من بعد اللي صار معي .. تأكدت بأنه الاحصائيات اللي بعملوها بالاردن ما الها اي صلة بالدقة والصحة!!!اللي صار انه اتصلت فيي وحدة من شركة (XXXXXX ) للاحصاءات .. بتقلي انها بدها تاخد من وقتي ربع ساعة بس وتسألني كم سؤال
انا طبعاً انبسطت .. وقلتلها تفضلي
بلشت تسألني انت بتابع تلفزيون من الساعة 6 الصبح للساعة 9 الصبح .. قلتلها لآ
بعدين قالتلي .. بتابعه من 9 الصبح لل 12 الضهر .. قلتلها بدي اريحك .. مابحب اتابع تلفزيون .. وقلتلها انه هي انا قاعد بالبيت وطافيه للتلفزيون !!!
قالتلي مو مشكلة ..
طيب شو القنوات اللي بتابعها .. رجعت قلتلها ما بتابع تلفزيون
بعدين صارت تعددلي قنوات .. واقلها آه ولآ ... نص القنوات ما بتابعها بس حتى تخلصني صرت اقلها اه بتابعها ..
بعدين صارت تعددلي برامج .. قلتلها والله مابتابع تلفزيون .. قالتلي مارح اخد من وقتك بس قللي ع البرنامج اه او لآ
بالاول .. ضليت اقلها لآ لآ لآ .. بعدين حكت برنامج قلتلها آه بتابعه ... راحت قالتلي أي ساعة بتابعه؟؟؟
انا انحرجت لآني مابعرف متى بيجي .. رحت قلتلها .. ليه هو متى بينعرض؟
قالتلي ع ال7 المسا وع ال 11 بالليل كأنه .. قلتلها لآ بفضل 7 المسا
وضلينا على هالحالة ربع ساعة .. وحسيتهم مليون سنة
ونص المعلومات اللي اعطيتها ياها غلط .. لآنها من البداية ما ردت علي وانا بقلها ما بتابع تلفزيون !!!
شكلها بدها تعبي استبيان وتخلص .. صح أو غلط .. المهم بدها تخلص
هناك 24 تعليقًا:
أهمّ شيء تعبئة الاستبيان، شو نوع المعلومات مو مهم لأنو ما حدا بيقرأ ورق :)
إيييييييه... 15 دقيقة ضائعة من العمر.
شكرا اخ هيثم
عنجد المهم عندها كان تعبي الاستبيان مهما كانت المعلومات مضللة !!
هلق وقفت عالربع ساعة ؟!!
شكرا لمرورك مرة تانية .. وعيدها
آسف احمد حمدان .. يبدو اني محيت تعليقك بالغلط .. المهم التعليق كان:
Ahmad Hamdan ترك تعليقًا جديدًا على رسالتك "احصاءاتنا دقيقة":
"بالنسبة إلي الحل المناسب تسكر الخط بوجهم وأنا هاد صراحة اللي راح أعملو لو حدا أتصل علي من هالنوعية "
__________________
متأسف مرة تانية :(
لو كنت عارف انها رح تلعيلي قلبي هيك كان ماقبلت احكي معها من الآصل
شكرا لمرورك :)
طيب السؤال اللي بطرح نفسو هنا الا و هو : انت حكيت انك انبسطت ، لماذا ؟!! :)))
لا المهم ، على فكرة انا مرة شاركت باستبيان و في كان سؤال اي من الشركات الشرق اوسطيه الغير ربحية تعتقد انها الافضل في المنطقه؟ طبعا محسوبك ما بعرف و لا شركة فطبعا صارو يحكولي لازم تعبي واحدة على الاقل و بالاخر اعطوني خيارات ! تخيل ! يعني بسالوك عن رايك و بعطوك خيارات الو كمان!
فيا معلم انسى موضوع الدراسات تبعتنا اخريتها لابو محمد تبع الترمس
انبسطت انهم بدهم ياخدوا رأيي :)
بس طلعت بدها تعبي بيانات من دون ما تهتم بصحتها :)
السؤال المهم .. شو ح يستفيدوا من هالاستبيان؟؟؟
شو يعني انه الناس بتحب الام بي سي وما بتحب جاي تي في؟؟؟
شكرا د.محمد لمرورك :)
انا دايما بس يحكو انهم عملو احصائيات و بحطو نسبة من الشعل حكى اشي, بسأل كل العيله وكل صاحباتي حد سألكم, بحكولي لأ, و كل مرّة هيك انا كنت متوقعه انهم بختارو نفس المجموعه و بسقطو رأيهم على الشعب
بس هيهم طلعو الاخوان زي شرطي المرور معه دفتر مخالفات واخر الشهر لازم يكون مخلصه, فهمه بس لازم يعبو كزا استبيان باليوم و مش مهم الاجابات
الله يعطيهم العافية والله :$
@ ويسبر
ع فكرة .. نفس الشركة حكت معي السنة الماضية .. بس وقتها قلتلهم تحكوا معي كمان شوي .. بس ما رجعوا اتصلوا
ابصر من وين لاطشين رقمي وكل سنة بيحكوا معي :)
عن جد الله يعطيهم العافية للجماعة بشتغلوا من قلب ورب !!!
شكرا ويسبر لمرورك :)
والله يا عمي هذه تريد فقط أن تحصل على النقود حيث بحسب عدد الذين قاموا بتعبئة الاستبيان يقوم المعنيين بالموضوع بإعطائهم النقود.
والمعنيين أي شيء في أي شيء يريدون الانتهاء من الموضوع ليعملوا على إرسالها للمعنيين أيضا من أجل النقود
فحياتنا كله نقود بنقود يبدو.
الله يسترنا من النقود والإشي !
تدوينة مهمة أخي الكريم
صباح الخير أحمد
على فكره أسلوب الاستبيان الاحصائي عنا عمرو مارح ينجح لأنو المشكله الرئيسيه هي في سوء اختيار الفئه المستهدفه من الدراسه بمعنى آخر لو فرضنا إنو الاستبيان كان لمعرفة البرامج الاكثر مشاهده على قناة تلفزيونيه معينه فمن المفروض اختيار الفئه المهتمه بالتلفزيون بشكل كبير ولكن زي ماقلت أخي أحمد إحصاءات فعلا دقيقه :)
كل الود
@ م.ابراهيم صفا
طيب ما يدفعولهم فلوس من دون مايتصلوا .. يعني كان تعبي من عندها الاستبيان بدون ما توجع راسها بالحكي .. هيك هيك المعلومات غلط اللي اخدتها .. غير هيك الفلوس بتعمل اي اشي .. يعني القناة بتدفع لهدول الناس حتى تكون هي الأكثر مشاهدة بغض النظر عن الحقيقة!!!
شكرا لمرورك :)
@ أشرف محي الدين
طيب هم كيف بدهم يعرفوا الفئة المستهدفة؟؟
ع كل انا من الاساس قلتلها اني ما بتابع .. بس أصرت على انها تاخد أقوالي :)
شكرا لمرورك:)
هي زياره بزياره :)
لووووووووووووول,, لو إنها وقعت معي,, كان حرمتها ترن ع ارقام عشوائيه
مافي غير mbc MAX و FOX Movie وكم قناه اقلام وقنوات الاخبار اللي بعرف اش بيعرضو,, اما مسلسلات وقصص طرمه,, لا مافي من هالحكي
سلملي عليها المره الجاي ;)
هلا ام عمر
نورتينا :)
انا المشكلة ما بفتح تلفزيون لما اكون لحالي .. بحضر اللي بحضروه اهلي من دون ما افهم شو بيحضروا
الله يسلمك .. اذا اتصلت السنة الجاي ع الاستبيان الجديد بسلملك عليها :)
ذكرتني بالتعداد السكان اللي قبل شهرين عندنا لدول الخليج بشكل عام مسوين احصائية في كل بيت يزورونه علشان التعداد السكاني وفي بيوت ماوصل لهم اي شخص من عند الاحصائية
واكيد الاحصائية النهائية مالها فايده
مع الاسف الدول العربية متشابهة في هذا الشي
يعني من البداية قلت انك ماتحب التلفزيون ليه عوار القلب ونغني ياليل ماطولك :)
ملاحظة : شكر على tag اول مره يحصل وعن قريب اعمله :)
انا هالأشكال كل يوم والتاني برنولي جرس البيت بدهم ايعبو استبيانات وانا مالي ومالهم حلو عني دايمن بكون يا نايمه بفتح الباب نص عين فاتحه والنص التاني مغمض والحجه تبعتي عشان ازحلقهم في عندي ضيوف جوا ممكن تيجوا بعدين وبرجعو تاني بحكيلهم انا مشغوله ممكن تيجو بعدين ودايمن بعدين لين ما زهقو مني
بس انت صحيح ايا قنوات بتابع ؟ ههه
أنا ما بقدر أقول الإحصاءات غلط أو صح
أصلو أنا ما عمري فشيت قلب موظف وعبيت إستبيان.. ما بحب أوجع راسي.. حتى مره حكو معي من شركة فاست لينك وصار الموظف بدو يسأل ويستفسر انا قلتلو معلش بس أنا مضتره اولك مع السلامه عندي إمتحان بكره وعم أدرس..
بس أنا بسمع من ناس كتيس إنو ما بصدقو حد يقلهم عبي إستبيان ببلشو نغاشه وعرط بالتعبايه.. فإزا هدول في منهم كتير أكيد الأرقام حتكون غلط..
@ Jarat 3asal
نورتينا .. زمان عنك :)
هلق انا من مرة وزهقت وحرمت اعيدها.. كيف دايما و عالبيت؟؟!!
جد الله يعينك
شكراً لزيارتك وعيدها :)
@ رولا
أهلا أهلا .. كيف دبي؟
ان شالله انبسطتي
هو هيك احسن انه نعتذر عن عمل الاستبيان بلا وجعة هالراس
شكرا لمرورك :)
@ white freedom
معك حق .. بظن الدول العربية كلها ما بتعرف تعمل احصاءات دقيقة ..
وع قولة ويسبر معهم دفتر بدهم يعبوه .. كيف؟؟... ليش؟؟... مابعرفوا!!
شكرا لمرورك نورتينا :)
استطلاعات الرأي من اهم الاشياء في العالم
@ sharm
بالتأكيد :)
شكرا لمرورك
مرحبا....
العجيب ان في البداية قلت ماتتابع فكيف بيكون في استبيان لفئة ناس ماتتتابع برامج تلفزيون وخرابيط !!!
اضحكتني سالفتك ... :)
بالنسبه للاحصاءات
مره مر عالبيت موظف احصاءات وكان في شي 20 بني ادم في البيت - وهاد رقم حقيقي مش مبالغه-
بيحكي اخوي انو الزلمه انصدم لانو مش معقول كل هالعدد من عيلة وحده لحد ما خوي فسرلو القصه
!!
مش عارفه ليه اتزكرت ايام ما كانو يععطونا استبيان نعبيه ايام الجامعه وكنا نغشو من بعض :)
@ ستروبري و مياسي
آسف للتأخير بنشر التعليق والرد بس كنت مسافر :)
هو الموضوع عن جد بضحك
انه قلتلها ما بتابع تلفزيون .. بس هي أصرت تاخد اقوالي :)
واحنا كمان
بالجامعة اول مادخلت اسجل فيها واعطونا الاستبيان
قعدت مع صحابي نعبيه !!!
شكرا لمروركم وتعليقكم :)
إرسال تعليق