27‏/09‏/2010

وما ادراك مالبوليتكنتك .. الجزء الرابع (واشياء اخرى)

اكي انتو من زمان متوقعين اكتب اشي عن الجامعة مع بداية الدوام .. انه شو اكتر نهفة عملتها فينا .. بس تأخرت شوي لآعمل سسبنس (لول)

بصراحة .. ماعملت الجامعة فينا اي شغلة هالمرة ... غير انها شوي غلبتنا.. بـ 20 ايلول (يوم الاثنين الماضي) ... كان يوم السحب والاضافة عندي .. وعلى حظنا , سيرفر الجامعة ما بعرف شو ماله .. مش راضي يفتح .. اللي بقول خربان .. واللي بقول سخنان .. واللي بقول فقع !!
ضلينا طول اليوم واحنا ع النت ... منسبسب انا والشباب ع الجامعة والتسجيل

بالاخر .. و عال12 بالليل .. زبط الموقع .. وزبطت جدولي .. 18 ساعة ( 3 مواد ح ث خ) .. و (3 ن ر)
:)

هلق هاد التعطيل يعتبر عادي .. كل فصل على حظي بيخرب الموقع :)

اما النهفة .. صارت مبارح الاحد
دخلت ع قاعة 1712 .. على اساس علي فيها هندسة نقل , بعد شوي بلاقي صحابي من التخصص القديم (الكهرباء) موجودين .. طيب شو بتعملوا هون .. واحد عنده اجهزة كهربائية .. ووالتاني الكترونيات القدرة .. بقلهم اكيد انتو مخربطين .. كل واحد طلع جدوله (اللي ممنوع تطبع غيره ولمرة واحدة) .. كلنا بنفس القاعة .. طلعوا حاطين 3 مواد بقاعة وحدة

هاي ما كانت المرة الوحيدة .. اليوم كان علي (نيوميركال) دخلت ع القاعة .. طلع فيها طلاب عليهم (فلويد ) .. وطلاب عليهم (تصميم رصفة) .. يعني كمان 3 مواد بقاعة وحدة
زكروني بأيام الكتاب .. لما كان ابن 6 سنين وال10 سنين يدرسوا بصف واحد :)

قولوا مش مشكلة .. رحنا ع التسجيل .. وطلعوا مغيرين القاعات بدون ما يخبروا حدا .. حتى الدكاترة مش عارفين وين صاروا قاعاتهم:)

___________________


بتتذكروا السنة الماضية لما خبرتكم عن مبنى 17؟؟
هاد يعتبر متل (المعلم الحضاري الوحيد عنا) .. بنوه بدعم من اليابان :)
المهم .. وانا بنهاية بسنة اولى فصل تاني .. بلشوا يبنوه عليه طابقين جداد .. قال عددنا زاد وبدهم قاعات ... مر الصيفي سنة اولى .. ومر الصيفي سنة تانية .. وبلشنا بالاول سنة تالتة ... ومازال المشروع تحت الانشاء ,, عم يعمروا فوق روسنا .. ويحفروا ويضربوا ومش عارف شو صرلهم سنتين عم يبنوا بهالطابقين ... قبالنا مصنع الببسي , بالفصل الاول سنة تانية (يعني بعد مشروع الطابقين) بلشوا يبنوا مبنى جديد , مدري كم طابق فيه .. خلصوه .. ودهنوه ازرق واحمر .. وصار بالخدمة عادي :)

دكتور عنا بيتخوت بقول .. العمال تبعون 17 .. بتداموا بداوموا معكم .. بتعطلوا , بعطلوا ... بتسجلوا مواد .. بسجلوا .. وحتى بالسحب .. بيسحبوا معكم :)

___________________

اهم اشي انا مبسوط منه .. اني بكون هلق قاطع 100 ساعة بالضبط :)
وضايلي سنتين وبخلص من هالقرف .. :)

بتمنى ما اكون قرفتكم معي :)

تحياتي

هناك 9 تعليقات:

marwa joe يقول...

الجامعات كلها قارئة على شيخ واحد ..
بتفننوا في سم بدن الطلاب و اكيد احسن وقت لسم البدن هو التسجيل ...
يعني مرة دكتور بقول لصاحبتي اللي مش لاقيه مواد تسجلها "اقعدي بالبيت فصل شو وراكي , ليش مين قلك انو لازم تتخرجي ب4 سنين ؟؟؟ "
اشي بجلط

Dr.Mohammed يقول...

و الله يا ابو حميد ذكرتني بايام جامعه التكنو ، يعني مرة حكو انهم بدهم يبنو مبنى مركزي يحكطو فيه المكتبة و المباني الاداريه و هاد يوم و هداك يوم ، و طول 6 سنين اللي قضيتهم بالجامعه و المبنى برتفع شبر كل سنة عن الارض و الحمد لله اتخرجت و اخر مره زرت الجامعه ما زال طولو مش اكثر من شبريين ، بتذكر انو كنا نشوف 4-5 عمال بس بشتغلو فيه !

jafra يقول...

شوف انا كنت باليروموك
اظن انك عارف شو يعني يرموك
كان وقت السحب و الاضافة يقعدونا بقاعة كبيرة و واحد فيهم ماسك عصاية
تخيل عصاية لطلاب جامعة
اسمو مرديني على ما اعتقد
و خناق و المادة اللي بتنسحب ما بتسجل بدالها و اذا رجعتها
ما بتلحقها
بس مع هيك
اشتقتلها و اشتقت لايام الجامعة
ما تستعجل بالشغل رح تشوف العجب


بالتوفيق

Ahmad M. Al-Mahrouq يقول...

@ مروة

صح .. شوفي ورانا .. خلينا قاعدين بالبيت :)

شكرا للمرور

Ahmad M. Al-Mahrouq يقول...

@ د.محمد
والله با دكتور يبدولي انه كل الجامعات متل بعض .. بس بتضلها التكنو غير

لشو الحكي :)

Ahmad M. Al-Mahrouq يقول...

@ أهلا جفرا
بتعرفي انه كان نفسي اما ادخل الهاشمية او اليرموك

مع هيك .. اليرموك ما كان مسموحلي اكتبها بالطلب الموحد .. لآنها بعيدة :(

بس بظن انه هداك زمان .. اذا البوليتكنك صار التسجيل فيها ع النت .. بظن اليرموك هلق افضل حالا منا :)

تحياتي

Whisper يقول...

انا من اللي كنت متوقعه و بستنا بهالبوست :))

انا من الدفعه الاولى من الهاشميه,يعني بنى صح و غبره فوق الغبره اللي بالصحرا, دخلت الجامعه و تخرجت و لسّا البنى و الاصوات شغّاله و العمّال همه همه بشتغلو جنبنا


برجع و بحكي الله يعينكم على جامعتكم


الله يعطيك العافيه و ان شاء الله هالسنتين بمرو بسرعه و بتتخرج بمعدل منيح :)

Haitham هيثم Al-Sheeshany الشيشاني يقول...

أول شي يا أحمد عيوني واوا من وراك! طبعت البوست و كمان اللي قبله و الخط صغيييييييييييير
لحلحها شوي يا زلمة .. كبر الخط ... أرجوووووووووووووووك :]]]

تاني شي و عطفا ً على كلام جفرا.. مدير القبول و التسجيل عنا باليرموك كان بيحمل عصاي! و عنده وحدة سبشل أيام السحب و الإضافة!! هاظا المدير فإلك تتخيل البقية كيف! إذا بتسحب مادة + بتضيف بتكون مرضي و/أو معك واسطة!

أحلى إشي لما كل مرة يعلنوا بأعلى أصواتهم إنو "ممنوع تغيير الشعبة" بس بتلاقي يا أخي إنو فيه استثناءات و عمرها ما شملتك :)
+ أبدا ً أبدا ً ما كان فيه مسجلين يزبطوا جداول "بعض" الطالبات و مو مشكلة إذا لغوا عنك مادة مهمة و تأخرتلك فصل كامل من ورا الشغلة... عاااادي ... أقل من عااادي كمان ..

التسجيل عن طريق الإنترنت أفضل و لكن داااااائما ً فيه مشاكل و برضه مهو بالنهاية ممكن التعديل إذا عندك واسطة لأنها شغلة صلاحيات دخول على النظام و بس!

بالنسبة للمبنى .. فاللي عند أهله على مهله :]]] و الدكتور أعطاك مثال "صارخ" .. 6 سنين! فلسا سيدي الوضع بكير عليه بمباكم :)

* أما 3 مواد بنفس القاعة ... جديدة هاي :P

Ahmad M. Al-Mahrouq يقول...

@ Haitham

أهلا يا صديقي .. وتقبل اعتذاري لآني مصغر الخط .. وان شالله من البوستات الجاي رح اكبر الخطوط :)

احنا الحمدلله .. ما وصلوا لدرجة العصاي لهلق .. بس ما بعرف قبل ما ادخل شو كانوا يعملوا .. اكيد افظع منكم :)

الاستثناءات هاي دايما .. بكل عصر وبكل مكان :)
تعودنا :)

احنا سيرفر الجامعة دايما ما بيخرب غير بالسحب والاضافة :(

معك حق .. يعني يادوب صرله سنة وكم شهر بس .. لشو مستعجلين عليه؟؟

شايف كيف ..الا ما نكون مميزين احنا بالاخر

تحياتي هيثم .. وشكرا لمرورك :)