مرحبا من جديد
ما بعرف اذا اشتقتولي او لآ
انا اليوم وصلت لعمان
الحقيقة اشتقتلها كتير ... هالمرة اكتر مرة
يمكن لآني عملت مقارنات كتيرة بين الشام و عمان
ومع حبي الشديد لدمشق ... إلا انه عمان هي الافضل
من ناحية عجقة .. و اضاءة شوارع ... واحترام قوانين ... وتنظيم شوارع ... عمان اكيد هي الافضل
ومع اني بعتبر حالي ابن الشام ... الا اني كمان للمرة الاولى بعتبلا حالي غريب وضيف
قصص كتيرة صارت معي بتضحك ... بتخجل ... بتقهر
ع سيرة اللي بتخجل
طلعنا نسهر ونتمشى بباب توما - دمشق القديمة - طل اشي هناك حلو وتمام عدا ... وين بدي اصف السيارة ... المهم لقيت صفة ... بعد ما صفيت ولسة بدي اطفيها للسيارة ... ولا في جيب عم ترجع لعندي بدها تصف ... انا شايف ومش مصدق شو اللي عم بصير
بقول لحالي اكيد هلق الشوفير بوقف ... اكيد هو شايف السيارة
وبطلع وبستغرب اكتر .. الجيب قربت ... مديت ايدي من الشباك وصرت اضرب وادفش بالسيارة ... واخيرا وقفت ... خيي ... شعرة وكانت ضربتني
بعد شوي زبطت السيارة وضعها ... وطلت علي بنت انفها للسما ... وصارت تقلي : " مو ملاحز انك أليل زوء؟؟؟" ... قلتلها : ليش؟؟
قالتلي : انا كنت بدي اصف هون مكانك
والله فرطت ضحك ... طفيت السيارة ونزلنا نمشي ... مشينا بباب توما والقيمرية لعند الجامع الاموي
بس بتضلها الشام حلوة ... جلوة بالبيئة الدمشقية العريقة ... بس نظام السير فيها ... بلا ما نحكي احسن
انا اكتشفت شغلة ... انو كوني انا هالمرة الشوفير والقائد لهالسفرة ... هو اللي خلاني اعمل كل هالمقارنات ... الايجابية لعمان
وخلاني اعرف خيرها
يللا بكرا دوام الصيفي ... لسة ما عطلنا بلشنا دوام
انتظروني انا وكل جديدي ... ولا تقطعونا
بالمناسبة , انا و همسة عم نحضرلكم مفاجأة
انتظرونا
احمد المحروق
هناك 3 تعليقات:
الحمد لله على السلامه..اكيد اشتقنالك يا احمد ولو
الحمد لله انك بخير وانبسطت بالشام :)
يلاا بنستنا نقرأ القصص اللي صارت معك هناك لا تتأخر علينا :)
الحمدلله على السلامة, عمان طول عمرها من اجمل المدن, عمان في القلب
همسة:- الله يسلمك ... القصص مو كلها بتنحكى .. ;)
احمد:- اكيد عمان بالقلب ... عمان يا دارنا ما احلى لياليكي !!!
إرسال تعليق