20‏/06‏/2010

6 أسرار لا يكشفها من يقابلك أول مرة

ما بعرف اذا العنوان صح .. بس لطشته من الكيل بمكيالين اللي عمات TAG لفرح بطارنة .. واللي بدورها كمان عملتلي تاغ لآكتب عن حالي

هلق انا صرت كاتب عن حالي كتير .. بس هالمرة مش رح أكتر .. بس 5 شغلات :)

1- هلق انا اجتماعي نص نص .. يعني مع العيلة والقرايب مابعرف احكي واطاحش واروح واجي ... بس مع اصحابي بالجامعة او مع الناس الجداد اللي بتعرف عليهم بسرعة باخد ع الوضع واحيانا بكون انا اللي ببلش بالتعارف.

2- بكره كرة القدم .. وما بتابعها ولا بلعبها .. وبكره الناس تقعد تفتح هيك قصص قدامي وتلعيلي قلبي !!!

3- مابعرف احكي نكت بالمرة .. لهيك بفضل السكوت ... لآنه وانا بحكي فيها بمطمطها (من كلمة مطاطة) وبخربها فبتفقد مفعولها النكتة !!

4- حب الظهور عندي بالدرجة الآولى ..بظن هاي سمة عند كل مواليد الآسد .. الابداع والنجومية (شوفة حال )... فرح انا ما بقلدك بس هاي الحقيقة :)

5- مابعرف ليه الكل ماخد عني فكرة بأني فهمان زيادة عن اللزوم .. مع اني لما تسكر معي بتسكر !! ما بعرف ال o من ال Ÿ

وهلق دور أعمل تاغ ل6 مدونين

1-احمد حمدان
2- ربى حجازي
3- د.محمد
4- وايت فريدم
5- جرات عسل
6- اي واحد حابب يشارك


هناك 16 تعليقًا:

Whisper يقول...

انا كرة القدم ما بتلفت نظري الا اذا المنتخب الوطني بلعب او كأس العالم ...كتير بحب كأس العالم ما بعرف ليش :)

كلنا بس تسكر معنا بتسكر...هاد ما بعني انّا ما بنفهم :)

Ahmad M. Al-Mahrouq يقول...

هلا ويسبر ... انا كنت بدي ادعيكي لتكتبي ... بس لقيتهم سبقوني وعملولك تاغ !!

شكرا لمرورك :)

Unknown يقول...

helloo
i know ennak ma bet2alledni hehe
bs ana msh burj el asad :P ana burj el tor :P sheklo kol el abraj elli bet5awwef hek bet7eb hehehehe :P
o 7abbet fekret lamma betsakker betsakker hehe sho a7ki ana .. bakoon lamma7a o mshalla 3anni bs ta3a shuf lamma tla55em ma3i hehehe shateb ! la basta2bel wala barsel :P :P :P :P

Ahmad M. Al-Mahrouq يقول...

hala fara7
hehehe .. yabdo inno el kol btsakker m3o .. w b-ba66il yirsil w yista2bil


Asad .. tor .. 7out ma btfri2 LOL

sheeshany يقول...

يا جماعة ما خليتولنا إشي "نبوح" فيه
:)

شكرا ً للمشاركة أحمد، لو كتبت 7 بدل 5 كان أحسن
;)
تعرّفنا عليك أكثر شوي و الخير لقدّام :)

هـ .

Ahmad M. Al-Mahrouq يقول...

هلا هيثم
له له .. ليش؟
الا ما تلاقيلك كم شغلة تحكيلنا ياهم عنك

شكرا الك :)

Ahmad Hamdan يقول...

1,2 - أنا زيك بالزبط علاقتي و تصرفاتي مع غير الأقارب أفضل كثير من علاقتي مع أقاربي و أكره بشدة متابعة مباريات كره القدم

Ahmad M. Al-Mahrouq يقول...

شكرا للدعم ابوحميد .. واخيرا عنصر رجولي بيكره الكرة متلي :)

Dr.Mohammed يقول...

تماما ، انا ما بكره الكرة لهالدرجة يعني ممكن اتابع الشوط الاول و بعدين انام بالشوط الثاني عادي جدا :)

و بعدين على فكرة انا بعرفش احكي نكت بالمرة يعني يا اما انا بضل اضحك على النكته قبل ما احكيها و بتخرب او اني بنسى شو تكملتها !!! تخيل موقفك عاد و انت مش عارف شو اخر النكته!!!!

Ahmad M. Al-Mahrouq يقول...

أهلا د.محمد .. نورتنا :)

يعني صار لازم نعمل رابطة .. كارهي كرة القدم :)
بس كانت تعملي عقدة ايام المدرسة .. الكل بده يلعب كرة .. طيب ياجماعة غيروا .. عبث


مشان النكت .. متلي انا بضحك قبل ماتبدا النكتة :)

شكرا لمرورك :)

... يقول...

لما اشوف ردك عن كرهك لكرة القدم وحب اخواني لها تزيد علامات التعجب والاستفهام
لانكم اولاد المفروض تحبوا اشياء مثل بعض هههههههههههههه
وتفاجأت لما قريت ان عمرك 19 :o
ماشاء الله عليك
وحتى مابعرف انكت واذا بقول نكته اخربها هههههههههههه

اسعدتني كثيييييييييييير لما عملت لي tag:)

Jarat يقول...

اول اشي شكرا احمد على التاج اكتير انبصطت عليه وانشالله راح اسويه كمان اشويه:)

1* انا اجتماعيه لمن بدي :))

2*انا ما بعرف بكوره القدم بس بحب كره السله لاني كنت كابتن الفريق بالمدرسه واخدنا المركز التاني على مستوا الدوله ;)

كره القدم ما بفهم فيها واهلي بالبيت كتير بحبو يتابعو مباريات وكاس العالم وانا مع الخيل يا شقرا والله ما بفهم اشي هما بصرخو انا بصرخ هما بحكو حمار انا بحكي حمار :$

3*النكت انا عندي روح الفكاهه وبعرف اقلد بس ساعات بكون دمي دقيل باجي بدي احكي نكته بصير اضحك عليها قبل ما اخلصها وكتير بنسى ايش هيا النكته اصلن تحكي البنت مضيعه :$

4* انا ما بتفرق الشهره والظهور كتير معي يعني من الاخر مريحه دماغي

5* كلنا ساعات بتسكر معنا وهل الاشي مش معناتو ما بنفهم بس خلص بكون مش وقتوا :)

Ahmad M. Al-Mahrouq يقول...

@white freedom
له له .. ليش؟
ما كل واحد عنده اهتماماته .. وهي طلع في كذا عنصر رجولي عنا ما بحبوا الكرة :)

ليه قديه كنتي مفكرة عمري؟؟؟
هو انا الشهر الجاي بكون 20 .. ولا يهمك :)


ويللا .. اعملي الواجب تبع الاسرار بسرعة
خلينا نتعرف عليكي اكتر

:)

Ahmad M. Al-Mahrouq يقول...

@جرات عسل

عفواً جرات .. هلق بروح ع مدونتك لآقرأ أسرارك :)

1- نيالك .. ياريتني متلك :)
2- أنا لا كرة قدم ولا سلة :)
3- انا ما عندي روح الفكاهة من الآصل :)
4- مممممم .. اذن انتي مو من شلة برج الآسد
5- هاد الكل بتصير معه !!!

شكرا لمرورك:)

visible... يقول...

السلام عليكم ...

اول رد لي في مدونتك واعجبتني المعلومات السريه عنك ...

تفاجأت انك ماتحب الكره وضحكت على سالفة النكته ...

Ahmad M. Al-Mahrouq يقول...

@ ستروبري

وعليكم السلام
مسرور جدا بزيارتك ومرورك عندي
ولا تقطعينا :)

هي ع قولة المعظم
فضايح
اكتر ما انها اسرار ؛)

تحياتي