22‏/05‏/2009

اوهام واحلام


صحيت اليوم الصبح بكير , وقبل كل البيت , كل شي طبيعي وعادي , وبما انو امتحانات "الفاينل" بلشت عنا بالجامعة , قررت ادرس , جبت " اقتصاد هندسي" وقعدت لأدرس.
فجأة!!!
تذكرت شو حلمت هالليلة...
حلمت بصديقي عبدالله -الله يرحمه- , حلمت اني ضميته وعانقته..
ما بعرف , شي قللي انو هالحلم " مش فال خير" , وارتعبت ... وصرت ارجف , وما بعرف ليش خطر ع بالي اني رح أموت!!
ع السريع ... مسكت الدفتر وبلشت اكتب وصيتي - قال زي اللي عن جد -
بعدين بعتت مسج لصاحبي اللي مسافر برة ليدرس طب , وبعتله الحلم بتفاصيله , قلت ببالي : خلي حدا يعرف بالقصة, بعدها قلت لحالي ليش ما أفسر الحلم واخلص؟؟؟
بس كنت خايف انو تكون شكوكي بمحلها ..
أخيراً .. حزمت أموري , كتبت ع "جوجل" : تفسير الاحلام.
طلعلي مليون نتيجة , المهم فتحت ع منتدى -نسيت اسمه - ,, فسرت حلمي عند أكتر من تفسير ..
كلهم طلعولي نفس التفسير ...
تفسير الحلم : "طول العمر"
الحقيقة ارتحت , لآني مو حابب أموت هلآ ..
واكتشفت صغر عقلي واني بغرق بشبر ميّ !!!

هناك 5 تعليقات:

Whisper يقول...

شكله كان عبد الله, الله يرحمه يجي عندكم كتير عالجامعه بمتل هالوقت علشان هيك تزكرته
بس عجبني انك كتبت وصيتك و حكيت لحد ههههههه
ان شاء الله طوله العمر الك

Ahmad M. Al-Mahrouq يقول...

يجي عنا؟؟
انا وعبدالله -الله يرحمه- بنفس الجامعة!

Whisper يقول...

"من منّا لم يسمع بحادثة سقوط طالب جامعة البلقاء التطبيقية من الطابق الثالث في الجامعة الهاشمية أمس (الخميس 14/5/2009) ؟؟"

هاي الجمله اللي خلتني اشك ان كل واحد فيكم بجامعه وهو جاي يزوركم :$

موفقّ بالامتحانات :)

Ahmad M. Al-Mahrouq يقول...

تسلمي ... مو مصدق متى تخلص الامتحانات عشان نسافر ع الشام عند اهلي وخوالي ... هون الجو كئيب

طالبة من الهاشمية يقول...

انا بالجامعة الهاشمية وكتير تأثرت باللي صار مع عبدالله ولهلأ متدايئه عليه كإني كنت اعرفه..

الله يرحمه :( انشالله ما يكون توجع كتير :(