18‏/07‏/2010

وما أدراك ما البوليتكنك ؟؟!! الجزء 2

يا جماعة اشتقنالكم .. مو شوي .. كتير والله .. بس فترة امتحانات هلق :)

قبل كم يوم قررت انا وصاحبي "شهاب" انه ندرس لامتحان التحليل الانشائي .. للاسف وقت البريك تبعنا بيجي بحدود 2 ونص .. ومع انه لازم المكتبة (المكان الوحيد المكيف واللي مسموحلنا نقعد فيه) تسكر بوابها ع ال3 ... ما بدخلونا لآنه الموظفين المحترمين بيهربوا .. فقررنا نقعد بسكوير بالجامعة .. واحنا مركزين وعم نحل.. في حشرة عم تجنني .. كشيتها وانا مركز
ورجعت احل ... بعد شوي حسيت كأنه انا المحقق "توغوموري" ... وكونان ضربني بهديك الابرة .. قلت لشهاب وانا بصرخ : انقرصت !!

قمت وقفت .. قللي لآ ما في اشي .. انا نفسيا اعتقد اني ما انقرصت مع اني عم اتوجع .. بعد شوي راح قللي ما تتحرك .. وانا وقع قلبي وصار بين رجلي .. طلعت النحلة عم تعمل جولة ع رقبتي ... وما بعرف كيف شالها شهاب وضربها :)

المهم .. ورحنا ركض ع الوحدة الطبية العتيدة اللي عنا .. وانا بقله مافي امل الساعة 3 ... سكروا .. قللي لآ الاسعاف لازم يضله شغال (مفكر حاله بعده بالامارات) ... وصلنا لقينا بالباب مسكر .. رح دقه وفتح .. انا رجعلي الامل .. دخلنا لجوا العيادة بس طلعوا مسكرين الباب الداخلي .. المهم شافنا موظف وشاف رقبتي قللي الشغلة مو مستاهلة .. حط توم عليها وبمشي الحال!! كنت بدي اقلله "بالله عليك" بس استحيت وضليت مكمل يومي للساعة 6 المسا .. ولما روحت ع البيت مرقت ع الصيدلية ووصفلي مرهم .. وقللي النحلة هاي دلوعة .. مش قارصتك منيح !!


السؤال من هالقصة .. شو الهدف من انه يضل دوام الطلاب لل6 .. وكل الموظفين بروحوا ع ال3 ؟؟؟
يعني لا مكتبة ولا تسجيل ولا عيادة .. ولا شؤون ولا حدا بكون مداوم غير احنا والدكاترة اللي عليهم محاضرات؟؟
طيب بركي حدا صار معه حادث عاجل بالجامعة شو يعمل؟؟
انا طلعت قصتي سليمة ومش هالقصة الكبيرة بس غيري لآ .. بتذكر صاحبي يللي مات بالهاشمية السنة الماضية والسبب لآنه الاسعاف تأخر عليه .. طيب شو يعملوا عنا اذا مافي اسعاف اصلا؟؟

ودمتم سالمين :(

وهاي صورة النحلة بعد ما قتلها شهاب

هناك 27 تعليقًا:

Dr.Mohammed يقول...

اول شي سلامات و الله عليك و على النحلة ، و احلى تحية لابو شهاب البطل :))

بصراحة هاي مأساه بحد ذاتها ، يعني سيبك من الدكاتره او من الموظفين او من الادارة المأساه بالمركز الصحي ، يعني لو اي واحد راح يصيرلو اي اشي راحت عليه ، يعني مثلا انت شو كان راح يصير فيك اذا عندك حساسية للنحل ؟! (طبعا لا سمح الله ) او اقولك حتى لو المركز الطبي مفتوح انت كتخيل راح تلاقي فيه ادوية لازمة لعلاج مثل هيك شغلات ؟ أشك بذلك!

visible... يقول...

السلام عليكم ....

ان شاء الله هذي آخر قرصة بحياتك
والله يرحم النحله ماتت بعز شبابها ....

أذا انتوا ينتهي دوام الموظفين المهمين الساعه 3 معناته انتوا احسن منا ...
عندنا الساعه 2 مافي احد غير الدكاتره واللي عندهم محاظرات
والمكتبه صار فيها تطور صارت تسكر الساعه 4

نيسآان يقول...

الحمدلله على سلامتك ....لازم يفتحوا بالجامعه محل خضار ... شرط يبدا دوام بعد الساعه تلاته عشان الحالات الطارئه:) ثوم,حبة ليمون أو حتى بصله اذا واحد اغمى عليه ....بتنفع:)

Whisper يقول...

الحمد لله على سلامتك...ومنيح ما كانت النحلة شرسه و قرصتك

الله يعينكم على هالجامعه, كل يوم ببين اشي جديد اسخم من اللي قبله

الله يرحم عبدالله و يتقبّله....ما بتعلمو بالمرّه هالعالم

أشرف محيي الدين يقول...

سلامات يا صديقي

منيح إنو النحله طلعت دلوعه :)

على فكره النقطة اللي بتحكي فيها مهمة جدا وبعتقد إنو بعض المرافق الجامعية مثل العياده أو المكتبه من المفروض إنو دوامها يكون مرتبط بدوام آخر شعبة طلابية في الجامعه .

نهارك سعيد

Em Ommar يقول...

لا تكبرها ولا على بالك
خلي معك بالشنطه" متل شنطه جوي اللي بمسلسل فريندز" توم وبصل و بهارات لزوم وصفات الإسعاف عندكو
وأزا معك مجال,, إحمل بخاخ بف باق و مكيف نص طن,, شو ورالك

sheeshany يقول...

أنا حأشكيكما لجمعية الرفق بالحشرات، كانت عم تمزح معك يا زلمة و الدليل إنو القرصة كانت خفيفة :]]]]]

هذا البوست دليل واااااضح و جليّ على أن ّ دراسة الامتحانات -و الدراسة بشكل عامّ- شيء مضر بالصحة. أرجو التعميم :P

* واضح إني كثير مركّز على قصة البوست :]

سلامات أحمد و الله يرحم صديقك و يجعل مثواه الجنة.

-_- يقول...

لا حول ولا قوة الا بالله

الكيل بمكيالين يقول...

اول شي حمدلله عالسلامة
ثاني شي كل اللي حكيته عادي وطبيعي ولا كيف بدك تعرف انك عايش بالاردن؟
لو التسجيل مدوام والعيادات والاسعاف واي حدث مفاجئ بينحل بسرعة كان صار الوضع مثالي وممل وفقدت الاردن نكهتها، تصرفات الاهمال المطلق جزء من هويتنا وشخصيتنا. شو بتحكي يا زلمة!

Ahmad M. Al-Mahrouq يقول...

@ Dr.Mohammad
زميل كلية الحسين العزيز .. خلص تحياتك للعقيد وصلت والله يسلمك :)

المشكلة انه الحشرات منتشرة بشكل مش طبيعي عنا بالجامعة .. كله قلة نظافة .. لسة في ناس بتبوسهم النحلة .. بتكون واقفة ع علية البيبسي تشرب معهم !!

Ahmad M. Al-Mahrouq يقول...

@Strawberry

شكرا الك .. بس القرصات ع الطريق ما تخافي :)

انتي بالسعودية صح؟؟؟

يللا عقبالنا ما تصير المكتبة تسكر ع ال4 .. هي بالدوام العادي بتسكر ع ال5 .. بس هلق بالصيفي لل3

شكرا للمرور

Ahmad M. Al-Mahrouq يقول...

@ نيسان

والله فكرة .. قولتك .. واكيد رح يمشي سوقه !!

لآنه اصابات العمل عنا كترانة بهالصيفي

شكرا لمرورك :)

Ahmad M. Al-Mahrouq يقول...

@ ويسبر

الله يسلمك .. هاي لطيفة وهيك .. كيف لو شرسة .. كان ما كتبت هالبوست :(

تسلمي ويسبر .. آمين
وما تشوفي شر

Mad-Man يقول...

والله يا ابو حميييد الوضع مزري ...
يعني فكرك من ايش النحل بييجي .. ما تقللي من حلاوة الجامعة وكتر حقول الورووووود اللي فيها, كلهم وردتين عند 17 ... ما احنا فيها وعارفين ;)
يعني ما بتمشي متر بالجامعة الا في شتلة ورد .... اااا قصدي كووووم زبالة ... اللي بالمحصلة كل النحل الموجود بسببه ...
بالاخير القرصة مش مستاهلة كل هالطنة والرنة .. حط تووووم وحل عنّا ياااه
ههههههههه

Ahmad M. Al-Mahrouq يقول...

@ أشرف

الله يسلمك وما تشوف شر ان شالله :)

غير قصة الدوام .. الاهمال بالنظافة مش طبيعي.. ولا الحشرات هاي وين بتكون .. كلها ع الحاويات متجمعة .. وأول ما تشوفك بتيجي تبوسك .. بس انت وحظك انا نحلتي لطيفة كانت ,,, الله يرحمها :)

شكرا لمرورك

Ahmad M. Al-Mahrouq يقول...

@ هيثم الشيشاني

لااااااا يا صديقي .. كله الا هالجمعية بتروح بتسلط علينا كل حشرات الدنيا بعدين :(

معك حق .. هو لو ما في امتحان كان ما درست وكان انتبهت للنحلة قبل ما تقرصني ويصير اللي صار :]


الله يسلمك وما تشوف شر ان شالله

Ahmad M. Al-Mahrouq يقول...

@ ام عمر

قولتك والله .. لازم كل واحد يجيب سلاح معه .. ويجيب شنطة اسعافات أولية .. ويعتل كم شغلة من البيت تحسباً لآي طارئ!

تحياتي وشكرا لمرورك :)

Ahmad M. Al-Mahrouq يقول...

@ شرم

شكرا لمرورك :)
تحياتي

Ahmad M. Al-Mahrouq يقول...

@ الآنسة كيالة :)

الله يسلمك يارب .. ومعك حق الاهمال هويتنا .. هو الاهمال مش من طرف الادارة بس .. بس الطلاب في قسم منهم ما براعي النظافة ولا براعي انه بجامعة أصلاً .. تحياتي

Mad-Man يقول...

والله يابو حميد الوضع مزري ....
ما بتمشي متر بهالجامعة الا وفي مزهرية, قصدي كوووم زبالة ... اللي ما بجيب نحل طبعا
بعدين ياخي عاملي فيها طنة ورنة ....
حط توم وحل عنا ... بيكفي الولمة نصحك مش عاجبك كمان ;)

Ahmad M. Al-Mahrouq يقول...

@ احمد مناصرة

ما هو هاد لب المشكلة ... النظافة

يعني لافي هالورد ولا هالحلاوة ع قولة .. كلها كوام زبالة !!

ع قولتك .. مش مستاهلة

لبنــــــــــى يقول...

لا لا سلامات
بس شكلها كانت دايخة من الحر
على فكرة بالتكنو كان النحل متكوم و عادي بين البشر بس كان نحل برستيج كتير ماكان يخليني اتهنى بالنسكافيه الصباحي من الكافيتيريا لازم بس بدي اشرب الاقي نحلة جوة الكاسة
و بدون سكر

و بالنسبة للمركز الطبي
انت عن جد بالتكنو او بالبوليتكنك ؟

Ahmad M. Al-Mahrouq يقول...

@Jafra

الله يسلمك يارب
حتى بالتكنو؟؟ بس ع الاقل عندكم نباتات و وروود وشغلات حلوة تجذب النحل :)

ليش بالتكنو الوحدة الطبية بتروح بكير كمان؟؟؟


تحياتي

visible... يقول...

مرحبا :)
اي سعودية :)

على سالفة النظافه هذا الشي سمة من سمات العرب في كل مكان
عندنا نفس حالكم الطالبات ما كأنهم امهات المستقبل عادي المكان مو بيتهم علشان يهتمون بنظافته
لكن الحمد لله العاملات متوفره بشكل كبير وشغلته بس تنظم وراهم ( اعوذ بالله من هذولا الطالبات )

عندي قاعده اللي مايهتم بنظافة مكان ثاني ( غير بيته ) معناته هو وسخ حتى في بيته...

احمد تبي نحل بيتنا ارسله لك بالبريد السريع ...
بيتنا دائما يجذب النحل ؟؟
حاليا خلية نحل صايره في النخلة لكنهم طيبين بصراحه مايسوون لنا شي ( الله لايغيرهم علينا )

Ahmad M. Al-Mahrouq يقول...

أهلا وسهلا ستروباري فيكي من وين ما كنتي !!

معك حق .. النظيف ببيته نظيف في كل مكان .. بتذكر كيف شفت عنا هون بالاردن وحدة من شرق اسيا .. ضلت حاملة المحرمة (منديل) بايدها لوصلت للحاوية ورمتها .. عنا لو كانت الحاوية جنبه بكبها براها...

بكفينا النحل اللي عنا دخيلك .. تتهنوا بالنحل والعسلات :)

..★.. يقول...

يمكن النحلة شمت ريحة عطرك :)
وقرصتك لانها حبتك هههههههه

اما الدوامات الي تخلص قبل وقتها هذا أساسي ليه انت متضايق الكل نفس الحاله :)

Ahmad M. Al-Mahrouq يقول...

@فريدم

ومن الحب ما قرص!!
لول

هاي سمتنا اللي مارح نغيرها .. دايما بدنا نضحك ع العالم نروح بكير ونداوم متأخرين ... عرب