... التخصص القديم: هـ. الطاقة الكهربائية .... التخصص الجديد:هـ. الطرق والجسور"

وعن جد ... فرحت فرح مش طبيعي ... لأنه كنت حاسس الدنيا مسكرة بوجهي ,,, اني رح اضل بتخصص ما بحبه طول عمري.

ورحت اراجع مسجلتي "الست سمر" ... (سيدة قمة في الاخلاق والتعامل ... يعني هي الشغلة الوحيدة اللي بندم اني حولت مشانها لآنها جدا ساعدتني)
وقالتلي انه اراجعها الاسبوع اللي بعد السحب والاضافة لآنه هيك الاوامر
(لانه الجامعة ما بتقدر تشغل برنامجين بنفس الوقت للتسجيل وللسحب والاضافة)... بس مع هيك ضليت صامد ... وكل يوم اداوم من الصبح عندها ... كنت خايف الجامعة تغير رأيها بأي لحظة ويروح علي التحويل.

المهم ... اجا اليوم الموعود ... الاحد (21-2-2010)
كنت من الساعة 8 واقف ع الشبابيك تبعون التسجيل ... كنت تاني واحد
ع ال 8 وشوي (بعد وتلت) فتحوا هالشبابيك
وقلتلهم انه طلعلي تحويل ... الخ ... قالولي جيب وصل لنطلعلك كشف علامات ... قلتهم مطلعه (كنت مطلع بالعطلة استعداد يعني)
قالولي صوره وخلي نسخة عندك ... (كنت كمان مصوره)
راحوا اخدوه مني ... واعطوني ورقة بدي اوقعها من كم مسؤول بالجامعة ... ويا الله قديش طلع عنا مسائييل بهالجامعة
جمعت فوق ال 30 توقيع ... اروح من واحد لواحد ... ومن مبنى لمبنى (اول مرة بحس الكلية كبيرة) .. واللي طالع .. واللي لسة ما داومش ... واللي اترك الورقة وارجع بعد نص ساعة
المهم بعد ما جمعتهم ... صارت الساعة قريب ال ال 12 الضهر...
رجعت لعند الست سمر (مسجلة الكهربا) ... وقعتلي آخر توقيع ... وبعتت ملفي لمسجلتي الجديدة لحتى تعطيني رقم جديد واصير مدني.

انا كنت مفكر انه خلص ... انا هيك انتهت القصة.
رحت لعند مسجلتي الجديدة ... انا واقف ع الطابور وقدامي بنات ... ونازلة تصرخ وتعيط ... وتأفف ... "وهلق وقتك انتي؟؟" ... "شو بدك؟" ... " روح وما ترجعليش مرة تانية" ... انا قلت اكلنا هوا
هاي معصبة ومش شايفة حدا قدامها ... والله وصل دوري ... استقبلتني طبيعي وتعاملت معي عادي ... سمعت البنات بقولوا "لآنه شب يعني؟!" ... المهم اعطتني رقم جديد وقالتلي جيب من عند شباك 7 استمارة...
بقلها "استمارة شو؟؟؟" ... هي ولا عبرتني وقالت"اللي بعده"
انا رحت عند شباك 7 ... والناس متل النمل ع السكر
المهم ... وصل دوري ... قلتله للسكرتير بدي استمارة ... قاللي : استمارة شو؟
رحت شرحتله وضعي ... لعل وعسى عرف استمارة شو ... لآني انا مش عارف شو بدي اجيب.
والله واعطاني ورقة ... وبلشت اعبيها ورجعت لمسجلتي الجديدة...
هي اخدتها من هون .. ومزعتها ... وقالتلي " انتو ليش بتفهموش من اول مرة؟؟؟"
قلله بدي ورقة معادلة مواد!!!
-طيب هي لو انها قالتلي من البداية بدها معادلة مواد ... مش كان ريحتني من الاول؟؟" ...المهم انا طلعت الغلطان.
ورجعت لشباك 7 ... وجبت ورقة معادلة مواد ... وعبيتها واخدتها مني وكتبت عند "شروحات مسجل القسم" ... انا مافهمت شو كتبت لآنه خطها حلو ... بس انا ما بعرف اقرأ
المهم ... هلق بدي اروح اوقعه من شباك 7 ... وارجعلها ... وبعدين اروح ع قسم المدني ليعادلولي المواد..
واذ ... الساعة 1 ... استراحة القسم ... سكروا الشبابيك وانا قعدت استا.
مكتوب الاستراحة من ال (1 الى 2) ... صارت 2 ... 2:05 ... 2:10...2:15 فتحوا الشبابيك

والله وقعتها من شباك 7 ... ورجعت لمسجلتي الجديدة ... وبعدين طلعت ع قسم المدني
رحت ع سكرتيرة الرئيس ... اخدت طب المعادلة مني وقالتلي ارجع بعد ساعة .. واكتب ع ورقة بيضا المواد اللي بدك تسجلها..

انا قلت لحالي ... واخيراً ... انا خلصت وصرت مدني ... ورح اسجل براحتي
طلعت ع شغلة حاسبينها علينا مختبر انترنت .... لصحلي جهاز ... فتحت ع جريدة المواد لاشوف شوبدي اسجل
كل المواد اللي بدي ياها مسكرة ... يعني رح اسجل 0 ساعة.
بس قلت لحالي .. انا حالة طارئة , اكيد رح يسجلولي شو ما بدي لآني طالب منتقل وما لحقت السحب والاضافة.
سجلت المواد ورجعت بعد ساعة
كانت الساعة 3 ونص ... بس السكرتيرة , واللي دوامها مفروض يخلص عال 5 ... روحت ع بيتها.
اضطريت ادخل عند رئيس قسمي الجديد بدون ما تحكيله السكرتيرة
دقيت ودخلت ... كام بالبداية منيح معي
بس لما شاف الورقة بالمواد اللي بدي اسجلها ... قاللي وهو معصب : ليش تحول؟ مش عارف انه ما عناش وسع؟؟؟
والمدني مش ناقص طلاب ... ويعني كان ترحيب حلو بأني انتقلت لعنده.
المهم كتبلي ... بأنه يرجى تسجيل المواد المطلوبة حسب الشواغر.
وشواغر مافي ...
رجعت لعند مسجلتي عشان تسجللي ... وقدمتلها الورقة ... قالتلي حسب الشواغر ... يعني ما بقدر افتحلك شعب
مع انه قدامي في طلاب معهم فيتامين "واو" ... وانفتحتلهم شعب وسجلوا بدون ما يلفوا لفلتي هاي.

المهم الاخت حبت تساعدني ... وبحبشت ولاقت كم شعبة مفتوحة
وطلع معها الجدول كالتالي... مادة "ن ر" 8-9:30 ... ومادة "ح ث خ" 6-7 بالليل ... ومادة ح ث خ "4-5" المسا ... ومادة "ن ر" 2:30
قالتلي : اثبتلك ؟؟؟
كنت بدي احكليلها ... "طيب قولي بيبسي" ... بس خفت تضربني
قلتلها شكراً ... ما تسجليلي!!
وضليت رايح جاي من المسجل العام ,,, لعندها للقسم لحد ما صارت الساعة 4 وسكروا شبابيكهم ...
وانا صرت مدني ب 0 ساعة ... والدوام مبلش
والسحب والاضافة خلصت :(

تاني يوم من الصبح... كنت انا ومجموعة طلاب متأهبين عند قسم التسجيل ... فتحت مسجلتي الجديدة شباكها وقالت " يا فتاح يا عليم ... شو بدكم من الصبح ... ارجعوا ع ال9"


_______________________________________________________________

بريك ... بعرف انكم زهقتوا من هالتفاصيل ... بس هيك هي قصصي ... معتة
_______________________________________________________________

والله راحوا ... بس انا ضليت واقف ... حتى ما يروح دوري ...
وصارت 9 الا شوي ورجعت فتحت شباكها ... وسجلتلي مواد ... مش كتير بدي ياها لكن احسن من الجدول اللي كانت بدها تسجللي ياه قبل

17 ساعة ... كلهم "ن ر" ... ماعدا مادة "ح ث خ" من ال 6-7 بالليل
وافقناعلى هالجدول وسجلت كل اشي

ولما رحت ادفع ... عملت تحديد رسوم ... ولا لازم ادفع امتحانات المستوى من جديد ... رحت اراجع مسجلتي تبعت المدني ... قال بعينك الله ... ادفعهم هلق , لاني ما بقدر اساعدك .. لانه معادلة المواد ماخلصت

"معادلة المواد ما خلصت ... طيب كيف سجلتيلي؟؟؟ " هاد ببالي حكيته
شافتني مسجلت القديمة الست سمر ... ووقعتلي اني ماخد امتحانات المستوى ومش لازم ادفعهم
والفعل ... ما دفعتهم

_______________________________________________

القصصة مملة ... اسف ع الاطالة.
_______________________________________________

واخيرا طلعت معادلة المواد ... وعادلولي 61 ساعة من اصل 64 ... عادلولي مادة "هندسة كهربائية" بدل مواد الكهربة اللي اخدتها

المفاجأة ,,, انه سجلولي مادة "هندسة كهربائية" ... يعني سجلولي مادة وعادلوها؟؟
ان شالله الاحد بدي اراجعهم ,, لعل وعسى حطولي مادة جديدة بدالها... مع اني ما اظن يخدموني !!!




ودمتم بخير
____________________________

اسف ع الاطلة

03‏/02‏/2010

في انتظار نتائج التوجيهي


من المعروف ان العديد من طلاب الثانوية العامة - التوجيهي - قد استكملوا متطلبات النجاح والالتحاق بالجامعات في هذه الدورة الشتوية , وهم ينتظرون صدور النتائج والاوراق الثبوتية لتقديم طلبات الالتحاق - التنافس والموازي - ... وصدرو نتائج القبول تحتاج على الاقل اسبوعين من تاريخ اعلان نتائج الثانوية العامة ... ومن بعد القبول هناك فترة امتحانات المستوى
وحتى الآن لم تصدر هذه النتائج في حين ان بعض الجامعات الاردنية قد بدأت بالتدرس من 31/1/2010 ...
فهل سيدخل هؤلاء الطلاب الى جامعة في فترة امتحانات الفيرست؟؟؟


28‏/01‏/2010

my mosaic shop


my mosaic shop

هي مدونة جديدة تابعة لي ... انشأتها كي تكون مختصة بالاعمال الفنية ... ان كانت لي او لغيري

سأعرض بها رسوماتي , والكاريكاتيرات الخاصة بي ... والتصميمات ... اضافة الى كل شيء خاص بالفن.

وسأختار اسبوعياً لوحة الاسبوع , لاحد الفنانين العرب واعرضها...

كما وارجوا منكم الا تبخلوا علي بزياراتكم واقتراحاتكم وتعليقاتكم ...

المحب
احمد المحروق