30‏/06‏/2009

مدونة صيف 2009






متل ما وعدتكم ... مفاجآتي ... بعدها بأولها ... وطعم الصيف معي ...غير



احنا شباب اليوم ... ابداعنا ... ما بينتهي .... وما اله حدود
طاقات كامنة كبيرة فينا ... منقدر نعمل فيها المستحيل

وطاقاتنا ... اكيد ما رح تضيع هدر

لهيك , انا فكرت بهالمسابقة

مدونة صيف 2009




Create your own banner at mybannermaker.com!



عشان نتشارك و نتبادل خبراتنا ومواهبنا
وننعش صيفنا بشوية تسلية ومغامرة


الكل بيقدر يشاركنا ... بأنه يرشح ... ومن ثم يصوت

الترشيح رح يكون عن طريق انه يكتب الواحد اسم ولينك مدونته , او المدونة اللي حابب يرشحها ,,, ويكتبها عندي بالتعليقات ... او عند همسة

او بيقدر يبعتلنا ترشيحه بإيميل على
aalmahrouq@gmail.com

او ايميل همسة
My_loud_whispers@yahoo.com

فترة الترشيح رح تكون من 1-7-2009 ... الى 15 الشهر نفسه


بالنسبة للتصويت , رح يكون عن طريق جروب ع الفيس بوك , منعرض فيه المدونات المرشحة .. وانتو بتصوتوا للمدونة اللي بتفضلوها

وفترة التصويت تمتد من 16-7 -2009 لنهاية الشهر


النتيجة رح يتم اظهارها بالاسبوع الاول من شهر 8 -2009

بتمنى انو الكل يشاركنا ... ويستمتع بجو مدونات الصيف

ملاحظة اخيرة ,,, شرطين خفاف ظراف ,, لطاف نضاف ... وهم

1- المدونة اردنية
2- لا تمس الادب العام

واخيراً ... انا بشكر مدونة قصص طرمة , ممثلة بمالكتها ... همسة ... ع المجهود الرائع اللي بذلته معي في اعداد المسابقة

بتمنى التوفيق للكل

هناك 11 تعليقًا:

Whisper يقول...

الفكره بتجنن وكتير ناس حبوها و ايدوها....شكرا احمد

وهي انا و انت ترشحنا :)

Dreamy Villager يقول...

أنا قررت أعلق عندك لأنه الكل علق عند همسة وهذا ما بصير ;)
بس أول ما شفت عنوان التدوينة عندك وعند همسة نفس الاشي قلت لحالي: ول ! شو توارد الأفكار هذا
عندي شوي أسئلة:
1)الواحد بصير يرشح مدونات قد مابده ويصوت لكل اشي عاجبه..ولا ترشيح واحد وصوت واحد؟
2)هذا تقريبا اقتراح :أنا مرة سألت حالي ليش ما كل واحد يدون عن المدونات اللي بشوفها مضحكة أكثر اشي ، أو أسلوبها أدبي وممتع ، أو أياها أكثر شعبية( بس هاي ما عرفتش كيف بدنا نقيسها على عدد الزوار ولا على عدد التعليقات)..فانتو حابين تكون المسابقة بفئة وحدة ولا حابين توسعوها بفئات؟
خلي حدا يحكي لهمسة لأني مش رح أرجع أكتب عندها :) وسلامتكو.

Ahmad M. Al-Mahrouq يقول...

شكرا همسة للدعم والمساندة ... واكيد لولا جهودك ما كانت وصلت الفكرة لكل هالناس

Ahmad M. Al-Mahrouq يقول...

Dreamy Villager

شكرا الك جزيلاً ... واكيد ... بجهودنا كلنا ... المشروع رح يكتمل .. ويحقق اهدافه .. بأنه نتعارف ونتشارك ...

بالنسبة لآسئلتك:
اولا ... الواحد برشح قد ما بده ... وبصوت لآكتر من مدونة ... بس ما بقدر يصوت لنفس المدونة مرتين ... مرة وحدة لكل مدونة !

ثانيا" ... اقتراحك كان وارد من البداية ... وانا كنت مفكر كمان بأنه نفرعها لآجمل تصميم .. اكثر قراءة ... واجتماعية ... وفنية ... وشاملة ... بس تناقشت مع همسة ... واتفقنا على انو نعملها بشكل عام هالمرة ... واردنية ... واذا لا قت الفكرة نجاح كبير ... منطورها ومنفرعها .. وتصير عربية كمان ... هالاشي ببين بآخر المسابقة ...

انا جدا مسرور بالتعرف عليك يا Dreamy Villager .. وان شالله ... اذا بتكبر القصة متل ما انا متأمل .. وانت بتحب تشاركنا بالنسخ اللاحقة من هالمسابقة ... انا برحب فيك !!

احمد المحروق

Dreamy Villager يقول...

وأنا والله "مسرورة" أكثر بالتعرف عليك ؛)..وما شاء الله شكلها المسابقة رح تكون حلوة عن جد..
أنا كنت بدي أرشح http://www.anosyat.com ..وفيه أكم مدونة بس ضيعت عناوينهم هسه..بحطهم بعدين ان شاء الله.

Whisper يقول...

Dreamy Villager
تعليقك وصل وشكرا كتير لمشاركتك
دايما بتسعديني بتعليقاتك :)

vague.raz يقول...

يعطيك العافية أحمد :)
جد فكرة حلوة :)

Ahmad M. Al-Mahrouq يقول...

دريمي ... شكرا الك ... وانوسيات صارت معنا

و انت كمان صرتي مرشحة ... انا رشحتك

Ahmad M. Al-Mahrouq يقول...

رزان ... الله يعافيكي
المهم تكون عجبتكم الفكرة

غير معرف يقول...

طيب انا اخدت بانادول . بس لساتني مرشحة , ولا هيك ببطل خلص :)

سلام أحمد الله يعطيك العافية , انت وهمسة

بس قروب الفيس بوك,حابه اعرف ايش صار فيو على اساس انزل اعلان بمدونتي اذا ممكن
من شوي عملت سيرتش بس ما كان في شي !!

Ahmad M. Al-Mahrouq يقول...

اهلا ايناس !!
الجروب اتفقنا انا نعمله ب 15 الشهر
قبل التصويت بيوم