02‏/12‏/2012

يوميات مهندس مدني

السلام عليكم, شهور كتير مرقت من آخر مرة دونت فيها, صار فيها معي قصص كتير بتمنى لو كنت قدرت اشارككم فيها متل زمان, لكن الاشي اللي ما بينكتب بوقتها ببطل اله معنى لو ينكتب بعدين.

لكن الحدث الأبرز اللي صار معي اني تخرجت والحمدلله من الجامعة وصرت مهندس مشروع مقيم, وبالشغل وبهالمدة القصيرة اللي دوبها ح تصير 3 شهور تعلمت شغلات كتير.

أحلى شي تعلمته انه العمال أبداً مش الناس الهمج واللي مسباتهم ع لسانهم وتصرفاتهم سيئة متل ما كانوا يصورولنا ياهم بالجامعة وقبل, انه كنت ماكل هم كبير قبل ما ادخل ووجدت العكس تماما.

العمال وبصدق متل الأطفال, بيفرحوا بأبسط الأشياء... ومع انه الكل يكبرني بسنوات والمعظم منهم آباء إلا انه دايما بحسسوني بأني أنا ابوهم .. أو استاذ المدرسة تبعهم وهم طلابي.

بعد أول اسبوع تقريبا ً وأنا عم بعمل تشييك ع الحديد اجاني عامل حداد, بقلي" مش انت ساكن عند مسجد الايمان" .. بقله صحيح, بقلي شفناك يوم الجمعة هناك وقلتلهم هاد المهندس بس ما صدقوني.

ذكرني كيف كنا نفرح بأنه شفنا الاستاذ مر من حارتنا او انه شفناه خارج سور المدرسة.

بيفرحوا كتير لما آخدلهم صورة بجوالي, وبتصير ضحكتهم من الدان للدان لما يشوفوا حالهم بهالصورة.

ومرة اضطريت لأروح ع ورشة تانية, وأخدت عامل معي بالسيارة, ركب وصار يقاهر بالباقيين انه انا قاعد بسيارة المهندس.

وأكتر مرة حسيتهم فرحوا فيها .. وخجلت جداً من حالي وقتها انه ماطلعت مني قبلهم ..  انه عزموني معهم ع الفطور وأكلنا فلافل سوا .. وشربنا شاي مصري حاطين فيه شوال سكر.
لما سألتهم ليه هالقد بحطوا سكر  بالشاي؟! .. قالولي بكفي الدنيا مرة.

وبهال3 شهور إلا كم يوم .. المشروع قرب يخلص :)



هناك 10 تعليقات:

Whisper يقول...

اول شي الف الحمد لله على السلامه نورت المدونه المهجوره

تانيا الف مبروك التخرج و راح نغطرش عن الحلوان و الحفله

ثالثا.الف الف مبروك الشغل و هاد بدنا حلوانه :)ﺡ
الشغل تجربه جديده و فريده غير عن التجارب اللي قبلها من مدرسه و جامعه
بتصقل الشخصيه و بتغير مفاهيمك و نظرتك لكتير شغلات بالحياه

بالتوفيق يا رب

Ahmad M. Al-Mahrouq يقول...

@Whisper

الأولى دوما ً :)

الله يبارك فيكي والله يسلمك ههه والله لازمني هاليومين نفضة مرتبة للمحل حتى نعيد الافتتاح :)

جد الشغل تجربة مميزة .. والشغل بمجال دراستك خصوصاً يختلف تماما عن أي عمل حر اشتغلتيه قبل
وبتحسي انه مافي شي كان ع الفاضي :)

وبصدق وعن جد بتغير نظرتك لكتير أشياء بهالدنيا

شكرا ويسبر ^_^

نيسآان يقول...

نورت المدونه أحمد :)
مبروك التخرج والشغل و منها للاعلى ان شاء الله .
سؤال صغير:
كيف اسعار الشقق عندكم؟ :P

Ahmad M. Al-Mahrouq يقول...

@نيسان
هاد نوركم .. تسلمي :)
الله يبارك فيكي ان شالله

والله الاسعار عالية شوي عندهم .. 120 الف للطوابق التكراري ... و 150 للأرضي

Em Ommar يقول...

مبروك يا مهندس
اسمك منور ع القارمه

Ahmad M. Al-Mahrouq يقول...

@Um Ommar
الله يبارك فيكي .. ههه ما انا مصورها عن قصد :P :P

عقبال عمر ما يتخرج من الجامعة ويشتغل :)

Em Ommar يقول...

يسعدك يارب
اليوم اول إمتحان بحياته بياخده
هههههههههههه
يارب يكبر ويطلع من الصالحين أهم من الهندسه
وبعدين يا مهندس يا طيار يا دكتور
المهم يكمل علامه ههههههه

Ahmad M. Al-Mahrouq يقول...

آميييييييييين يارب
وان شالله تشوفيه من احسن الناس
:)

sheeshany يقول...

better late than never... but I just came to yr blog space to see if u had any new posts
:)

------------
قالولي بكفي الدنيا مرة <--- they often say this phrase

Ahmad M. Al-Mahrouq يقول...

@Haitham Jafar

Hehe unfortunately I didn't post any news.
But, let me thank u for passing by ;)