27‏/09‏/2010

الحرب على "أمنية" .. ولعنة الفستق!!

أ.محروق نيوز - عمّان (:

شهدت شركة الاتصالات (أمنية) في الآونة الاخيرة حرباً" فستقية" من عدة اطراف ؛ تجار وشركات منافسة .
لفتت انتباهي البارحة عدة لافتات تقول (لانبيع خطوط امنية) معلقة على واجهات محلات بيع الموبايلات , كنت وقتها في احدى مجمعات الباصات للعودة من الجامعة , استغربت ذلك .. لكن لاحظت اللون (الفستقي) -لون امنية- مخططاً حول اللافتات , فقلت ربما يكون نوعاً من الدعاية لأمنية :)
لكني تفاجأت اليوم بازدياد عدد المحلات التي تعلق هذه اللافتة .. دخلت على احد المحلات وسألته عن سبب تعليق اللافتة , فقال لي: "لا نبيع خطوط امنية .. وبس" .. وكانت الكشرة واضحة جداً

دخلت على محل آخر .. وسألت الشاب الموجود بالمحل عن سبب تعليق هذه اللافتات , فأخبرني أن "شركة أمنية عاملة touch مع اصحاب المحلات" .. فطلبت منه المزيد من التفاصيل .. الا انه أبى ذلك , وقال ان اصحاب المحلات لا يريدون ان يعلنوا السبب الحقيقي!!
وقبل ان يكشر .. طلبت منه تصوير اللافتة المعلقة على واجهة المحل , وها هي الصورة:




على صعيد آخر , قامت احدى شركات الاتصال المنافسة بنشر اعلان على مواقع الانترنت , الاعلان عن تطبيقات Apple , وقد صورت شركة امنية على شكل فستق سوداني.. الشكل القريب من شعار شركة امنية.

______________________________________

ملاحظة:

وأخيراً .. نزلت الصورة :)

هناك 15 تعليقًا:

Dr.Mohammed يقول...

و الله للاسف شركة امنية من بدايتها بلشت بفشل ، يعني لحد الان و تغطيتها من اسوء ما يكون و حتى لو كانت التغطية 100% نوعية الخدمة بتكون سيئة جدا ، اي نعم هم من ارخص الشركات و اي نعم انا مشترك معهم و بستخدم خطهم كالخط الاساسي ، بس هاد ما بكفي ، انا دايما حامل خط تاني من اورانج في حال القطعات ، و هالقطعات كترانه هالفتره هاي

Em Ommar يقول...

بالنسبه للصوره,, شكلها كبيره إفتحا ع برنامج البيت وعدل إمتدادها لإمتداد اقل

بالنسبه للإمنيه,, انا بتعاملش معاها ف بتستاهل اللي بيصير معاها

بلال يقول...

الصورة مش راضية تنزل لأنها الشركات عاملة حري على أمنية وكل صورها :) شكلة هيك

marwa joe يقول...

غريب والله ما لاحظت متل هاي اللافته ..
ما تستعجل يا احمد بكرا بنفهم كل شي
وفعلا امنية من بدايتها باءت بالفشل ...

ملاحظة : شكرا يا محمد عل ايميل و حلت المشكلة :)

لبنــــــــــى يقول...

هلا انا برة البلد بس لما حدا يحكيني من عمان و بخط امنية
بحس حالي عم احكي مع الفضاء الخارجي و لازم افك رموز الحكي من كترة التقطيع

عجبتني قصة الفستق

orangee يقول...

طيب ليش مقاطعينها ما عرفت لهلأ؟!!!

Ahmad M. Al-Mahrouq يقول...

@ أهلا د.محمد :)
هي من جهة خدماتها سيئة .. سيئة
وحتى الانترنت .. انا معهم ,كل مرة بقول هاد اخر شهر بشترك معهم .. وبرجع بشترك

:)

تحياتي

Ahmad M. Al-Mahrouq يقول...

أهلا ام عمر :)

هي نزلت الصورة .. شكرا للنصيحة
صغرت الصورة وبعدين ارتفعت هون
:)

Ahmad M. Al-Mahrouq يقول...

@ مروة
أهلا وسهلا فيكي من جديد
والحمدلله انه زبطت قصة التعليقات عندك:)


المجمع هو مجمع رغدان (المحطة) .. لحتى مبارح ’ اللافتات موجودة :)

شكرا للمرور :)

Ahmad M. Al-Mahrouq يقول...

@ بلال

أهلا بلال :)
هي الحمدلله .. زبطت الصورة
شكرا لمرورك .. وضل تابعنا :)

Ahmad M. Al-Mahrouq يقول...

@ أورانجي

مممم ... والله متل ما قلت .. ما قبلوا يحكولي بالضبط شو صار .. بس اللي فهمته انه امنية عاملة حركة او شغلة مع اصحاب المحلات :)

شكرا للمرور .. نورت المدونة :)

Whisper يقول...

ما شفت متل هاليافطه من قبل
اذا عرفت شو السبب احكيلنا

بس هو فعلا من اول ما بدت امنيه و في مشكله بالتغطيه تبعتها و ضلت مستمره هالمشكله لهلأ

sheeshany يقول...

قبل السفر إلى السعودية -3 سنوات- كان الكل يمدح في "أمنية" ... شو السيرة؟
:)
هذا ما سيكتشفه لنا أحمد إن شاء الله

**مبروك الصورة.. إشي بيجلط صح!

Ahmad M. Al-Mahrouq يقول...

@ whisper

أهلا ويسبر
هلق هي - كانت - معلقة بمجمع رغدان !!

هلق هي بترضي الناس بالتكلفة الزهيدة تبعتها .. لكن اكيد تكلفتها تتناسب مع جودتها :)

Ahmad M. Al-Mahrouq يقول...

@ هيثم

ما بعرف ليه بيمدحوا فيها .. مع انه تغطيتها كانت بالمرة :(

هذا ما سأكشفه السنة الجاي ان شالله :)
استنوني :)

الله يبارك فيك .. قعدت الصورة حوالي الاسبوع لقبلت ترتفع معي .. يعني برد البوست وما عاد اله طعمة :(