29‏/06‏/2010

Home sweet home

متل ما كتار بيعرفوا .. اني كنت مسافر ع بيروت .. وقضينا يوم بالشام .. وكانت رحلة اكتر من رائعة !!
بس لو كان في وقت اكبر .. الشام ما رح احكي عنها لآني حكيت عنها كتير .
رح احكي شوي عن رحلة لبنان :)

بداية اكتر اشي عجبني الشعب نفسه .. عكسنا تماماً
ما عندهم حب الحشرية والتدخل .. احنا هون الكل بيجي يسألك .. ويعمل معك تحقيق .. وشعبنا بحب يتدخل بكل صغيرة وكبيرة
هناك كل واحد بحاله .. وهالاشي ريحني كتير

لبنان كانت عن جد قطعة من السما .. كان في اجتماع رائع للجبل مع البحر والصخور مع غابات الصنوبر يللي عندهم عاداتهم الخاصة بالعناية فيها فبتاخد شكل شمسية (انهم بقلموا الاغصان السفلية من الشجرة وبخلوا الجزء العلوي لهيك بتبين كأنها نوع شجر جديد من بعيد)

اول ما وصلنا لبنان وقطعنا المصنع (حدود سوريا ولبنان) رحنا ع شتورة .. هي حلوة بس ما حسيتها كتير بتختلف عن بلودان بسوريا .. هناك وقفنا وأكلنا .. وكملنا بعدها ع دير القمر ومرينا بقصر موسى المعماري (عمره هلق حوالي 80 سنة )
كان تحفة فنية رائعة ... بناه هو بنفسه وجمع القطع اللي فيه .. كان عامله متل متحف
كان عامل تماثيل بالحجم البشري للناس وحياتهم القديمة .. بتشوف ام كيف عم تعجن وبتلعب ابنها .. وواحد ومرته عم يلعبوا شدة ويأرجلوا .. بتشوف المدرسة وزمان والطلاب قاعدين ع مقاعد خشبية والاستاذ عم يضرب طالب .. وعجبني كيف مبين تعابير الوجوه بدقة
كان عامل كمان لوحة العشاء الاخير لدافنشي ع شكل تماثيل كمان .. كان ع الطاولة يسوع والحواريين ال12 من بيناتهم مريم المجدلية بجانب يسوع .. هون انا وقفت كتير وصرت انا اشرح للناس عنها .. والفضل اكيد لربى حجازي لآنها عارتني كتاب شيفرة دافنشي :)


اكتر الاماكن السياحية اللي حبيتها وبالفعل تستحق انها تكون عجيبة من عجائب الدنيا السبعة .. مغارة جعيتا
على ما قد الرطوبة والحرارة كانوا بقسمها العلوي .. على ما قد البرد بالقسم السفلي
بالقسم العلوي لما تدخله بتحس حالك داخل العظم البشري - سبحان الله - كانت الصواعد والهوابط بتعمل اشكال فنية بديعة .. وكانوا شارحين تاريخ لبنان ع مقطع حقيقي من هاي الصواعد .. انه بهاي الفترة صار زلزال .. وبهاي الفترة اجو الفينيقيين .. وبهاي الفترة نشأت أول مدينة بلبنان .. الخ
القسم السفلي من المغارة .. كان مغمور نوعا ما بالمي .. لهيك بيتجولوا فيه بالقوارب .. وكانت رحلة مائية رائعة تحت الارض بس للأسف انه التصوير ممنوع وبياخدوا الكاميرات والموبايلات قبل ما تدخل للمغارة :(

الجولة البحرية بخليج جونية كمان كانت حلوة .. بس حسيت القائد للقارب ماصدق متى ويرجعنا ويخلص منا .. عن جد طلعنا اصحاب كشرة الاردنيين
كل الجروب قاعد ومبوزم
عقدناه للزلمة .. حطلنا مليون اغنية .. ولا زقفنا ولا عملنا اشي ..
راح فينا القارب يمنة ويسرة .. ولا رفتلنا عين ... (اكيد كنا رح نفوز بمسابقة مين برمش قبل )

الاشي اللي ما عجبني هناك هو التيلي فريك ... كان صغير , مع انه قال مخصص ل 4 بس يادوب يوسع .. غير انه بضل يخبط .. تنذكر وما تنعاد


موقف هناك استحقرت حالي منه بس مش بقصدي .. وانه وانا واقف اتصور شفت طفل (بيبي) عم يركض لعندي
فحكيت لاختي وهي بتصورني طلعي البيبي معي بالصورة .. بس طلع هالشخص قزم وما كان قصدي اتخوت عليه :(
ومع هيك اخدها بكل روح رياضية وتصور معي :)

بس اكتر اشي قهرني بهالرحلة هو دكتور سنان كان طالع معنا هو ومرته بالجروب
انه الاخ دكتور .. هالاشي مفكره معطيه صلاحيات وماحدا قده
اقل اشي بتفلسف عليك وبقلك انه سنانك بدهم تزبيط ..
بداية انا ماصدقت انه دكتور ولهلق مش مصدق
بدخن بشراهة.. وسنانه صفر للغاية
المهم اخينا بالله عمل للباص مشكلتين

الاولى .. انه لما وصلنا دمشق (بالرجعة) كان المفروض نوقف مدة معينة للي بده يتسوق .. مرافق الباص حكى انه بعد هالمدة (ساعتين) رايح ع بوابة دمشق واعطى الكل رقمه .. واعتذر اكتر من مرة انه مابقدر يتأخر عن الموعد اللي اعطانا ياه لآنه الباص بيتخالف
وطلب من الكل انه يلتزم بالموعد ..
بالفعل .. كلنا رجعنا قبل الموعد .. عدا هالدكتور ... وبما انه الباص اعطى تنبيه واعتذر مقدما ... مشي
بالبوابة .. وقدام كل الخلق ... اجا الدكتور وعمل فضيحة الها اول ما الها اخر وانه كيف الباص بيمشي من دونه .. ومابعرف كيف انحلت القصة.

المشكلة التانية .. انه واحنا ع الحدود الاردنية وبالتفتيش .. زوجة الدكتور بعدت عنا - الجروب- وصارت تحكي بالتيلفون
الشرطة نادتها .. ويبدو انها شكت فيها
راحت فتشتها هي الوحيدة ولقتها مخبية بالشنتاية (شنطة ) جهاز طبي تهريب .. طلع جوزها الدكتور مخبي معها وفكره يمرقوا
يعني فوق اخلاقه الضيقة وشوفة الحال طلع بهرب ..
المثال اللي كل الاولاد الصغار بدهم يكونوا متله .. دكتور

المهم
الشرطة وقفت الباص باللي فيه ساعتين بالضبط مشان حضرته ... واللي طلع بالاخير بفيتامين wow


والآن اترككم مع بعض الصور من الرحلة :)
هلق صوري شنعين بس هيك طلعوا :$


شجر الصنوبر المقلم بالطريقة اللبنانية الغريبة

هون انا ماكنت عارف شواللي بصير .. وماكنت عارف انه الصورة رح تطلع هيك :(

بقصر موسى المعماري

بالروشة .. التى تعني بالفرنسية الصخرة (عرفتها بعد جهد جهيد .. واهلي حكولي ليه هلق لاعرفت؟؟؟)
ROCK ... ROCHE بس الاي E عليها شحطة بالفرنسي

هناك 9 تعليقات:

أشرف محيي الدين يقول...

صديقي أحمد

الحمدلله على السلامه :)

والله شوقتني اكتير اروح على بيروت :)

كل الود

Ahmad M. Al-Mahrouq يقول...

أهلا أشرف
الله يسلمك يا رب

ان شالله بتروح وبتنبسط انت والعيلة :)

في بوستين الك ماراحوا علي لاتخاف
رح اقرأهم واعلق عندك :)

شكرا الك

نيسآان يقول...

الحمدلله على السلامه
نفسي كتير ازور لبنان...للاسف المرتين اللي خططنا نزورها فشلت خططنا

Ahmad M. Al-Mahrouq يقول...

أهلا نيسان
نورتينا :)
ان شالله المرة التالتة رح تزبط معكم ويكون بعدها قد مابدكم زيارات :)

شكرا لمرورك :)

sheeshany يقول...

الحمد لله على سلامتك.
عرض جد جميل و صور حلوة.

عمري ما رحت هناك و إن شاء الله عن قريب. (بس بدون دكاترة! لازم الواحد يحتاط) :]]]]

Ahmad M. Al-Mahrouq يقول...

الله يسلمك هيثم
تسلم

ان شالله بتروح عن قريب وبتنبسط
ومعك حق لازم الواحد يحتاط

تحياتي وضلك زورنا

Unknown يقول...

حمدلله عالسلامه

لبنان غير شكل!! جد بتجنن

هلأ قاعده برفع بصور لبنان وبتذكر:)

لبنــــــــــى يقول...

مع انها كتير متاخرة بس حمد الله على السلامة
بصراحة لبنان بتجنن و شعبهاا رائع للضيافة
و العشرة بما انو اغلب اصحابي منهم فهم بحبو بلدهم و بعملوا دعاية الو بشكل مو طبيعي و ما بتندم اذا زرتوا
بالنسبة لاشكال الدكتور في كتير
بكونوا محملين حالهم جميلة و بخلوا حالهم مضحكة بين العالم و الناس
انا كتير بحب مغارة جعيتا و الجبل كمان
زيارتوا بالصيف بتعقد
و مممممممم كتير بدي كتير لاوصف لينان بس هو اكيد بلد بيستحق الزيارة

Ahmad M. Al-Mahrouq يقول...

@ مياسي

الله يسلمك يارب !!

فعلا لبنان غيرشكل .. شكرا لمرورك :)