23‏/09‏/2010

ال tag الثقافي .. بلشنا نردنة


مع بداية الدوام والفصل الجديد .. ويادوبنا عم نقول بسم الله , كلفتني الصديقة المبدعة فرح عصام بهالواجب ... انه احكي شوي عن الكتب اللي بقرأها

لهيك .. شكرا فرح لآنك تذكرتيني بهالواجب :)

اول اشي بدي اخبركم شغلة ... انا قارئ سيء .. لهيك نوعاً ما لا اجيد الكتابة .. لآنه الواحد لازم يقرأ كتير ليكبر مخزونه ويقدر يعبر صح عن الاشياء يللي بباله :)

نبلش ..

اكتر مرحلة كنت اقرأ فيها هي بالطفولة .. وبحكم اني الاصغر .. فالقصص كانت جاهزة .. اخدها من اخوي او اختي
هلق قرأت قصص كتير .. بس الاسماء اللي عالقة ببالي
عقلة الاصبع .. المائدة السحرية .. الآميرة والبجع .. أليس في بلاد العجائب ( ماحبيتها وقتها لآنها كانت بالانجليزي وانا صغير) .. وقصص كتير تانية رايحة عن بالي هلق
بس في مجلات كتيرة كنت اقرأها .. ماجد و ميكي (كانت من اخوي ايام الكويت) .. وكنت اقرأ مجلة لونا .. ومجلة احمد ومجلة الرسام.

بالمدرسة .. كنا ع طول نستعار كتب بكل اسبوع كان لازم نستعير قصة أو كتاب ونلخصه.


الكتاب المشهورين اللي قرأت شوي من كتاباتهم .. وغصب عني - لآنه كان واجب بالمدرسة - ... هو طه حسين .. كتاب الايام الجزء الأول .. والصراحة اني ما حبيته كتير

أيام المدرسة كمان قرأت (قصص الانبياء) لابن كثير .. وقرأت (رجل لا يموت) .. كتاب عن الخضر عليه السلام

بعد التوجيهي .. اشتريت 3 روايات لآغاتا كرستي .. ولقيت الروايات حلوة
اكتر وحدة حبيتها كانت القاتل الخفي .. وكنت لوقتها مفكر اغاتا هي الافضل .. لكن اللي غيرلي هالفكرة هي "ربى حجازي" .. لآنها عارتني كتاب "شيفرة دافنشي" ..لدان براون
هي الرواية ممتعة جداً .. وع طول بتدهشني .. ولهيك قررت اكمل بقية سلسلة الروايات .. بس لما الاقي وقت :)

هي عملت الواجب اللي انطلب مني .. وان شالله اكون قدمت منيح !!

هلق دور اطلب من 3 انهم يعملوا الواجب ..

الأولى .. ربى حجازي

الثانية .. أم عمر

الثالثة.. وايت فريدم

هناك 14 تعليقًا:

ربى حجازي يقول...

بصيرأحل الواجب هون ؟؟
مدونتي متوقفة حالياً ..

إمتى بديت أحب القراءة ما بتزكر ..تماماً بس بتزكر أنه هدية عيد ميلادي وأنا بصف تاني كانت مجموعة قصص من والدتي
..
وكان والدي كل يوم أربعاء وهو راجع من شغله يجيبلي مجلة ماجد

أكتر شي اتدايقت عليه بطفولتي كتاب كنت بدي اشتري من دمشق واكتشفت بعد ما طلعت من المكتبة اني نسيته فيها
..

لفترة مو بعيدة وانا اتخيل اني قارئ ماشي حاله
لكن كل ما تعرفت على قارئ جيد..وعلى كتاب جديد أدركت انه لسا ضايل قائمة طويلة من جهة واسلوب أخر من جهة في القراءة

أكتر كتاب فتح أبواب جديدة في حياتي كان الخيميائي لباولو كويلو

واكتر كتاب أحببته .. زمن الخيول البيضاء لإبراهيم نصر الله

اكتر كتاب أعطاني فائدة كتاب لعبة الادب

القراءة متعة .. وكتير احيان وانا عم بقرأ بكتاب بحس بالأسى على كتير ناس مو عارفين هالنعمة

شكرا أحمد :)

sheeshany يقول...

مرحبا أحمد،
مبروك إنك خلصت الواجب :D

عقبالي!

بالنسبة للمجلات بتوقع كلنا بنشترك في إنو قرأناها و بنهم :))

دان براون أسلوبه جميل و نوعا ً ما مختلف! بحسه ممتع و بحب أقرأله كمان.

بتمنى تصير قارئ ممتاز و تقرأ 3 كتب / شهر على الأقل :)

* لوول @ "نردنة"

Ahmad M. Al-Mahrouq يقول...

@ربى حجازي

أكيد بصير :)

شكرا لسرعة تلبية الطلب :)
مجلة ماجد كل العالم متفقين عليها .. الطفولة العربية المشتركة :)

انا بالشام مرة نسيت دوسيه .. كنت شاريها :(

الخيميائي وزمن الخيول البيضاء على قائمة الكتب اللي بدي اقرأها

شكرا :)

Ahmad M. Al-Mahrouq يقول...

@ هيثم الشيشاني

انا فكرت حالي الكسول الوحيد .. يللا في معي طشية بالصف .. لول

اه .. خصوصي ماجد .. ذاكرة طفولة كل العرب
:)

3 كتب بالشهر؟؟!!
لا باحلامك .. لا باوهامك
الا اذا بصير عمري 63.5 سنة ... وبكون على حفة قبري ومعي وقت زيادة

Whisper يقول...

كلنا احمد قراءاتنا محدوده اجمالا فما تحس حالك انك قارئ سيءوكلنا مرينا بمرحله فتور بالقراءه وان شاء الله نرجع زي قبل

"شيفرة دافنشي" انا ما حضرت الفيلم لاقرأ الكتاب لاني سمعت ان الكتاب ممتع اكتر والفيلم حيخرب هالمتعه, ولهلأ لا حضرت الفيلم ولا قرأت الكتاب :$

Ahmad M. Al-Mahrouq يقول...

أهلا ويسبر .. زمان ما طليتي :)

شكرا للدعم المعنوي :)

هلق شيفرة دافنشي .. كلمة رائع قليلة بحقه .. مدهش وممتع بطريقة عجيبة .. ما بتملي ابداً .. دايما في اشي جديد وما بتتوقعيه :)

خلص .. اشتركي بجروب قرئني كتابك ع الفيس بوك .. واستعيري الكتاب :)

الكيل بمكيالين يقول...

ما تخاف أحمد عملت منيح.
أنا كمان قرأت كتاب شيفرة دافنشي ولو تتصور من كتر ما شدني ضليت سهرانة أقرأه لحد ما خلصته ب 3 أيام، ممتع وما كنت بتصور إني راح أحبه هيك لإني مش كتير بحب هيك نوع من الكتب.
تحياتي وحظا سعيدا في الفصل الدراسي الجديد:)

Ahmad M. Al-Mahrouq يقول...

اهلا انسة كيالة

وانا متلك بالاول .. بس خلصته باسبوعين تقريباً :)

شكرا الك :)

marwa joe يقول...

NICE HOMEWORK :)
all of us who were born in late 80s or awal el 90s read the same books :)
but for me i think yr choices were gr8 , agatha christee and dan brown are of my favorites :) u must read all dan brown's books , they are super cool and interesting :)

Ahmad M. Al-Mahrouq يقول...

thanks a lot Marwa ... I totally agree with u
:]

ummmm :> ... for sure i will
:)

thanx a lot (",)

أشرف محيي الدين يقول...

صديقي أحمد

القراءة شيء جميل ولكنها تزداد جمالا عندما نقبل على مايتقاطع مع ميولنا واتجاهاتنا في هذه الحياه ، ومع أن تنوع القراءات شيء جيد ولكن البداية الصحيحه تكون مع المواضيع التي تهمنا ، ولذلك يا صديقي إبحث عن ما سيجذبك من كتب تتناول اتجاهات ترغب في التوسع بالمعرفة عنها أكثر وهكذا ستجد نفسك تنتقل من كتاب إلى كتاب ودون أن تشعر بالملل مطلقا .

أتمنى لك كل التوفيق في قراءاتك القادمه :)

كل الود

نيسآان يقول...

مساء النردنه

ذكرتني ايام الجامعه لما كنت اروح استعير كتب من المكتبه ما الها علاقه بالدراسه كانوا صاحباتي يشقولني بنظرات من فوق لتحت وكاني جايه من المريخ ....مع شويه تعليقات من نوعية"اجت المسئقفه وراحت المسئقفه"
وكأنوا "السئافه" صارت عيب
لما خلوني اشعر اني نيرد عن جد

Ahmad M. Al-Mahrouq يقول...

أهلا اشرف :)

القراءة بالفعل ممتعة .. بس المشكلة انه نوعا ما , مافي بركة بالوقت .. بسرعة بيمرق , ويا دوب نعمل واجباتنا .. :)

انا نوعاً ما بطبق نصيحتك .. بحب الروايات اللي فيها غموض وتشويق اكتر اشي .. بعدين بحب الكتب الدينية .. مش الاسلامية .. الدينية . بقرأ عن المسيحية والاساطير اليهودية الخ .. لهيك حبيت شيفرة دافنشي .. لآنها رواية مشوقة وغامضة وبتحكي عن هاي الاساطير الدينية :)

تحياتي

Ahmad M. Al-Mahrouq يقول...

@ نيسان

مساء النردنة المتنردنة :)
مش احسن انه نكون بلا "سئف" يحمينا ؟؟!!

انا لقب نيرد عني ع الفاضي .. بس سيط غنى ولا سيط فقر :)