28‏/10‏/2010

نصب وسرقة ... بوضح النهار !!


مرحبا يا جماعة , الحقيقة من شوي كنت قاعد مع بيت خالي - جايين من الشام - , ومن سيرة لسيرة .. حكوا كم قصة نصب وسرقة .. قصتين صاروا بحارتهم .. بعز الظهر .. وعلى عيون العالم !!


الاولى .. (دمشق)
خالي كان ماشي وراجع ع بيتهم , لقى قدام بيت جيرانهم شاحنة عم تحمل عفش .. سأل الشغيلة , قالوله والله جارك عم يرحل !
استغرب خالي .. انه جيران .. لكن خلص . صدق ومشي ... لكن طلعوا هدول حرمية عم يسرقوا البيت بنص النهار قدام العالم !!!


الثانية .. (دمشق)

بحارة بيت خالي فاتح لحام .. ادن الضهر كأنه وراح صاحب المحل يصلي وترك ابنه الصغير بالمحل .. الاب راح من هون , اجت شاحنة من هون ودخلوا عند الولد وقالوله .. هاد المحل مخالف .. ولازم نصادر تلاجة اللحمة .. حملّوا اللحمات واعطوا الولد ورقة وكذا وحكوله خلي ابوك يراجع التموين .. وطلعوا لا تموين ولا بطيخ ... حرامية !!!


الثالثة ... ( الرياض)

صاحب زوج خالتي كان راجع من الصلاة .. ولقى واحد حامل صندوق مصاري المحاسب بالشارع .. ومر من جنبه .. بس ما عطاه اهتمام .. رجع ع محله .. لقاه هاد صندوقه مخلوع ومسروق ... بعز النهار !!!


الرابعة ... (ما انتبهت وين)


قال واحد كان بالقطار .. كان معه مبلغ من المصاري , حكى لواحد جنبه .. شو رأيك تشتريهم بنصهم ؟
قلله ليه ؟
قاله لآنهم هدلون مصاري مزورة !!
التاني هداك .. اخدهم وفحصهم .. وكذا .. لقاهم مو مبينين انهم مزورين بالمرة .. بالاخير وافق واشتراهم بنص المبلغ !!

نزل الاول من القطار وبلغ الشرطة .. قلهم ضاعت شنتايتي (شنطتي) بالقطار اللي رايح ع كذا.. نوعها كذا .. ولونها كذا ..فيها مبلغ كذا

وبالفعل .. الشرطة وقفت القطار ولقت الشنتاية .. سألوا الزلمة اللي اشتراها .. هي الك ؟!
صار يحلفلهم .. لا والله مو الي .. لآنه خاف يروح فيها بما انه المصاري مزورين .. وبالفعل .. الشرطة رجعت الشنطة لصاحبها .. وهيك اخد المصاري ونصهم كمان !!!

بتمنى ما اكون تقلت دم عليكم .. تحياتي :)

هناك 15 تعليقًا:

Mad-Man يقول...

wallah 7elo ... be2ollak elle esta7u maatuoooo !!!!
ya3nee hek 3ene 3enak ??!!
la w hadak m7ammel 3afesh .. mesh 7ayyalla shee yet5abba ya3ne
saru yetfannanu hal7arameyyeh
allah yustorna o.O

Ahmad M. Al-Mahrouq يقول...

شايف يا مناصرة !!

مالواحد لما يشوف انه هيك قدام عينه .. وبعز النهار ما بيخطرله انهم حرامية !!
بطبيعة رح يصدقهم انهم عمال عم ينقلوا العفش !!


تحياتي وشكرا للمرور :)

Mad-Man يقول...

walaw ya man .... le3bete elmorooor ana :P:P:P

wlcm

Whisper يقول...

اول شي الحمد لله عالسلامه بعد غياب تقريبا شهر عن المدونه :)

اول قصه و اخر قصه سامعتهم من قبل :$

هاد الاشي اللي هالعالم شاطرين يستخدمو عقلهم و يبدعو فيه, استغلال للطاقات بس بالشر :$

جعفر حجير يقول...

أحمد ...كلها قصص رائعة.. فن و إبداع و تخطيط :)
في قصة سمعتها عندكم في الأردن و تحديدا في سحاب

ست بيت.. زوجها سائق شاحنة على خط عمان الشام.. لما بغيب عنها بغيب أسبوع كامل..
مرة و هي في البيت..دق الباب و إذا بعمال بحكولها زوجك بعثلك طقم الكنبايات هذا.. و فعلا دخلولها طقم الكنبايات عالبيت

بعد كم ساعة طلعت من البيت لمشوار.. رجعت لقيت البيت فاضي.. طلعوا الجماعة عصابة.. و داخل واحدة من الكنبايات كان واحد منهم نايم و لما طلعت الزوجة من البيت اتصل بجماعته و فتحلهم الباب من الداخل :)

Ahmad M. Al-Mahrouq يقول...

@ Whisper

أهلا ويسبر !!
الله يسلمك .. شايفة , انتي بتسافري وانا اللي بغيب !!

يعني عن جد .. عندهم طاقات هائلة بالتفنن والتفكير بعمليات النصب !!
شكرا لمرورك :)

Ahmad M. Al-Mahrouq يقول...

@ جعفر

:)

الله يجيرنا !!
شايف .. التفنن صاير شغلة هالايام!!
بس متل ماقالت ويسبر بستغلوا طاقاتهم بالشر !!

شكرا لمرورك الكريم :)

marwa joe يقول...

ymmaaaa wala had k2ena be Chicago !!

Ahmad M. Al-Mahrouq يقول...

@ marwa

اهلا مروة !!
لا تخافي .. لسة الدنيا بخير ... لول

شكرا لمرورك

الكيل بمكيالين يقول...

بصراحة آخر قصة إبداع! عجبتني كتير.
وبنستنتج من هالقصص إنه مش أي واحد بينفع يكون حرامي، لازم فيه مقومات خاصة: ذكاء - احتراف - ثقة بالنفس (ولا كأنه عامل إشي) - وتجديد في الأفكار!
مساءك سعيد :)
وحمدالله على سلامتهم.

Ahmad M. Al-Mahrouq يقول...

أهلا بالآنسة كيالة :)

شايفة والله .. يعني في مدرسة خاصة اكيد لهالشغلة .. وبيعملوا امتحان مستوى .. واذا الواحد اوكي .. بسجلوه فيها :)


تحياتي وشكرا لمرورك:)

sheeshany يقول...

شكرا ً للأفكار يا أحمد ... ميهاهاهاهاااااااااا

بس جد شو هاد :(

بس تعرف يا صديقي .. أي مهو حياتنا كلها عم تنسرق بوضح النهار و إحنا منخرطين في الشغلة من أولها لآخرها و .... حط راسك بين الروووووس!
:(

Ahmad M. Al-Mahrouq يقول...

أهلا هيثم

هي كبرنالك الخط المرة :)

شو هاد؟!... هاد بلاوي من الناس !!

معك حق .. الله بعين , وقول يا قطاعين الروس !!

شكرا لمرورك الحلو :)

w7l يقول...

بكل بساطة القانون لا يحمي المغفلين

الله يستر

w7l يقول...

شكرا على الافكار الاكثر من رائعه

ان شاء الله المرة الجاي راح اجرب بعضهم P: