بعد التحية,
انا هالمرة عم بدوّن من جامعتي البلقاء ... مش عارف كيف زابط النت اصلاً
المهم ..انا حابب اكتب عن عدم التنسيق اللي صاير عنا بالجامعة ...
امتحانات الفيرست كان المفروض تبدا ب 14/3 ... ولسبب ما ما بعرفه .. تأخرت الامتحانات وبلشت بـ 28/3 ...مما ادى بدوره الى تقليص الفترة بين الفيرست والسكند ...فأنا من يومين بس خلصت فيرست ... واليوم كان عندي اول امتحان سكند ..
بس مش هاي القصة ... القصة انه بامتحانات الفيرست كان في تعارض مش طبيعي بالامتحانات ... واكبرهم تعارض الديناميكا والفلويد والنقل ... هالتعارض كان عند اكتر طلاب السنة التانية والتالتة .. وتقدم الطلاب بشكاوي عديدة على هاد الاشي ...
المفاجأة ... لما نزل جدول السكند ... ناقلين الجدول حرفياً عن الفيرست ... وكل التعارضات ضلت متل ما هي ... يعني ما اعتبروا من الشكاوي الماضية ... طيب في حدا بنزل مادتين تخصص لنفس القسم بنفس اليوم ؟؟؟
بس كمان هالشغلة بلعناها ... الوقت الحالي هو فترة تسجيل الصيفي
الحمدلله ... المرة الموقع معي اشتغل تمام وما كان عليه مشاكل ... المشكلة بالجدول تبع الصيفي ,,, انا لازمني مادتين بشدة شديدة ... ومش لحالي بدي ياهم ... اغلب الطلاب بدهم ياهم .. واللي منزل الجدول الله ... الله يسامحه ... تارك كل اليوم فاضي ومنزل كل المواد بساعة وحدة ... ذكرني المسرحية ... "سايبين الشقة كلها وقاعدين فـأوضة وحدة؟؟" .. اغلب المواد نازلة 3:35-4:35
من بينهم المادتين اللي بدي ياهم ... فأضريت انزل وحدة منهم ... ومادة تانية مش كتير مهمة و3 لابات .. ودوامي من ال8 الصبح لل 6 المسا ... بالله عليكم مش جدولي بجلط ,, خصوصي بالصيف ... رح انهلك ...
هاي بعض مآسينا بالبوليتكنك !!!
________________________________________________________
شغلة ما دخلها بالموضوع:
مبارح رحت مع صاحبي ع كشك بابجامعة لنشتري بطاقة موبايل .. وكانوا معلقين ارقام مميزة بشكل مش طبيعي
قلت لحالي بشتريلي واحد جديد مشان مشروعي الجديد تبع التصميم... سألت عن سعر هاد الرقم 079X0000XY ... ولا طلع هو ب 300 دينار ... وقال هو رخيص لآنه مستعمل كمان
صاحبي بقول للبيايع .. ليه انا شاري قطعة ارض؟؟؟
_______________________________________________________
ودمتم سالمين
هناك 4 تعليقات:
والله يا احمد اجمالا كل جامعات هالبلد كوم و جامعتكم كوم تاني بقصصها
قصه التسجيل هاي مكرره بكل الجامعات, والكل بواجها
الطالب مش معني بالموضوع و مصلحته مش مهمه بالمره
شو دخل الطالب وليش ليحملو همه اساسا؟؟؟ هو يجي يسجل ويدفع الفلويس والله يسهل عليه و بتمنو ما ينجح ليدفع اكتر
الله يعينكم والحمد لله اللي خلصت هالقصص من زمان
هههههه ضحكني السعر كتير
احنا بهيك مواقف بنسأل البايع "ليش؟؟؟في معاها دونم ارض يعني؟؟؟"
هههههههههههه زكرتني بحالي أيام الجامعه.. كان في فصل عندي إتنين وأربعاء محاضره ٨-٩:٣٠ والتانيه ٣:٣٠-٥ كان بريك طويل كتير بس صدق كان يمر بسرعه :)
مره كان عندي امتحان فاينال ٧-٨ والله كنت حنام وأنا بحل هههه..
يلا فصل وبمشي :)
الموضوع التاني بقدر أحكي كلمتين.. رزق الهبل على المجانين..
هلا ويسبر
عليكي نور ... بالضبط جبتي الزبدة
الطالب آخر همهم
هلا رولا ... واااااااااااااااال
انا بساعة البريك بطق
المهم متل ما قلتي ... فصي بمر
الله يخلصني من هالقرف بسرعة ... :(
إرسال تعليق